સિટી ન્યુઝ @ જયપુર

રાજસ્થાનની રાજ્ય સરકારે રાજ્ય સંચાલિત તમામ સરકારી શાળાઓમાં બહારની અનધિકૃત વ્યક્તિઓના પ્રવેશ, ફોટોગ્રાફી, વીડિયોગ્રાફી તેમજ લાઈવ સ્ટ્રીમિંગ પર તાત્કાલિક અસરથી કડક નિયંત્રણો લાદી દીધા છે. માધ્યમિક શિક્ષણ વિભાગ દ્વારા જારી કરાયેલા સત્તાવાર પરિપત્રમાં અજાણ્યા લોકોના શાળા કેમ્પસમાં પ્રવેશ, વિદ્યાર્થીઓ કે શિક્ષકોની વ્યક્તિગત માહિતી એકત્રિત કરવા અને કોઈપણ પ્રકારના શૂટિંગ સામે કડક માર્ગદર્શિકા જાહેર કરવામાં આવી છે.

આ નવા નિયમો એવા સમયે લાગુ કરવામાં આવ્યા છે જ્યારે રાજ્યભરની શાળાઓમાં માળખાકીય સુવિધાઓ અને શિક્ષણની વાસ્તવિક ગુણવત્તાનું નિરીક્ષણ કરવા માટે 'શાળા ઠીક કરો' અભિયાન શરૂ કરવાની જાહેરાત થઈ હતી. જયપુર, કોટા, જોધપુર, અજમેર, ઉદયપુર અને બાડમેર સહિતના વિસ્તારોની જર્જરિત શાળાઓના ગ્રાઉન્ડ ઓડિટ માટે વિવિધ વિનંતીઓ મળ્યા બાદ આ મુદ્દો ચર્ચામાં આવ્યો હતો.

સરકારના આ પગલાં સામે વિપક્ષી પક્ષોએ આકરા પ્રહારો કર્યા છે. રાજસ્થાન કોંગ્રેસ અધ્યક્ષ ગોવિંદ સિંહ ડોટાસરાએ આક્ષેપ કર્યો હતો કે સરકારી શાળાઓની વાસ્તવિક સ્થિતિ સુધારવાને બદલે સરકાર પોતાની વહીવટી નિષ્ફળતા અને શિક્ષણ વ્યવસ્થાની કથળેલી હાલત છુપાવવા માટે આવા આદેશો આપી રહી છે.

બીજી તરફ, શિક્ષણ વિભાગે સ્પષ્ટતા કરતા જણાવ્યું છે કે આ પગલાં વિદ્યાર્થીઓની ગોપનીયતા, ગરિમા અને સુરક્ષા જાળવવા માટે લેવામાં આવ્યા છે. નેશનલ કમિશન ફોર પ્રોટેક્શન ઓફ ચાઈલ્ડ રાઈટ્સની શાળા સુરક્ષા માર્ગદર્શિકા અને રાઈટ ટુ પ્રાઈવસીનું ચુસ્ત પાલન કરાવવું અનિવાર્ય છે. સરકારે ચેતવણી આપી છે કે શાળા પરિસરમાં અનધિકૃત પ્રવેશ કરનાર કે નિયમોનું ઉલ્લંઘન કરનાર વિરુદ્ધ કાયદેસરની કાર્યવાહી કરવામાં આવશે.

રાજસ્થાન શાળાઓમાં ફોટો-વીડિયો પર રોક

રાજસ્થાન સરકારે સરકારી શાળાઓમાં બહારના લોકોના પ્રવેશ, ફોટોગ્રાફી, વીડિયોગ્રાફી અને લાઈવ સ્ટ્રીમિંગ પર પ્રતિબંધ મૂક્યો છે. વિદ્યાર્થીઓની સુરક્ષા અને રાઈટ ટુ પ્રાઈવસી હેઠળ આ નિયમો લાગુ કરાયા છે. જ્યારે વિપક્ષે આક્ષેપ કર્યો છે કે શાળાઓની કથળેલી સ્થિતિ પર પડદો પાડવા સરકારે આ ફરમાન જારી કર્યું છે.