સિટી ન્યુઝ @ અમદાવાદ 

અમદાવાદમાં ડિલિવરી સર્વિસ પ્લેટફોર્મ 'પોર્ટર'ની આડમાં ચાલી રહેલી ડ્રગ્સની હેરાફેરીનો એક ચોંકાવનારો પર્દાફાશ થયો છે. પોર્ટરના ડિલિવરી બોય વસંતભાઈ સોલંકીને ગોતા વિસ્તારમાં એક પાર્સલ પહોંચાડવાનો ઓર્ડર મળ્યો હતો, પરંતુ પાર્સલ પર શંકા જતાં તેમણે તપાસ કરતા તેમાંથી આશરે રૂ. 1,500 ની કિંમતનું એમડી ડ્રગ્સ મળી આવ્યું હતું.

પ્રાપ્ત વિગતો મુજબ, વસંતભાઈને સામાન લઈને ગોતા તરફ જવાનું હતું ત્યારે સતીશભાઈ સરાણીયાના નંબર પરથી ફોન આવીને નાના ચિલોડા આવવા માટે કહેવામાં આવ્યું હતું. પોતાની પોર્ટર આઈડીમાંથી ઓર્ડર ન પડ્યો હોવા છતાં અજાણ્યા ઓર્ડર જનરેટ થતા તેમને શંકા ગઈ હતી. જેથી તેમણે પોર્ટર ડ્રાઈવરને નાના ચિલોડા બોલાવીને તપાસ કરતા અંદરથી ડ્રગ્સની પડીકી મળી આવી હતી.

સમજદારી અને સતર્કતા દાખવીને ડિલિવરી આગળ પહોંચાડવાને બદલે વસંતભાઈએ તાત્કાલિક પોલીસ કંટ્રોલરૂમ (100 નંબર) પર ફોન કરીને સમગ્ર ઘટનાની જાણ કરી હતી. કંટ્રોલરૂમના મેસેજના આધારે નરોડા પોલીસ તુરંત જ હરકતમાં આવી ગઈ હતી અને ઘટનાસ્થળે પહોંચીને ડ્રગ્સનો જથ્થો કબજે કર્યો હતો.

પોલીસે આ મામલે પ્રિયાંક વસંતભાઈ સંઘવી (ઉંમર 27 વર્ષ) નામના યુવકની અટકાયત કરી પૂછપરછ શરૂ કરી છે. પ્રાથમિક તપાસમાં આ માલ આગળ અન્ય કોઈ વ્યક્તિને આપવાનો હોવાનું સામે આવ્યું છે. આ રેકેટમાં પકડાયેલ પોર્ટર ચાલક નિર્દોષ હોવાનું જણાઈ આવ્યું છે, જ્યારે માલ મોકલનાર અને મેળવનાર સામે ગુનો નોંધીને પોલીસે કાયદેસરની કાર્યવાહી હાથ ધરી છે.

આ ઘટનાએ સાબિત કર્યું છે કે ડિલિવરી એપ્સનો દુરુપયોગ કરીને ગુનેગારો કેવી રીતે ગેરકાયદે પ્રવૃત્તિઓ ચલાવવાનો પ્રયાસ કરતા હોય છે. જો કે, એક સામાન્ય કર્મચારીની સતર્કતા અને સમયસૂચકતાને કારણે આ ડ્રગ્સ હેરાફેરીનું નેટવર્ક સમયસર પકડાઈ ગયું છે.

ડિજિટલ ડિલિવરી એપ્સનો દુરુપયોગ: સતર્કતા જ સૌથી મોટું રક્ષણ

આજના આધુનિક યુગમાં પાર્સલ અને ડિલિવરી સેવાઓ આપણા જીવનને સરળ બનાવી રહી છે, પરંતુ તેનો ગેરલાભ લઈને કેટલાક તત્વો ડ્રગ્સ કે ગેરકાયદે ચીજવસ્તુઓની હેરાફેરી માટે તેનો દુરુપયોગ કરતા હોય છે. અમદાવાદની આ ઘટનામાં પોર્ટર કર્મચારી વસંતભાઈએ દર્શાવેલી સતર્કતા અને ડર વગર પોલીસને આપેલી જાણકારી પ્રશંસનીય છે. જો આવા કિસ્સાઓમાં દરેક નાગરિક જાગૃત રહે, તો ગુનેગારોના મનસૂબા સફળ થતા અટકાવી શકાય છે.