• ઉત્તરથી દક્ષિણ સુધીના મહત્વના સરહદી વિસ્તારોમાં પાકિસ્તાન દ્વારા તોપો ગોઠવાઈ રહી છે.

• આ તોપ સાધારણ ગોળા ૩૦ થી ૪૦ કિમી અને સ્પેશિયલ ગોળા ૫૩ થી ૭૨ કિમી સુધી ફેંકી શકે છે.

• ફાયરિંગ કર્યા બાદ તરત જ સ્થળ બદલી નાખવાની ખાસ ટેકનોલોજી આ તોપોમાં ઉપલબ્ધ છે.

સિટી ન્યુઝ @ નવી દિલ્હી

નવી દિલ્હી, ભારત સામે નવું ષડયંત્ર રચતા પાકિસ્તાને પશ્ચિમી સરહદ પર પોતાની નાપાક હરકતો વધારી દીધી છે. પાકિસ્તાને ચીન પાસેથી ખરીદેલી ૨૫૦ આધુનિક SH-15 હોવિત્ઝર તોપો ભારત સરહદ નજીક ગોઠવવાનું શરૂ કર્યું છે. ગુપ્તચર સૂત્રોના જણાવ્યા મુજબ, પાકિસ્તાન ઉત્તરથી દક્ષિણ સુધીના મહત્વના સરહદી વિસ્તારોમાં આ નાપાક તૈયારીઓ કરી રહ્યું છે. મે ૨૦૨૫માં ભારતીય સેનાએ 'ઓપરેશન સિંદૂર' હેઠળ પાકિસ્તાન સ્થિત આતંકી ઠેકાણાઓ પર સણસણતો પ્રહાર કર્યો હતો, જેમાં પાકિસ્તાની આર્ટિલરી ક્ષમતાને મોટો ફટકો પડ્યો હતો અને આ હારથી ગભરાયેલા પાકિસ્તાને ચીન પાસેથી આ તોપો મેળવી છે.

ચીનની આ તોપ ૬x૬ આર્મ્ડ ટ્રક પર સવાર હોય છે અને રસ્તા પર પ્રતિ કલાક ૯૦ કિમીની ઝડપે દોડી શકે છે. તે સાધારણ ગોળા ૩૦ થી ૪૦ કિમી અને સ્પેશિયલ રોકેટ ગોળા ૫૩ થી ૭૨ કિમી સુધી સચોટ રીતે ફેંકી શકે છે તેમજ આ તોપમાંથી પ્રતિ મિનિટ ૬ રાઉન્ડ ફાયરિંગ શક્ય છે. આ તોપની સૌથી મોટી ખાસિયત 'શૂટ-એન્ડ-સ્કૂટ' ટેકનોલોજી છે, જેના દ્વારા હુમલો કર્યા પછી આ તોપ તરત જ પોતાનું સ્થળ બદલી નાખે છે, જેથી વળતો પ્રહાર કરવો મુશ્કેલ બને છે.

સરહદ પર આ તોપોની ગોઠવણી કરીને પાકિસ્તાન ભારતની સૈન્ય ચોકીઓ અને સપ્લાય રૂટને નિશાન બનાવવાની નાપાક યોજના બનાવી રહ્યું છે. પાકિસ્તાન અને ચીનની આ વધતી જુગલબંધી સરહદની શાંતિ ડહોળવાનો પ્રયાસ છે, પરંતુ ભારતીય સેના કોઈપણ પરિસ્થિતિનો સામનો કરવા માટે સંપૂર્ણપણે સજ્જ છે.

ભારત પાસે પણ 'K-9 વજ્ર' જેવી અત્યાધુનિક અને શક્તિશાળી તોપો હાજર છે, જે દુશ્મનોની દરેક ચાલને નિષ્ફળ બનાવવા માટે સક્ષમ છે. પાકિસ્તાનની આવી કોઈપણ નાપાક હરકતનો ભારતીય સેના દ્વારા હંમેશાં જડબાતોડ જવાબ આપવામાં આવશે.

આ પ્રકારે સરહદી વિસ્તારોમાં વધતો સૈન્ય તણાવ સુરક્ષા એજન્સીઓ માટે સતર્ક રહેવાનો સ્પષ્ટ સંકેત આપે છે.