• રસ્તા પર મસમોટા ખાડા અને પીવાના પાણીની અછતથી રહીશોમાં ભારે રોષ - "રોડ નહીં તો વોટ નહીં" ની ચીમકી
• પાઇપલાઇન નાખ્યા બાદ રસ્તાઓ ખોદેલા પડ્યા - ગણેશ પાર્કની ત્રણ શેરીઓમાં હજુ સુધી પાકા રોડ ન બનતા આક્રોશ
• 63,000 મતદારો ધરાવતા વોર્ડમાં શિક્ષણ અને આરોગ્યની સ્થિતિ કફોડી - ટેન્કર રાજથી રહીશો પરેશાન

રાજકોટ: રાજકોટ મહાનગરપાલિકામાં 10 વર્ષ પહેલા ભળેલા કોઠારીયા ગામ અને તેની આસપાસની સોસાયટીઓનો સમાવેશ કરતા વોર્ડ નંબર 18 માં વિકાસની વાતો માત્ર કાગળ પર જ હોય તેવું દેખાઈ રહ્યું છે. 'સિટી ન્યૂઝ' ની ટીમે જ્યારે આ વિસ્તારની મુલાકાત લીધી ત્યારે લોકોએ તંત્ર અને નેતાઓ સામે ભારે આક્રોશ વ્યક્ત કર્યો હતો. કોઠારીયા ચોકડીના નાળા પાસે મસમોટા ખાડાઓને કારણે વાહનચાલકો જીવના જોખમે અવરજવર કરી રહ્યા છે. ચોમાસામાં અહીં વરસાદી પાણી ભરાઈ જવાની સમસ્યા વર્ષો જૂની હોવા છતાં તેનું કાયમી નિરાકરણ આવ્યું નથી.

વોર્ડમાં આવેલી ગણેશ પાર્ક, તિરુપતિ બાલાજી પાર્ક અને રંગીલા પાર્ક જેવી સોસાયટીઓમાં DI પાઇપલાઇન નાખવા માટે મહિનાઓ પહેલા રસ્તાઓ ખોદવામાં આવ્યા હતા, જે હજુ સુધી રીપેર કરવામાં આવ્યા નથી. શીતળાની ધાર પાસે રહેતા રહીશોના ઘરે તો પાણીની પાઇપલાઇન જ પહોંચી નથી, જેના કારણે લોકોએ બારેમાસ ટેન્કર પર નિર્ભર રહેવું પડે છે. સ્થાનિકોનું કહેવું છે કે જ્યારે મતની જરૂર હોય ત્યારે નેતાઓ દોડી આવે છે, પરંતુ ચૂંટણી જીત્યા બાદ પાંચ વર્ષ સુધી તેઓ વિસ્તારની મુલાકાત લેવાની તસ્દી પણ લેતા નથી.

શિક્ષણ અને આરોગ્યની દ્રષ્ટિએ પણ આ વોર્ડ પછાત જોવા મળ્યો છે. 63,000 થી વધુ મતદારો હોવા છતાં અહીં એક પણ અંગ્રેજી માધ્યમની સરકારી શાળા કે અત્યાધુનિક લાઇબ્રેરી નથી. ગરીબ અને મધ્યમ વર્ગના પરિવારોએ મજબૂરીમાં ખાનગી શાળાઓમાં તોતિંગ ફી ભરીને બાળકોને ભણાવવા પડે છે. મનોહરસિંહ પરમાર નામના રહીશે જણાવ્યું કે, સરકારી શાળાઓમાં ભોજનના મેનુમાં પણ અનિયમિતતા છે. અહીં સરકારી આરોગ્ય કેન્દ્ર ભાડાના મકાનમાં ચાલે છે અને તે પણ અઠવાડિયામાં માત્ર એક જ દિવસ ખુલે છે, જે તંત્રની ઘોર બેદરકારી દર્શાવે છે.

રાજકીય પક્ષો વચ્ચે વિકાસના આંકડાઓને લઈને ખેંચતાણ ચાલી રહી છે. ભાજપના પૂર્વ કોર્પોરેટર 225 કરોડના કામો થયાનો દાવો કરે છે, જ્યારે કોંગ્રેસના પૂર્વ કોર્પોરેટર નિલેશ મારુએ 175 કરોડના કામો કર્યા હોવાની વાત કરી છે. બીજી તરફ, આમ આદમી પાર્ટીના ઉમેદવારોએ આક્ષેપ કર્યો છે કે 10 બાય 10 ની આંગણવાડીમાં 100 થી વધુ બાળકો ભણવા મજબૂર છે. નેતાઓના આ આંકડાકીય જંગ વચ્ચે સામાન્ય જનતા ખાડા, ગંદકી અને પાણીની સમસ્યામાં પીસાઈ રહી છે.

સ્થાનિક મહિલાઓએ ચીમકી ઉચ્ચારી છે કે જો આગામી સમયમાં રસ્તા અને પાણીના પ્રશ્નો હલ નહીં થાય તો તેઓ ચૂંટણીનો બહિષ્કાર કરશે. કોઠારીયા સોલ્વેન્ટ ફાટક પાસે થતો ટ્રાફિક અને રેલવે સ્ટેશનની ખખડધજ હાલત પણ રહીશો માટે મોટી મુસીબત બની છે. લોકો હવે એવા ઉમેદવારની શોધમાં છે જે માત્ર વાયદા નહીં પણ જમીની સ્તરે કામ કરે. રાજકોટના આ મહત્વના વોર્ડમાં હવે જનતા પરિવર્તન માંગે છે કે જૂની સત્તા પર ભરોસો રાખે છે તે જોવું રહ્યું.