• એસ.ટી. નિગમે ઈનહાઉસ સોફ્ટવેર કર્યું અપગ્રેડ – વિદ્યાર્થીઓ અને નોકરિયાત વર્ગને મોટી રાહત
• QR કોડ સ્કેન કરીને કરી શકાશે ઓનલાઈન પેમેન્ટ – ૨ લાખથી વધુ મુસાફરોને સીધો ફાયદો
• સ્વનિર્ભર ટેકનોલોજીનો ઉપયોગ – ઓનલાઈન અરજી કર્યા બાદ ગમે તે ડેપો પરથી પાસની પ્રિન્ટ મેળવી શકાશે

ગુજરાત રાજ્ય માર્ગ વાહન વ્યવહાર નિગમ (GSRTC) દ્વારા મુસાફરોની સુવિધામાં વધારો કરતા એક અત્યંત મહત્વપૂર્ણ નિર્ણય લેવામાં આવ્યો છે. છેલ્લા કેટલાક સમયથી ટેકનિકલ કારણોસર સ્થગિત કરવામાં આવેલી ઓનલાઈન પાસ સેવાની સુવિધા હવે નવા અને અપગ્રેડેડ ઇનહાઉસ સોફ્ટવેર સાથે ફરી કાર્યરત કરવામાં આવી છે. આ નિર્ણયથી ખાસ કરીને રાજકોટ સહિત રાજ્યભરના તેવા ૨ લાખથી વધુ મુસાફરોને મોટી રાહત મળશે જેઓ દૈનિક ધોરણે એસ.ટી. બસમાં અપ-ડાઉન કરે છે.

નિગમ દ્વારા તૈયાર કરવામાં આવેલી આ નવી સિસ્ટમ સંપૂર્ણપણે 'સ્વનિર્ભર ટેકનોલોજી' પર આધારિત છે. અગાઉ આ સેવા બંધ થવાને કારણે વિદ્યાર્થીઓ અને નોકરિયાત વર્ગે મેન્યુઅલ પદ્ધતિથી પાસ કઢાવવા માટે બસ સ્ટેશનો પર કલાકો સુધી લાંબી કતારોમાં ઊભા રહેવું પડતું હતું. પરંતુ હવે મુસાફરો પોતાના મોબાઈલ દ્વારા ઘરે બેઠા જ પાસ માટે અરજી કરી શકશે. આ નવી સિસ્ટમમાં ડિજિટલ પેમેન્ટ પર ખાસ ભાર મૂકવામાં આવ્યો છે, જેમાં મુસાફરો ક્યુઆર (QR) કોડ સ્કેન કરીને યુપીઆઈ દ્વારા સરળતાથી ચુકવણી કરી શકશે.

GSRTC ના અધિકારીઓના જણાવ્યા મુજબ, ઓનલાઈન પ્રક્રિયા પૂર્ણ થયા બાદ મુસાફરો તેમની નજીકના કોઈપણ એસ.ટી. બસ સ્ટેશન પરથી પાસની પ્રિન્ટ મેળવી શકશે. ઇનહાઉસ સોફ્ટવેર હોવાથી જો ભવિષ્યમાં કોઈ ટેકનિકલ સમસ્યા સર્જાય તો નિગમના એન્જિનિયરો જ તેનું ઝડપથી નિવારણ લાવી શકશે. આનાથી સિસ્ટમમાં વધુ પારદર્શિતા આવશે અને મુસાફરોનો કિંમતી સમય પણ બચશે.

ખાસ કરીને લોકલ અને એક્સપ્રેસ બસોમાં મુસાફરી કરતા લોકો માટે આ સુવિધા આશીર્વાદ સમાન છે. ડિજિટલ ઇન્ડિયાના અભિયાનને વેગ આપતા એસ.ટી. નિગમના આ કદમથી મુસાફરોમાં ભારે ઉત્સાહ જોવા મળી રહ્યો છે. હવે મુસાફરો કોઈપણ ખચકાટ વગર ઓનલાઈન પોર્ટલ પર જઈને રજીસ્ટ્રેશન કરાવી શકશે અને તેમની સફરને વધુ સુખદ અને સરળ બનાવી શકશે.