ફેક પ્રોફાઈલનો ખેલ; રૂપિયા લઈને ગાયબ થતી ઓનલાઈન ગેંગ !

 શહેરમાં ફેક IDથી ચાલી રહ્યો છે મોટો સ્કેમ

પોતાના રૂમમાં 4000, ફાર્મ હાઉસમાં લઈ જવાના 10,000 રૂપિયાના ભાવો : ઓનલાઈન પેમેન્ટ પછી યુવતીઓ આવતી નહીં હોવાથી ફરીયાદો : અનેક યુવાનો ભોગ બન્યા 

સિટી ન્યૂઝ@રાજકોટ

રાજકોટ શહેરમાં સોશિયલ મીડિયા પ્લેટફોર્મ પર વધતી છેતરપિંડીની ઘટનાઓએ ચિંતા ઊભી કરી છે. ખાસ કરીને Facebook જેવી સાઈટ પર ફેક પ્રોફાઈલ બનાવી યુવાનોને લાલચ આપી આર્થિક છેતરપિંડી કરવામાં આવી રહી હોવાના બનાવો સામે આવી રહ્યા છે.

માહિતી મુજબ, અજાણ્યા તત્વો યુવતીના નામે આકર્ષક અને ભ્રામક પ્રોફાઈલ બનાવી લોકો સાથે સંપર્ક સાધે છે. શરૂઆતમાં મિત્રતા અને સામાન્ય વાતચીતથી વિશ્વાસ જીતવામાં આવે છે, ત્યારબાદ મળવાની ઓફર અથવા અન્ય લાલચ આપી ઓનલાઈન રૂપિયા ટ્રાન્સફર કરવા માટે કહેવામાં આવે છે.

જ્યારે પૈસા ટ્રાન્સફર થઈ જાય છે, ત્યારબાદ આ એકાઉન્ટ તરત જ બ્લોક કરી દેવામાં આવે છે અથવા સંપર્ક તોડી દેવામાં આવે છે. આ રીતે અનેક યુવાનોને રોજબરોજ છેતરવામાં આવી રહ્યા હોવાની માહિતી મળી રહી છે.

સાયબર નિષ્ણાતોના મતે, આ એકલવાયુ બનાવ નહીં પરંતુ ગેંગ દ્વારા ગોઠવાયેલ ગેરકાયદેસર પ્રવૃત્તિ છે. આ ગેંગ વિવિધ શહેરોમાંથી કામ કરી શકે છે અને એક જ સમયે અનેક લોકોને ટાર્ગેટ બનાવે છે.

આવા કેસોમાં ખાસ કરીને યુવાનો સરળતાથી લાલચમાં આવી જતા હોય છે. આથી તેમને વધુ સાવધાન રહેવાની જરૂર છે. સોશિયલ મીડિયા એક ઉપયોગી સાધન છે, પરંતુ તેની સાથે જ છેતરપિંડીના જોખમ પણ જોડાયેલા છે. સાવચેત રહેવું અને સમજદારીપૂર્વક વર્તવું જ આ સમસ્યાનો એકમાત્ર ઉપાય છે.