સિટી ન્યુઝ @ મોરબી

મોરબી જિલ્લામાં છેલ્લા 26 કલાક દરમિયાન નોંધપાત્ર વરસાદ નોંધાયો છે. મોરબી તાલુકામાં 42 મિમી એટલે કે પોણા બે ઇંચ, હળવદમાં 19 મિમી અને માળિયામાં 12 મિમી વરસાદ પડ્યો છે. જોકે, આ ઓછા વરસાદમાં પણ મોરબી શહેરના કેટલાક વિસ્તારોમાં પાણી ભરાવાના કારણે સ્થાનિક લોકોને ભારે હાલાકીનો સામનો કરવો પડ્યો હતો.

જિલ્લા કંટ્રોલ રૂમ પાસેથી મળતી સત્તાવાર માહિતી મુજબ, છેલ્લા 24 કલાકમાં માળિયા તાલુકામાં 12 મિમી, મોરબી તાલુકામાં 10 મિમી અને ટંકારા તાલુકામાં 2 મિમી વરસાદ નોંધાયો છે. આ ઉપરાંત વાંકાનેર તાલુકામાં 4 મિમી અને હળવદ તાલુકામાં 19 મિમી વરસાદ પડ્યો છે. સવારે 6 થી 8 વાગ્યાના સમયગાળા દરમિયાન મોરબી શહેરી વિસ્તારમાં જ 32 મિમી વરસાદ ખાબક્યો હતો.

મોરબી શહેરમાં સાંજથી સવાર સુધીમાં કુલ 42 મિમી વરસાદ નોંધાયો હતો. શહેરમાં આડેધડ કરાયેલા વિકાસ કાર્યો અને લેવલ વગરના રોડ-રસ્તાને કારણે નીચાણવાળા વિસ્તારો અને અનેક રહેણાંક સોસાયટીઓમાં વરસાદી પાણી ભરાઈ ગયા હતા. તંત્રની નબળી કામગીરીના કારણે માત્ર પોણા બે ઇંચ વરસાદમાં પણ લોકોને મોટી મુશ્કેલીઓનો સામનો કરવો પડી રહ્યો છે.

શહેરમાં નવા બનતા રોડ-રસ્તાઓમાં પણ યોગ્ય લેવલિંગનો સ્પષ્ટ અભાવ જોવા મળે છે. આ ખામીયુક્ત કામગીરીના કારણે વરસાદી પાણીના નિકાલમાં મોટો અવરોધ ઊભો થાય છે. પાણીનો યોગ્ય નિકાલ ન થવાથી શહેરના મુખ્ય માર્ગો પર પાણી ભરાઈ જાય છે અને વાહનચાલકો તેમજ રાહદારીઓને અહીંથી પસાર થવામાં ભારે મુશ્કેલી પડે છે.

ચાલુ વર્ષે ચોમાસા દરમિયાન મોરબી જિલ્લામાં પડેલા કુલ વરસાદના આંકડા પર નજર કરીએ તો, માળિયા તાલુકામાં 122 મિમી અને મોરબી તાલુકામાં 120 મિમી વરસાદ નોંધાયો છે. જ્યારે ટંકારા તાલુકામાં 76 મિમી, વાંકાનેર તાલુકામાં 73 મિમી અને હળવદ તાલુકામાં 80 મિમી વરસાદ અત્યાર સુધીમાં નોંધાઈ ચૂક્યો છે.

મોરબીમાં વરસાદથી રોડ રસ્તા પર પાણી ભરાયા

મોરબી શહેરમાં પડેલા પોણા બે ઇંચ વરસાદે પાલિકા તંત્રની પોલ ખોલી નાખી છે. કરોડો રૂપિયાના ખર્ચે બનેલા નવા રસ્તાઓ યોગ્ય લેવલિંગ વિના બનાવાતા નીચાણવાળા વિસ્તારોમાં જળબંબાકારની સ્થિતિ સર્જાઈ છે. લોકોના ઘરો અને દુકાનોમાં પાણી ઘૂસી જવાનો ભય સતાવી રહ્યો છે. વરસાદી પાણીના નિકાલની કોઈ યોગ્ય વ્યવસ્થા ન હોવાથી નાગરિકોમાં તંત્રની નબળી કામગીરી પ્રત્યે ભારે રોષ જોવા મળી રહ્યો છે.