અમદાવાદ | સિટી ન્યૂઝ : જેસન હોલ્ડરના નેતૃત્વ હેઠળ બોલરોના ઘાતક પ્રદર્શન બાદ, ગુજરાત ટાઇટન્સે સાઈ સુદર્શનની મજબૂત બેટિંગની મદદથી પંજાબ કિંગ્સ સામે ચાર વિકેટથી શાનદાર વિજય મેળવ્યો છે. રવિવારે અમદાવાદના નરેન્દ્ર મોદી સ્ટેડિયમ ખાતે રમાયેલી હાઈ-વોલ્ટેજ મેચમાં, ટોસ હારીને પ્રથમ બેટિંગ કરવા આવેલી પંજાબની ટીમે સૂર્યાંશ શેડગેની શાનદાર અડધી સદીની મદદથી 20 ઓવરમાં નવ વિકેટે 163 રન બનાવ્યા હતા. જવાબમાં, ગુજરાત ટાઇટન્સે 19.5 ઓવરમાં છ વિકેટે 167 રન બનાવીને લક્ષ્યાંક હાંસલ કરી લીધો હતો.

આ IPL સીઝનમાં પંજાબ કિંગ્સનો આ સતત પરાજય છે, જે અગાઉ રાજસ્થાન રોયલ્સ સામે પણ હાર્યું હતું. પોઈન્ટ ટેબલની સ્થિતિ જોતા પંજાબની ટીમ હાલમાં 13 પોઈન્ટ અને +0.855 ના નેટ રન રેટ સાથે ટોચ પર છે, જ્યારે ગુજરાત 10 માંથી છ મેચ જીતીને 12 પોઈન્ટ સાથે પાંચમા સ્થાને પહોંચી ગયું છે. આ જીત સાથે ગુજરાતે પ્લેઓફ તરફ મજબૂત પગલું ભર્યું છે. હાલમાં ચાર ટીમો — ગુજરાત, RCB, હૈદરાબાદ અને રાજસ્થાન — 12-12 પોઈન્ટ સાથે બરાબરી પર છે.

164 રનના લક્ષ્યનો પીછો કરવા ઉતરેલી ગુજરાતની શરૂઆત ખરાબ રહી હતી. કેપ્ટન શુભમન ગિલ માત્ર 5 રન બનાવી 16 રનના કુલ સ્કોર પર આઉટ થઈ ગયો હતો. જોકે, ત્યારબાદ સાઈ સુદર્શને જોસ બટલર સાથે મળીને ઇનિંગને સ્થિર કરી હતી અને બીજી વિકેટ માટે 40 બોલમાં 53 રન જોડ્યા હતા. બટલર 26 રન બનાવી આઉટ થયા બાદ સુદર્શને બાજી સંભાળી હતી અને 41 બોલમાં 57 રનની મહત્વપૂર્ણ ઇનિંગ રમી પેવેલિયન પરત ફર્યો હતો.

અંતિમ ઓવરોમાં વોશિંગ્ટન સુંદરે આક્રમક રમત બતાવી હતી. સુંદરે 23 બોલમાં 40 રનની અણનમ ઇનિંગ રમીને ટીમને રોમાંચક વિજય અપાવ્યો હતો. પંજાબ તરફથી અર્શદીપ સિંહ અને વિજયકુમાર વિશાકે બે-બે વિકેટ ઝડપી હતી, જ્યારે માર્કો જેનસેન અને માર્કસ સ્ટોઇનિસને એક-એક સફળતા મળી હતી. ગુજરાતના બેટ્સમેનોએ સંયમ અને આક્રમકતાનું યોગ્ય મિશ્રણ બતાવીને અંતિમ ઓવરમાં મેચ પોતાના નામે કરી લીધી હતી.

અગાઉ બેટિંગ કરતા પંજાબની શરૂઆત અત્યંત ખરાબ રહી હતી. પ્રથમ ઓવરના બીજા જ બોલ પર પ્રિયાંશ આર્ય (2) અને ત્રીજા બોલ પર કૂપર કોનોલી (0) આઉટ થતા ટીમે માત્ર બે રનમાં બે વિકેટ ગુમાવી દીધી હતી. કેપ્ટન શ્રેયસ ઐયર (19) અને પ્રભસિમરન સિંહે સ્કોરને 35 સુધી પહોંચાડ્યો હતો, પરંતુ નિયમિત અંતરે વિકેટો પડતા ટીમ મુશ્કેલીમાં મુકાઈ હતી. અંતે સૂર્યાંશ શેડગેના પ્રતિકારને કારણે પંજાબ પડકારજનક સ્કોર સુધી પહોંચી શક્યું હતું, પરંતુ તે જીત માટે પૂરતો સાબિત થયો નહોતો.