• જ્યોર્જટાઉન યુનિવર્સિટી ખાતે ભવ્ય સન્માન સમારોહ યોજાયો.

• ભારતના રીમા નાણાવટીને પણ એવોર્ડથી સન્માનિત કર્યા.

• સોશિયલ મીડિયા પર આ પુરસ્કાર સામે ટીકાઓ.

સિટી ન્યુઝ @ વોશિંગ્ટન

બાંગ્લાદેશની વચગાળાની સરકારના મુખ્ય સલાહકાર અને નોબેલ પુરસ્કાર વિજેતા મોહમ્મદ યુનુસને અમેરિકામાં 'હિલેરી રોડહમ ક્લિન્ટન એવોર્ડ'થી સન્માનિત કરવામાં આવ્યા છે. વોશિંગ્ટન ડીસીની જ્યોર્જટાઉન યુનિવર્સિટી ખાતે યોજાયેલા ભવ્ય સમારોહમાં પૂર્વ વિદેશ મંત્રી હિલેરી ક્લિન્ટને તેમને 'ગ્રામીણ બૅન્ક' અને મહિલા સશક્તિકરણ ક્ષેત્રે તેમના યોગદાન બદલ આ એવોર્ડ એનાયત કર્યો હતો. આ પ્રસંગે ભારતના 'સેલ્ફ એમ્પ્લોયડ વિમેન્સ એસોસિએશન' (SEWA)ના ડિરેક્ટર રીમા નાણાવટીને પણ સન્માનિત કરવામાં આવ્યા હતા.

એક તરફ હિલેરી ક્લિન્ટને તેમના પચાસ વર્ષના કાર્યોની પ્રશંસા કરી હતી, તો બીજી તરફ સોશિયલ મીડિયા પર આ સન્માનને લઈને ભારે ટીકાઓ પણ થઈ રહી છે. કેટલાક વિવેચકો તેને બાંગ્લાદેશમાં થયેલા સત્તા પરિવર્તનનું ઇનામ ગણાવી રહ્યા છે, કારણ કે શેખ હસીનાના સત્તા છોડ્યા બાદ યુનુસે કમાન સંભાળી હતી અને આ શાસનકાળમાં અલ્પસંખ્યક હિન્દુઓ પર થયેલા હુમલાઓને લઈને પણ સવાલો ઉઠ્યા છે. આ ઉપરાંત, અમેરિકામાં યોજાનારી ચૂંટણીઓ અને ડેમોક્રેટિક પાર્ટી સાથેના તેમના સંબંધોને લઈને પણ આ ઘટનાક્રમની રાજકીય ચર્ચાઓ તેજ થઈ છે.