• વિરાટ કોહલી અને માર્ક ઝુકરબર્ગ સહિત અનેક દિગ્ગજો છે બાબાના ભક્ત

• ઉત્તરાખંડના કૈંચી ધામ અને વૃંદાવન ઉપરાંત ગુજરાત સાથે છે નાતો

• લક્ષ્મી નારાયણ શર્મા નામથી ઉત્તર પ્રદેશમાં થયો હતો જન્મ

સિટી ન્યુઝ @ મોરબી

નીમ કરોલી બાબાના દુનિયાભરમાં કરોડો ભક્તો છે, જેમાં વિરાટ કોહલી જેવા ક્રિકેટર, માર્ક ઝુકરબર્ગ જેવા ઉદ્યોગપતિઓ અને અનેક કલાકારો સામેલ છે. બાબાને હનુમાનજીના પરમ ભક્ત અને અવતાર માનવામાં આવે છે. ઉત્તરાખંડના કૈંચી ધામ અને વૃંદાવન વિશે તો સૌ કોઈ જાણે છે, પરંતુ બહુ ઓછા લોકોને ખબર છે કે ગુજરાતના મોરબી જિલ્લાના વાવણિયા ગામ સાથે પણ નીમ કરોલી બાબાનો મોટો ઇતિહાસ જોડાયેલો છે.

નીમ કરોલી બાબાનું મૂળ નામ લક્ષ્મી નારાયણ શર્મા હતું અને તેમનો જન્મ ઉત્તર પ્રદેશના અકબરપુર ગામમાં થયો હતો. લોકવાયકાઓ મુજબ, તેઓ ફરતા ફરતા મોરબીના વાવણિયા ગામે પહોંચ્યા હતા અને ગામના તળાવની પાળે આવેલા હનુમાન મંદિરમાં વર્ષ 1910થી 1917 સુધી એટલે કે આશરે 7 વર્ષ સુધી રહીને હનુમાનજીની સાધના કરી હતી. તેઓ તળાવના પાણીમાં રહીને તપસ્યા કરતા હોવાથી સ્થાનિક લોકો તેમને 'તળાવિયા બાબા' અથવા 'તૈલિયા બાબા' તરીકે ઓળખતા હતા. વાવણિયાના આ પવિત્ર હનુમાન મંદિરમાં બજરંગબલીની મૂર્તિની સ્થાપના પણ બાબાએ જ કરી હોવાનું મનાય છે, જેનો હાલ જીર્ણોદ્ધાર કરીને ભવ્ય મંદિર પરિસર વિકસાવવામાં આવ્યું છે.

આધ્યાત્મિક વારસો અને આસ્થા

મહાન સંતો અને ગુરુઓના જીવન સાથે જોડાયેલા આવા ઐતિહાસિક સ્થળો માત્ર આસ્થાનું કેન્દ્ર જ નથી બનતા, પરંતુ તે ક્ષેત્રની સાંસ્કૃતિક અને આધ્યાત્મિક ઓળખને પણ વૈશ્વિક સ્તરે ઉજાગર કરે છે.