• પગની ઈજાને કારણે હજુ સુધી એકપણ મેચ નથી રમ્યા માહી, સ્વાસ્થ્યમાં સુધારાની આશા
• બોલિંગ કોચ એરિક સિમન્સનો ખુલાસો; 44 વર્ષીય દિગ્ગજ ખેલાડીની વાપસી પર સસ્પેન્સ યથાવત
• નેટ્સમાં પ્રેક્ટિસ શરૂ છતાં ફિટનેસ નડતરરૂપ, દિલ્હી સામેની ટક્કર પૂર્વે ચાહકોમાં નિરાશા

નવી દિલ્હી | સિટી ન્યૂઝ :  ઇન્ડિયન પ્રીમિયર લીગ (IPL) 2026 માં ચેન્નાઈ સુપર કિંગ્સ (CSK) ની મુશ્કેલીઓ ઓછી થવાનું નામ નથી લઈ રહી. ટીમના સૌથી અનુભવી ખેલાડી અને પૂર્વ કેપ્ટન મહેન્દ્ર સિંહ ધોની આવતીકાલે દિલ્હી કેપિટલ્સ સામે રમાનારી મહત્વની મેચમાં પણ ટીમનો હિસ્સો બની શકશે નહીં. બોલિંગ કોચ એરિક સિમન્સે સોમવારે પત્રકાર પરિષદમાં પુષ્ટિ કરી હતી કે ધોની હાલમાં દિલ્હીમાં ટીમ સાથે જોડાયા નથી, જેના કારણે કરોડો ચાહકોની આતુરતાનો અંત આવ્યો નથી.

ધોની આ સીઝનની શરૂઆતથી જ પગની ઈજા સામે ઝઝૂમી રહ્યા છે, જેના કારણે તેમણે અત્યાર સુધી રમાયેલી એક પણ મેચમાં ભાગ લીધો નથી. IPL 2026 નો અડધો ભાગ પૂર્ણ થઈ ચૂક્યો છે અને ચેન્નાઈની ટીમ હવે તેની 10 મી મેચ રમવા જઈ રહી છે ત્યારે મુખ્ય ખેલાડીની ગેરહાજરી ટીમના સંતુલનને અસર કરી રહી છે. જોકે, કોચે આશ્વાસન આપ્યું છે કે ધોનીના સ્વાસ્થ્યમાં ધીમે-ધીમે પણ સતત સુધારો થઈ રહ્યો છે.

મંગળવારની મેચ પૂર્વે મીડિયા સાથે વાતચીત કરતા એરિક સિમન્સે જણાવ્યું હતું કે, "ધોની વિશે સત્તાવાર અપડેટ્સ આપવું મારા અધિકારક્ષેત્રની બહાર છે, પરંતુ તેઓ હાલ દિલ્હીમાં અમારી સાથે નથી. તેઓ ધીમે-ધીમે સ્વસ્થ થઈ રહ્યા છે અને નેટમાં બેટિંગનો અભ્યાસ પણ શરૂ કર્યો છે." તેમણે વધુમાં ઉમેર્યું કે ધોની અત્યંત અનુભવી ખેલાડી છે અને તેઓ ક્યારે રમવા માટે સંપૂર્ણ સજ્જ હશે તેનો નિર્ણય તેઓ પોતે જ લેશે.

CSK નું પ્રદર્શન આ સીઝનમાં અત્યાર સુધી અપેક્ષાઓ મુજબ રહ્યું નથી. આંતરરાષ્ટ્રીય ક્રિકેટમાંથી નિવૃત્તિ લીધા બાદ 44 વર્ષીય ભારતીય મહાન ખેલાડીના ભવિષ્ય અને નિવૃત્તિ વિશે દર વર્ષે અનેક અટકળો વહેતી થાય છે. આ વર્ષે ઈજાને કારણે તેઓ મેદાનથી દૂર રહેતા ચાહકોમાં ચિંતા વધી છે કે શું તેઓ આ સીઝનમાં રમી શકશે કે નહીં. ધોની છેલ્લા કેટલાક દિવસોથી નેટમાં પરસેવો પાડી રહ્યા છે, જે તેમની વાપસીના સંકેત જરૂર આપે છે.

આવતીકાલની મેચ દિલ્હી કેપિટલ્સ માટે હોમ ગ્રાઉન્ડ પર રમાવાની હોવાથી રસાકસી જામશે. ચેન્નાઈ માટે પ્લેઓફની રેસમાં ટકી રહેવા માટે આ જીત અત્યંત અનિવાર્ય છે. ધોનીની ગેરહાજરીમાં રૂતુરાજ ગાયકવાડ પર ટીમનું મનોબળ જાળવી રાખવાની મોટી જવાબદારી રહેશે. હવે જોવાનું એ રહેશે કે ચેન્નાઈમાં રમાનારી આગામી મેચો સુધીમાં માહી સંપૂર્ણ ફિટ થઈને મેદાનમાં એન્ટ્રી કરે છે કે કેમ.