• ૪૬ ડિગ્રી તાપમાન વચ્ચે ટેન્કર દ્વારા પાણી પહોંચાડી કરાયો માનવીય પ્રયાસ
• ઓક્સિજનના અભાવે મોતને આરે પહોંચેલી માછલીઓ માટે અધિકારી બન્યા દેવદૂત
• અસહ્ય ગરમીમાં જળચર જીવોને જીવતદાન આપવા ટેન્કરથી પાણી છોડાયું

સિટી ન્યુઝ @ સુરેન્દ્રનગર

ચોટીલાના રેશમિયા તળાવમાં અસહ્ય ગરમીને પગલે પાણી સંપૂર્ણપણે સુકાઈ જતાં જળચર જીવો માટે વિકટ પરિસ્થિતિ સર્જાઈ હતી. ઓક્સિજનના અભાવે અને ૪૫ થી ૪૬ ડિગ્રી તાપમાનમાં માછલીઓ તડપી રહી હતી, જેની ગંભીર નોંધ લઈને ચોટીલાના નાયબ કલેક્ટર (SDM) એચ. ટી. મકવાણાએ તાત્કાલિક અસરથી પાણીના ટેન્કર મોકલવાની સૂચના આપી હતી. આ નિર્ણયથી અનેક માછલીઓના જીવ બચાવવાનો સફળ પ્રયાસ કરાયો છે.

સ્થાનિક રહીશ અને ગામના અગ્રણી શિવરાજભાઈ જેબલિયાએ જણાવ્યું હતું કે, રેશમિયા ગામમાં તળાવનું પાણી સુકાઈ જતાં માછલીઓ મોતને આરે હતી. અગાઉ સરપંચ દ્વારા પણ ટેન્કર દ્વારા પાણી પહોંચાડવાનો પ્રયાસ થયો હતો, પરંતુ કાળઝાળ ગરમીને કારણે તે પાણી પણ સુકાઈ ગયું હતું. ત્યારબાદ શિવરાજભાઈએ આ ગંભીર પરિસ્થિતિ વિશે SDM એચ. ટી. મકવાણાને માહિતગાર કર્યા હતા. SDMએ ત્વરિત કાર્યવાહી કરતા પાણી પુરવઠા વિભાગના અધિકારીઓને સ્થળ પર મોકલીને માછલીઓને બચાવવા માટે તાત્કાલિક પાણીની વ્યવસ્થા કરાવી હતી.

આ પ્રકારની ત્વરિત કામગીરીથી સ્થાનિકોમાં સંતોષની લાગણી જોવા મળી હતી. શિવરાજભાઈએ જણાવ્યું હતું કે, આવા સંવેદનશીલ અધિકારીઓની કામગીરીથી જ સરકાર અને તંત્ર પ્રત્યે જનતાનો વિશ્વાસ વધે છે. સાથે જ તેમણે નાગરિકોને પર્યાવરણ અને મૂંગા જીવો પ્રત્યે પોતાની જવાબદારી સમજીને તેમના રક્ષણ માટે આગળ આવવા આહ્વાન કર્યું હતું. પ્રકૃતિનું સંરક્ષણ એ જ સાચી પર્યાવરણ દિવસની ઉજવણી છે, તેવો સંદેશ પણ આ પ્રસંગે આપવામાં આવ્યો હતો.

જળચર જીવોના બચાવ માટે તંત્રનો પ્રયાસ

રેશમિયા તળાવમાં સર્જાયેલી પાણીની કટોકટીએ ફરી એકવાર પર્યાવરણ પ્રત્યે જાગૃતિ લાવવાની જરૂરિયાત પર ભાર મૂક્યો છે. SDM એચ. ટી. મકવાણાની ત્વરિત હસ્તક્ષેપને કારણે સેંકડો માછલીઓને નવું જીવન મળ્યું છે. આ ઘટના સાબિત કરે છે કે વહીવટી તંત્રની સંવેદનશીલતા અને લોકોની જાગૃતિ સાથે મળીને મુશ્કેલ સમયમાં પણ કુદરતી સંપત્તિ અને જીવોનું રક્ષણ કરી શકે છે. તંત્રના આ નિર્ણયને ચોટીલા પંથકમાં સર્વત્ર આવકારવામાં આવ્યો છે.