સિટી ન્યૂઝ @ નવી દિલ્હી: નેશનલ ક્રાઈમ રેકોર્ડ્સ બ્યુરો (NCRB) દ્વારા વર્ષ 2024 નો વાર્ષિક ક્રાઈમ રિપોર્ટ જાહેર કરવામાં આવ્યો છે, જેમાં દેશમાં કાયદો અને વ્યવસ્થાની સ્થિતિમાં મિશ્ર પ્રતિસાદ જોવા મળ્યો છે. અહેવાલ મુજબ, વર્ષ 2023 ની સરખામણીમાં 2024 માં કુલ નોંધાયેલા ગુનાઓમાં 6% નો ઘટાડો થયો છે. 2023 માં દેશભરમાં 62.41 લાખ કેસ નોંધાયા હતા, જેની સામે 2024 માં આ આંકડો ઘટીને 58.85 લાખ થયો છે. જોકે, આ રાહતની વચ્ચે સાયબર ક્રાઈમના કેસોમાં 18% નો તોતિંગ ઉછાળો આવતા ડિજિટલ સુરક્ષા સામે ગંભીર સવાલો ઉભા થયા છે.

રિપોર્ટના વિશ્લેષણ મુજબ, સાયબર ગુનેગારોએ હવે છેતરપિંડીના નવા રસ્તાઓ અપનાવ્યા છે. જેમાં ખાતામાંથી પૈસા ઉપાડી લેવા, 'ડિજિટલ અરેસ્ટ' ના નામે ધમકાવવા અને 'સેક્સટોર્શન' જેવા ગંભીર પ્રકારના ગુનાઓનો સમાવેશ થાય છે. આ ઓનલાઇન લૂંટમાં સૌથી વધુ ભોગ વરિષ્ઠ નાગરિકો બન્યા છે, જેમના વિરુદ્ધના ગુનાઓમાં અંદાજે 17% નો વધારો નોંધાયો છે. ડિજિટલ લુંટારાઓ વડીલોની ટેકનિકલ મર્યાદાઓનો લાભ ઉઠાવીને તેમને મોટી આર્થિક પાયમાલી તરફ ધકેલી રહ્યા છે.

હત્યા અને શારીરિક ઈજાના કેસોમાં વર્ષ 2024 માં રાહત જોવા મળી છે. દેશભરમાં હત્યાના કુલ 27,049 કેસ નોંધાયા છે, જે ગત વર્ષ કરતા 2.4% ઓછા છે. હત્યા પાછળના મુખ્ય કારણોમાં અંગત સંઘર્ષ, બદલો અને દુશ્મનાવટ મોખરે રહ્યા છે. ખાસ કરીને નાની દલીલોમાં ઉશ્કેરાઈને કરવામાં આવતી હત્યાના કિસ્સાઓ ચિંતાનો વિષય બન્યા છે. બીજી તરફ, ઈજા સંબંધિત કેસોમાં 30.58% નો મોટો ઘટાડો નોંધાયો છે, જે સામાજિક સ્તરે હિંસા ઘટતી હોવાના સંકેત આપે છે.

મહિલાઓ અને વંચિત વર્ગો વિરુદ્ધના ગુનાઓમાં પણ સુધારો જોવા મળ્યો છે. મહિલાઓ વિરુદ્ધના અપરાધોમાં 1.5% નો ઘટાડો થયો છે, જોકે આંકડા દર્શાવે છે કે મહિલાઓ વિરુદ્ધ થતા ગુનાઓમાં આરોપીઓ મોટે ભાગે તેમના પતિ અથવા નજીકના સંબંધીઓ જ હોય છે. અનુસૂચિત જાતિ (SC) વિરુદ્ધના ગુનામાં 3.6% અને અનુસૂચિત જનજાતિ (ST) વિરુદ્ધના ગુનામાં 23.1% નો નોંધપાત્ર ઘટાડો થયો છે. અપહરણના કેસોમાં હજુ પણ મહિલાઓની સંખ્યા વધુ છે, જે તંત્ર માટે પડકારરૂપ છે.

એકંદરે, NCRB નો આ રિપોર્ટ સ્પષ્ટ કરે છે કે દેશમાં પરંપરાગત ગુનાઓ પર નિયંત્રણ મેળવવામાં સફળતા મળી રહી છે, પરંતુ ગુનાખોરીનું સ્વરૂપ હવે 'ફિઝિકલ' થી બદલાઈને 'ડિજિટલ' થઈ રહ્યું છે. સાયબર ક્રાઈમનો વધતો વ્યાપ રોકવા માટે પોલીસ અને સુરક્ષા એજન્સીઓએ વધુ આધુનિક બનવાની જરૂર છે. પ્રજાએ પણ 'ડિજિટલ અરેસ્ટ' જેવી અજાણી ધમકીઓથી ન ડરવા અને જાગૃત રહેવા અપીલ કરવામાં આવી છે, જેથી ટેકનોલોજીના માધ્યમથી થતી આ લૂંટને અટકાવી શકાય.