• 151 કિલોની કેક અને 1 લાખ બલૂનની વર્ષા સાથે જન્મોત્સવની ઉજવણી - 100 સોનીઓએ તૈયાર કર્યા અદભૂત સુવર્ણ વાઘા
• હનુમાન જયંતીના પાવન અવસરે ઉમટ્યું માનવ મહેરામણ - DJ ના તાલે અને હનુમાન ચાલીસાના નાદથી ગુંજી ઉઠ્યું ધામ
• 1050 કલાકની મહેનત બાદ તૈયાર થયા અલૌકિક વાઘા - 1.50 લાખ ભક્તોની હાજરીમાં યોજાશે ભવ્ય મહાસંધ્યા આરતી

આજે 2 એપ્રિલના રોજ વિશ્વપ્રસિદ્ધ યાત્રાધામ સાળંગપુર હનુમાનજીના જયઘોષથી ગુંજી ઉઠ્યું છે. હનુમાન જયંતીના આ પાવન અવસરે મંદિર પ્રશાસન દ્વારા આયોજિત 'કૃતજ્ઞતા મહામહોત્સવ'માં ભક્તિ અને ભવ્યતાનો અનોખો સમન્વય જોવા મળ્યો હતો. વહેલી સવારથી જ દાદાના દર્શન માટે લાખો શ્રદ્ધાળુઓની કતારો લાગી હતી, જેમાં રાજકોટ સહિત સૌરાષ્ટ્રભરમાંથી ભક્તો ઉમટી પડ્યા હતા.

સુવર્ણ વાઘાનું અલૌકિક તેજ આજના દિવસનું મુખ્ય આકર્ષણ દાદાના સુવર્ણ વાઘા રહ્યા હતા. 8 કિલો શુદ્ધ સોના અને અસલી હીરામાંથી બનેલા આ વાઘા તૈયાર કરવા માટે સોનીઓની ટીમે દિવસ-રાત મહેનત કરી હતી. જ્યારે સવારે શણગાર આરતીમાં દાદાના આ દિવ્ય સ્વરૂપના દર્શન થયા, ત્યારે ભક્તો "જય કષ્ટભંજન દેવ"ના નાદ સાથે ઝૂમી ઉઠ્યા હતા.

આધુનિક ઉજવણી અને રેકોર્ડબ્રેક યજ્ઞ પરંપરાગત ભક્તિની સાથે આધુનિક આયોજન પણ આકર્ષક રહ્યું હતું. 151 કિલોની કેક કટિંગ અને એક લાખ બલૂનનું એર-ડ્રોપિંગ જોઈને યુવા ભક્તોમાં ભારે ઉત્સાહ જોવા મળ્યો હતો. બીજી તરફ, વિશ્વ શાંતિ માટે યોજાયેલા મારુતિ યજ્ઞમાં આ વર્ષે રેકોર્ડબ્રેક 751 પાટલા ગોઠવવામાં આવ્યા હતા, જે સાળંગપુરના ઇતિહાસમાં સૌથી મોટો યજ્ઞ છે. બપોરે 56 ભોગનો અન્નકૂટ ધરાવી ભક્તો માટે મહાપ્રસાદની પણ સુંદર વ્યવસ્થા કરવામાં આવી હતી. સાંજની મહાસંધ્યા આરતીમાં દોઢ લાખથી વધુ લોકોની હાજરી રહેવાની શક્યતાને પગલે પોલીસ અને સ્વયંસેવકોનો ચુસ્ત બંદોબસ્ત તૈનાત કરાયો છે.