રાજકોટમાં સ્થાનિક સ્વરાજ્યની ચૂંટણીના પડઘમ વાગી રહ્યા છે ત્યારે શહેરના રાજકારણમાં પ્રથમવાર ‘રિસોર્ટ પોલિટિક્સ’ની એન્ટ્રી થઈ છે. કોંગ્રેસે આ વખતે ભાજપ કરતા વહેલી ઉમેદવારોની યાદી જાહેર કરી હતી અને તમામના ફોર્મ માન્ય રહ્યા છે. જોકે, ચૂંટણી બિનહરીફ કરવાના કે ઉમેદવારો તોડવાના ભાજપના સંભવિત કાવાદાવાથી બચવા કોંગ્રેસે પોતાના 18 જેટલા નવોદિત અને લો-પ્રોફાઈલ ઉમેદવારોને અજ્ઞાત સ્થળે ખસેડી દીધા છે. આ ઘટનાને પગલે રાજકીય આલમમાં ભારે ચર્ચાઓ જાગી છે.

શહેર કોંગ્રેસ પ્રમુખ રાજદીપસિંહ જાડેજાએ આ અંગે ચોંકાવનારો ખુલાસો કરતા જણાવ્યું કે, આ વખતે શાસક પક્ષ ભાજપ સામે લોકોમાં ભારે રોષ છે અને આંતરિક વિખવાદને કારણે ભાજપ પોતાની હાર ભાળી ગયું છે. તેને ફાયદો થાય તે રીતે કેટલાક તત્વોએ અમારા શાંતિપ્રિય ઉમેદવારોનો સંપર્ક સાધીને ફોર્મ પાછું ખેંચવા માટે ધમકાવવા અને લલચાવવાના પ્રયાસો કર્યા છે. આવા ચાર-પાંચ કિસ્સાઓ ધ્યાને આવતા પક્ષે સાવચેતીના ભાગરૂપે 18 ઉમેદવારોને 15 એપ્રિલના ફોર્મ પરત ખેંચવાના અંતિમ સમય સુધી ગુપ્ત સ્થળે રાખવાનો નિર્ણય લીધો છે.

સામે પક્ષે ભાજપ શહેર પ્રમુખ માધવ દવેએ આ આક્ષેપોને પાયાવિહોણા ગણાવ્યા છે. તેમણે પ્રતિક્રિયા આપતા કહ્યું કે, "આવી વાતો માત્ર કોંગ્રેસની કલ્પના છે. ભાજપ પોતાના વિકાસના કામો પર ચૂંટણી લડે છે અને અમારી પાસે કોઈના ઉમેદવારો તોડવા જેવો વધારાનો સમય નથી." જોકે, રાજકોટના રાજકીય ઇતિહાસમાં ઉમેદવારોને આ રીતે સુરક્ષિત સ્થળે ખસેડવાની ઘટનાએ પક્ષો વચ્ચેના વિશ્વાસના અભાવને છતો કર્યો છે.

રાજકોટમાં ખાસ કરીને વોર્ડ નં. 3, 7 અને 15 જેવા સંવેદનશીલ ગણાતા વોર્ડમાં કોંગ્રેસના સક્ષમ નેતાઓને જવાબદારી સોંપવામાં આવી છે કે તેઓ પોતાની પેનલને અકબંધ રાખે. કોંગ્રેસના નેતાઓનો એવો પણ આક્ષેપ છે કે હાલમાં સરકારી તંત્ર અને અધિકારીઓ નિષ્પક્ષ કામ કરવાને બદલે ભાજપના કાર્યકરોની જેમ વર્તી રહ્યા છે, જેના કારણે તેમને પોલીસ કે વહીવટી તંત્રના રક્ષણ પર ભરોસો રહ્યો નથી. આ સંજોગોમાં રિસોર્ટ પોલિટિક્સ જ એકમાત્ર વિકલ્પ હોવાનું કોંગ્રેસ માની રહી છે.

હવે સૌની નજર 15 એપ્રિલ પર મંડાયેલી છે. શું કોંગ્રેસના આ તમામ 18 ઉમેદવારો ચૂંટણી મેદાનમાં ટકી રહેશે કે પછી અંતિમ ઘડીએ કોઈ મોટો ઉલટફેર જોવા મળશે? હાલ તો રાજકોટના રાજકારણમાં આક્ષેપ-પ્રતિઆક્ષેપ અને ઉમેદવારોની નાકાબંધીના ખેલ વચ્ચે વાતાવરણ અત્યંત તંગ બન્યું છે. લોકશાહીના આ પર્વમાં મતદારોના પ્રશ્નો કરતા નેતાઓના તોડજોડના રાજકારણે વધુ મહત્વ મેળવ્યું હોય તેવું સ્પષ્ટપણે દેખાઈ રહ્યું છે.