સિટી ન્યૂઝ @ અમદાવાદ : અમદાવાદના સરદાર વલ્લભભાઈ પટેલ ઈન્ટરનેશનલ કાર્ગો એરપોર્ટ પરથી એક અત્યંત ચોંકાવનારી અને સુરક્ષા સામે સવાલ ઉઠાવતી ઘટના પ્રકાશમાં આવી છે. અમદાવાદથી બેંગ્લોર મોકલવામાં આવેલું 2.58 કરોડ રૂપિયાની કિંમતના સોનાના દાગીનાનું પાર્સલ રહસ્યમય રીતે ગાયબ થઈ ગયું છે. આ ગંભીર મામલે લોજિસ્ટિક્સ કંપનીએ આકાશા એરલાઇન્સ વિરુદ્ધ બેદરકારી અને વિશ્વાસઘાતની પોલીસ ફરિયાદ નોંધાવતા એરપોર્ટ વર્તુળોમાં ભારે ચકચાર મચી ગઈ છે.

મળતી માહિતી મુજબ, ન્યુ રાણીપના રહેવાસી અને લોજિસ્ટિક્સ કંપનીમાં સિક્યોરિટી મેનેજર તરીકે ફરજ બજાવતા રીછપાલસિંઘ રાઠોડે આ મામલે સત્તાવાર ફરિયાદ દાખલ કરી છે. ઘટનાની વિગત એવી છે કે, ગત 18 Aprilના રોજ એક પ્રતિષ્ઠિત જ્વેલર્સ દ્વારા સોનાના દાગીનાના કુલ 7 પાર્સલ બેંગ્લોર મોકલવા માટે કંપનીને સોંપવામાં આવ્યા હતા. ગુમ થયેલા એક કિંમતી પાર્સલનું વજન આશરે 13 કિલો હતું, જેમાં 2 કિલો 107 ગ્રામ અને 562 મિલીગ્રામ સોનાના શુદ્ધ દાગીના હતા, જેની બજાર કિંમત અંદાજે 2.58 કરોડ રૂપિયા આંકવામાં આવી છે.

તપાસમાં જાણવા મળ્યું છે કે આ કિંમતી પાર્સલ આકાશા એરની ફ્લાઈટ નંબર QP-1901 મારફતે અમદાવાદથી બેંગ્લોર રવાના કરવામાં આવ્યા હતા. લોજિસ્ટિક્સ કંપનીએ 18 Aprilના રોજ વહેલી સવારે 2:15 વાગ્યે અમદાવાદ કાર્ગો એરપોર્ટ પર એરલાઇન્સના સ્ટાફને તમામ 7 પાર્સલ યોગ્ય તપાસ બાદ સોંપ્યા હતા અને તેની કાયદેસરની પહોંચ પણ મેળવી હતી. જોકે, જ્યારે આ ફ્લાઈટ બેંગ્લોર લેન્ડ થઈ અને ત્યાં કાર્ગોની ડિલિવરી લેવામાં આવી ત્યારે આશ્ચર્યજનક રીતે માત્ર 6 જ પાર્સલ મળી આવ્યા હતા.

આ ઘટના બાદ જ્યારે લોજિસ્ટિક્સ કંપનીએ એરલાઇન્સના સ્ટાફનો સંપર્ક કર્યો ત્યારે અત્યંત વિરોધાભાસી જવાબો મળ્યા હતા. અમદાવાદ ખાતેના એરલાઇન્સ સ્ટાફે દાવો કર્યો હતો કે તેમણે તમામ 7 પાર્સલ ફ્લાઈટમાં લોડ કરી દીધા છે, જ્યારે બેંગ્લોર ખાતેના સ્ટાફે માત્ર 6 જ પાર્સલ રિસીવ થયા હોવાનું જણાવી હાથ ઊંચા કરી દીધા હતા. લાંબી પૂછપરછ અને આંતરિક તપાસ બાદ પણ આકાશા એર કંપની દ્વારા આ 2.58 કરોડના ગુમ થયેલા પાર્સલ અંગે કોઈ સંતોષકારક જવાબ આપવામાં આવ્યો ન હતો.

અંતે, કંપનીનો કિંમતી માલ મેળવી તેને નિયત સ્થળે ન પહોંચાડી છેતરપિંડી કરવા બદલ એરલાઇન્સ વિરુદ્ધ ગુનો નોંધવામાં આવ્યો છે. એરપોર્ટ જેવા હાઈ-સિક્યોરિટી ઝોનમાંથી આટલી મોટી કિંમતનું સોનું ગાયબ થવું એ એરલાઇન્સના ગ્રાઉન્ડ સ્ટાફ કે લોડિંગ પ્રોસેસમાં રહેલી ક્ષતિ તરફ આંગળી ચીંધે છે. હાલમાં પોલીસ એરપોર્ટના CCTV ફૂટેજ અને લોડિંગ સમયના ડેટાની ઝીણવટભરી તપાસ કરી રહી છે જેથી આ રહસ્યમય ચોરીનો ભેદ ઉકેલી શકાય.