સિટી ન્યુઝ @ ગાંધીનગર

ગુજરાત વિધાનસભાના ત્રણ દિવસીય ચોમાસુ સત્રના પ્રથમ દિવસે જ જબરદસ્ત રાજકીય ગરમાવો જોવા મળ્યો હતો. ગૃહની વર્ષો જૂની પરંપરા મુજબ સત્રના આરંભે રાષ્ટ્રગીત 'વંદે માતરમ' ગવાઈ રહ્યું હતું ત્યારે કોંગ્રેસના ધારાસભ્ય ઇમરાન ખેડાવાલા ચાલુ ગીત દરમિયાન પોતાની સીટ પર બેસી જતાં મોટો વિવાદ સર્જાયો હતો. આ ઘટનાને પગલે શાસક પક્ષ ભાજપે ઉગ્ર વિરોધ નોંધાવ્યો હતો.

રાજ્ય મંત્રી પ્રવિણ માળીએ આ બાબતને માતૃભૂમિ અને રાષ્ટ્રગીતના ઘોર અપમાન સમાન ગણાવતા કહ્યું હતું કે, ઇમરાન ખેડાવાલા જાણી જોઈને બેઠા હતા કે ભૂલથી તે અંગે સ્પષ્ટતા કરી જો ભૂલ હોય તો તાત્કાલિક માફી માંગવી જોઈએ. ભૂતકાળમાં વિધાનસભામાં ક્યારેય આવી ઘટના બની નથી અને આ મુદ્દે સંસદીય પ્રણાલી મુજબ આકરા પગલાં લેવાની માંગ કરાશે. ભાજપના ધારાસભ્ય મહેશ કસવાલાએ પણ આ ઘટનાને ગુજરાતની જનતાનું અપમાન ગણાવી અધ્યક્ષ સમક્ષ રજૂઆત કરવાની જાહેરાત કરી હતી. પ્રથમ દિવસે શોક દર્શક પ્રસ્તાવ રજૂ થયા બાદ સંસદીય કાર્ય મંત્રી ઋષિકેશ પટેલે મુલતવીનો પ્રસ્તાવ મૂકતાં અધ્યક્ષ શંકર ચૌધરીએ ગૃહની કાર્યવાહી આવતીકાલે 10 સપ્ટેમ્બર બપોરે 12 વાગ્યા સુધી સ્થગિત કરી હતી.

આ પહેલાં સવારે ખેડૂતોના પ્રશ્નો અને મોંઘવારી મુદ્દે કોંગ્રેસના નેતાઓ સત્યાગ્રહ છાવણી ખાતે ધરણાં પર બેઠા હતા, જ્યારે AAP ના ધારાસભ્યો સુકાયેલા પાક અને ઘાસના પૂડા સાથે વિધાનસભા તરફ કૂચ કરતાં અટકાવાયા હતા. આ વિરોધ વચ્ચે સરકારે ખેડૂતોને 8 કલાકના બદલે 10 કલાક કૃષિ વીજળી આપવાની મહત્વની જાહેરાત કરી છે. મુખ્યમંત્રી ભૂપેન્દ્ર પટેલે જણાવ્યું હતું કે સરકાર પ્રજાના તમામ પ્રશ્નોની ચર્ચા અને ઉત્તર આપવા સંપૂર્ણ સજ્જ છે.

આ સત્ર દરમિયાન રાજ્ય સરકાર ગુમાસ્તા ધારા અને મહેસૂલી સુધારા સહિત કુલ 9 મહત્વપૂર્ણ વિધેયકો રજૂ કરનાર છે. જેમાં નવા સુધારા મુજબ રાજ્યમાં કોઈપણ મોલ, કાફે, હોટલ, રેસ્ટોરન્ટ કે શોરૂમ 24 કલાક ખુલ્લા રાખી શકાશે અને તેના રજિસ્ટ્રેશનમાં સેલ્ફ-ડેક્લેરેશન લાગુ કરી ઇન્સ્પેક્ટર રાજ નાબૂદ કરાશે. આ ઉપરાંત 'ટુકડા જમીન ધારા-1947' માં સુધારો કરી 29 જાન્યુઆરી 1948 થી 31 માર્ચ 2026 સુધી વિભાજિત થયેલી જમીનોને કોઈપણ જાતના દંડ કે પ્રીમિયમ વિના નિયમિત કરાશે, જ્યારે વિવાદમુક્ત જમીનોના રજિસ્ટર્ડ દસ્તાવેજ બાદ તે જ દિવસે મ્યુટેશન નોંધ પ્રમાણિત કરવાની નવી વ્યવસ્થા અમલમાં આવશે.

વિધાનસભામાં વંદે માતરમ વિવાદ અને મહત્વના સુધારા

ગુજરાત વિધાનસભાના ચોમાસુ સત્રના પ્રારંભે વંદે માતરમ વખતે કોંગ્રેસ MLA ઇમરાન ખેડાવાલા બેસી જતાં વિવાદ સર્જાયો હતો, જેને મંત્રી પ્રવિણ માળીએ રાષ્ટ્રગીતનું અપમાન ગણાવી માફીની માંગ કરી હતી. પ્રથમ દિવસે શોક પ્રસ્તાવ બાદ ગૃહ મુલતવી રખાયું હતું. સત્ર દરમિયાન 24 કલાક દુકાનો ખુલ્લી રાખવા, ખેડૂતોને 10 કલાક વીજળી આપવા અને ટુકડા જમીનના વ્યવહારો દંડ વગર નિયમિત કરવા સહિતના 9 મહત્વપૂર્ણ બિલો રજૂ થવા જઈ રહ્યા છે.