• આઝાદ ચોકથી દાણાપીઠ સુધી પગપાળા પેટ્રોલિંગ - રસ્તા વચ્ચે વાહન ઊભા રાખનારાઓને પોલીસે સ્થળ પર જ ખખડાવ્યા
• "દંડ નહીં, જનજાગૃતિ પ્રાથમિકતા" - પીઆઈ દેસાઈએ વેપારીઓને પણ ટ્રાફિક વ્યવસ્થા જાળવવા તાકીદ કરી
• નો-પાર્કિંગ ઝોનમાં વાહન મૂકનારાઓ સામે કડક વલણ - પગ ઉપર પગ ચડાવી મોપેડ ચલાવતા નબીરાઓને પણ ટોક્યા

જૂનાગઢ શહેરના હાર્દ સમાન વ્યાપારી વિસ્તારોમાં લાંબા સમયથી માથાના દુખાવા સમાન બનેલી ટ્રાફિકની સમસ્યા હલ કરવા માટે આજે જૂનાગઢ પોલીસ 'એક્શન મોડ'માં જોવા મળી હતી. એ-ડિવિઝન પોલીસ સ્ટેશનના પીઆઈ સંજય દેસાઈ અને તેમની ટીમે શહેરના મુખ્ય માર્ગો પર આકસ્મિક ફૂટ પેટ્રોલિંગ હાથ ધર્યું હતું. પોલીસની આ આક્રમક કામગીરીને પગલે નિયમભંગ કરનારા તત્વો અને આડેધડ પાર્કિંગ કરનારા વાહનચાલકોમાં ફફડાટ વ્યાપી ગયો હતો.

પોલીસ કાફલાએ આજે બપોરના સમયે આઝાદ ચોકથી શરૂ કરીને પોસ્ટ ઓફિસ રોડ, દાણાપીઠ સર્કલ અને ચોક માલીવાડા જેવા અત્યંત વ્યસ્ત વિસ્તારોમાં પગપાળા પરિભ્રમણ કર્યું હતું. આ ડ્રાઈવ દરમિયાન રસ્તાની વચ્ચે અથવા 'નો-પાર્કિંગ' ઝોનમાં અડચણરૂપ રીતે ઊભેલા વાહનોના માલિકો સામે પોલીસે કડક વલણ અપનાવ્યું હતું. રસ્તા પર પગ ઉપર પગ ચડાવીને બેફિકરાઈથી મોપેડ ચલાવતા યુવકોને પણ પોલીસે અટકાવીને શિસ્તના પાઠ ભણાવ્યા હતા.

ઓપરેશન દરમિયાન પીઆઈ સંજય દેસાઈએ સ્થાનિક દુકાનદારો સાથે પણ સીધો સંવાદ કર્યો હતો. તેમણે વેપારીઓને ટકોર કરી હતી કે, "તમે તમારી દુકાન સામે આડેધડ વાહન પાર્ક કરતા ચાલકોને કેમ કંઈ કહેતા નથી?" પોલીસ દ્વારા લારીધારકોને પણ રોડથી દૂર રહીને ધંધો કરવા અને રસ્તો મોકળો રાખવા કડક સૂચના આપવામાં આવી હતી. અનેક વાહનચાલકોને ચેતવણી અપાઈ હતી કે જો ફરીથી નિયમભંગ થશે તો વાહન ડિટેઈન કરવાની કાર્યવાહી કરવામાં આવશે.

આ ઓપરેશન અંગે વિગતો આપતા પીઆઈ સંજય દેસાઈએ જણાવ્યું હતું કે, બજારમાં ખરીદી કરવા આવતા ગ્રાહકો અને સ્થાનિક વેપારીઓને ટ્રાફિકને કારણે પડતી મુશ્કેલીઓ દૂર કરવી એ અમારી પ્રાથમિકતા છે. અમારો ઉદ્દેશ્ય માત્ર દંડ વસૂલવાનો નથી, પરંતુ લોકોમાં ટ્રાફિક પ્રત્યે જાગૃતિ આવે અને તેઓ શિસ્તબદ્ધ રીતે વાહન પાર્ક કરે તે હેતુથી આ ફૂટ પેટ્રોલિંગ કરવામાં આવ્યું છે. આ પ્રકારની મુલાકાતથી લોકોમાં પોલીસનો વિશ્વાસ પણ વધશે.

પોલીસ તંત્ર દ્વારા સ્પષ્ટ ચેતવણી આપવામાં આવી છે કે આગામી દિવસોમાં પણ આ પ્રકારની ડ્રાઈવ સતત અને વધુ કડક રીતે ચાલુ રાખવામાં આવશે. ટ્રાફિકના નિયમોનું ઉલ્લંઘન કરનારા અને જાહેર રસ્તા પર દબાણ કરનારાઓ સામે કાયદાનો સકંજો કસાયેલો રહેશે. પોલીસની આ સક્રિયતાને પગલે આજે બપોર બાદ જૂનાગઢના મુખ્ય બજારોના રસ્તાઓ પ્રમાણમાં મોકળા અને વ્યવસ્થિત જોવા મળ્યા હતા, જેનાથી ગ્રાહકો અને રાહદારીઓએ રાહત અનુભવી હતી.