સિટી ન્યુઝ @ જૂનાગઢ

ગુજરાત રાજ્યના જૂનાગઢ સહિત વિવિધ જિલ્લાઓમાં અપરણિત અને યોગ્ય જીવનસાથીની શોધ કરતા નિર્દોષ યુવાનોને નિશાન બનાવતી એક આંતરરાજ્ય 'લૂંટેરી દુલ્હન' અને લેભાગુ દલાલોની સંગઠિત ગેંગ સક્રિય થઈ હોવાનો મોટો પર્દાફાશ થયો છે. લગ્નના પવિત્ર બંધનને હથિયાર બનાવીને આ ગેંગ લાખો રૂપિયાની છેતરપિંડીનું એક વિશાળ નેટવર્ક ચલાવે છે. દલાલો મારફતે યુવકોના લગ્ન કરાવી આપવામાં આવે છે, જે બાદ 50 હજારથી લઈને 2 લાખ રૂપિયા સુધીની રકમ પડાવીને કન્યા થોડા જ દિવસોમાં પલાયન થઈ જાય છે. ભોગ બનનારા યુવાનો દ્વારા પોલીસમાં લેખિત અરજીઓ કરવા છતાં પણ સ્થાનિક કક્ષાએ FIR દાખલ ન થતાં પીડિતોએ હવે ન્યાય માટે રાજ્યના ડીજીપી અને મુખ્યમંત્રીને રજૂઆત કરી છે.

આ સંગઠિત ષડયંત્રમાં જ્યારે યુવકનો પરિવાર કન્યા જોવા જાય ત્યારે તેના માતા-પિતા તરીકે નકલી વ્યક્તિઓ ઓળખાણ આપે છે. લગ્ન સંપન્ન થયા બાદ કન્યા થોડા દિવસો યુવકના ઘરે રહીને કોઈ બહાના હેઠળ માવતરે જતી રહે છે. જો કોઈ કિસ્સામાં કન્યાને જવાનો મોકો ન મળે, તો તે ઘરમાં ઝઘડા અને કકળાટ શરૂ કરે છે. માળિયા હાટીના તાલુકાના પિખોર ગામના પીડિત પ્રદીપભાઈ ભાલોડિયાને સુરતમાં જાગૃતિ નામની છોકરી સાથે પરણાવીને 1,80,000 રૂપિયા પડાવી લેવાયા હતા. ત્યારબાદ જાગૃતિએ જાતે કપડાં ફાડી 181 અભયમ અને પોલીસમાં ખોટી ફરિયાદો કરી હતી.

આવા જ અન્ય કિસ્સાઓમાં જૂનાગઢના મનીષભાઈ સોલંકી પાસેથી માલેગાંવમાં 2 લાખ અને વાડાસીમડી ગામના ધવલભાઈ સતાસિયા પાસેથી 2.50 લાખ રૂપિયા પડાવી લેવામાં આવ્યા છે. જૂનાગઢ જિલ્લા કોંગ્રેસ સમિતિ ઓબીસી સેલના મહામંત્રી વી. ટી. સીડાએ આક્ષેપ કર્યો છે કે પોલીસ ફરિયાદ નોંધવામાં વિલંબ કરી રહી છે, જે દર્શાવે છે કે આ નેટવર્ક પોલીસની સાંઠગાંઠથી ચાલી રહ્યું છે. તેમણે આ સમગ્ર ષડયંત્રને 'માનવ તસ્કરી' ગણાવી કડક કલમો હેઠળ ગુનો દાખલ કરવાની માંગ કરી છે.

સાવધાની અને કડક કાયદાની જરૂર લગ્નની લાલચમાં નિર્દોષ યુવાનો પાસેથી લાખો રૂપિયા પડાવતી આ લૂંટેરી દુલ્હનો અને દલાલોની ગેંગ સમાજ માટે એક મોટું દૂષણ બની ગઈ છે. યુવાનોએ અજાણ્યા દલાલો પર વિશ્વાસ કરતા પહેલા પૂરતી તપાસ કરવી જરૂરી છે. ઉપરાંત, પોલીસ તંત્રએ પણ આવી અરજીઓને ગંભીરતાથી લઈને તાત્કાલિક FIR નોંધવી જોઈએ, જેથી આ આંતરરાજ્ય ગેંગના મૂળ સુધી પહોંચીને તેમને કડક સજા અપાવી શકાય અને વધુ યુવાનોને છેતરાતા બચાવી શકાય.