• આ નિયમ આ જ શૈક્ષણિક સત્રથી તમામ શાળાઓ પર લાગુ થશે.

• સરકારી, ખાનગી અને અર્ધસરકારી શાળાઓમાં આ નીતિ અમલી બનશે.

• અગાઉ 2020 ના રેગ્યુલેશન્સમાં માત્રા નક્કી ન હોવાથી મુશ્કેલી હતી.

સિટી ન્યુઝ @ નવી દિલ્હી

નવી દિલ્હી, દેશમાં દિન-પ્રતિદિન મેદસ્વી થઈ રહેલા બાળકોની સ્વાસ્થ્ય સમસ્યાઓને લઈને હવે કેન્દ્ર સરકારે ગંભીર ચિંતા વ્યક્ત કરી છે. સરકારે દેશમાં પહેલીવાર બાળકોના ખાન-પાનમાં કેલરી અને સુગરની મહત્તમ માત્રા કાયદાકીય રીતે નક્કી કરી દીધી છે. આ નવા નિયમ હેઠળ દેશની કોઈપણ શાળા કે શૈક્ષણિક પરિસરમાં નિર્ધારિત મર્યાદા મુજબ જ ખાદ્ય પદાર્થોમાં કેલરી અને સુગર રાખવામાં આવશે, જેથી બાળકોના સ્વાસ્થ્યનું રક્ષણ થઈ શકે.

આ મહત્વપૂર્ણ નિર્ણય હેઠળ હવે શાળાની કેન્ટીન કે કેફેમાં પિઝા, બર્ગર અને કોલ્ડ ડ્રિંક્સ જેવી હાઈ કેલરીવાળી જંક ફૂડ વસ્તુઓનું વેચાણ કરી શકાશે નહીં. કેન્દ્ર સરકાર આ નિયમોને ટૂંક સમયમાં જ કડકાઈથી લાગુ કરવા જઈ રહી છે અને આ નિયમ આજ શૈક્ષણિક સત્રથી જ દેશની તમામ ખાનગી, સરકારી અને અર્ધસરકારી શાળાઓ પર લાગુ થઈ જશે. આ નવા દાયરામાં દેશભરના આશરે 24.69 કરોડ બાળકો સીધા આવરી લેવામાં આવશે.

અગાઉ ફૂડ સેફ્ટી એન્ડ સ્ટેન્ડર્ડ્સ રેગ્યુલેશન્સ 2020 અંતર્ગત માત્ર હાઈ કેલરી અને હાઈ સુગર ન આપવાની સામાન્ય સલાહ આપવામાં આવતી હતી, પરંતુ તેની ચોક્કસ માત્રા નક્કી ન હોવાને કારણે નિયમભંગ કરનાર સામે કોઈ કડક કાનૂની કાર્યવાહી કરી શકાતી નહોતી. હવે પ્રતિ 100 ગ્રામ દીઠ પ્રવાહી અને ઘન પદાર્થો માટે સ્પષ્ટ માત્રા નક્કી કરી દેવામાં આવી છે, જેથી આ મર્યાદા કરતાં વધુ પ્રમાણ હોવા પર સંબંધિત જવાબદારો સામે કડક દંડાત્મક પગલાં લઈ શકાશે.

બાળકોમાં નાની વયે વધતી બિમારીઓ અને સ્થૂળતાને અટકાવવા માટે શાળાઓમાં પૌષ્ટિક આહારની ઉપલબ્ધતા સુનિશ્ચિત કરવી એ આ યોજનાનો મુખ્ય ઉદ્દેશ્ય છે. વાલીઓ અને આરોગ્ય વિશેષજ્ઞો દ્વારા સરકારના આ પગલાને આવકારવામાં આવ્યું છે.

આગામી સમયમાં શૈક્ષણિક સંસ્થાઓએ આ તમામ ધોરણોનું પાલન કરવું અનિવાર્ય બનશે, જે દેશના ભવિષ્ય સમાન બાળકોના સ્વાસ્થ્ય માટે એક દીર્ઘદ્રષ્ટિવાળું અને સકારાત્મક પગલું સાબિત થશે.