સિટી ન્યુઝ @ નવી દિલ્હી

કેનેડાના આલ્બર્ટા પ્રાંતમાં આવેલા કેનેડિયન ફોર્સિસ બેઝ વેનરાઈટ ખાતે લાગેલી ભીષણ આગમાં 4 લોકોના મોત થયા છે અને અનેક લોકો ઘાયલ થયા છે. સંરક્ષણમંત્રી ડેવિડ મેકગિન્ટીએ આ દુર્ઘટનાની પુષ્ટિ કરી છે. ભારે પવનના કારણે આગ ઝડપથી ફેલાતા સૈન્ય મથક અને આસપાસના ગ્રામ્ય વિસ્તારોમાં ભયનો માહોલ સર્જાઈ ગયો હતો.

આગની ગંભીરતાને ધ્યાનમાં રાખીને બચાવદળો અને અગ્નિશામક કર્મચારીઓએ મોડી રાત સુધી જહેમત ઉઠાવી હતી. ઘાયલોને વેનરાઈટ અને એડમન્ટન શહેરની હોસ્પિટલોમાં ખસેડાયા હતા. દર્દીઓની સંખ્યા વધી જવાથી આરોગ્ય સેવાઓ પર ભારે દબાણ આવ્યું હતું અને અનેક હોસ્પિટલોએ કોડ ઓરેન્જ જાહેર કર્યો હતો. એમ્બ્યુલન્સની અછતને કારણે હેલિકોપ્ટર અને વિમાનો દ્વારા દર્દીઓને અન્યત્ર ખસેડાયા હતા.

રોયલ કેનેડિયન માઉન્ટેડ પોલીસ આઘાતજનક ઘટનાની તપાસ કરી રહી છે. સૈન્ય અધિકારીઓએ જણાવ્યું કે અસરગ્રસ્ત પરિવારોને જાણ કર્યા બાદ જ જાનહાનિની સત્તાવાર વિગતો જાહેર કરાશે. વેનરાઈટના મેયર બ્રુસ પ્યુએ સ્થાનિક આરોગ્યકર્મીઓની કામગીરીની પ્રશંસા કરી હતી. મોડી રાત સુધીમાં આગ પર કાબૂ મેળવવાની દિશામાં પ્રગતિ થઈ હતી અને મહત્વના માળખા સુરક્ષિત હોવાનું મનાય છે.

વેનરાઈટ સૈન્ય મથક કેનેડાના મુખ્ય તાલીમ કેન્દ્રોમાં 1 છે, જ્યાં સૈનિકોને યુદ્ધની પરિસ્થિતિઓ માટે તૈયાર કરાય છે. આ દુર્ઘટના અંગે કેનેડાના વડા પ્રધાન માર્ક કાર્ની અને આલ્બર્ટાના મુખ્ય મંત્રી ડેનિયલ સ્મિથે ઊંડા દુઃખની લાગણી વ્યક્ત કરી હતી. પડોશી પ્રાંત સાસ્કેચેવાને પણ આ મુશ્કેલ સમયમાં મદદ મોકલવાની તૈયારી દર્શાવી હતી.

આ ભીષણ આગની દુર્ઘટનાને કારણે અલ્બર્ટામાં યોજાનારા લોકમત પૂર્વેના મતદાન પર પણ મોટી અસર પડી હતી, જેના પગલે સુરક્ષા અને વ્યવસ્થા જાળવવા માટે 2 મતદાન મથકો નિર્ધારિત સમય કરતાં વહેલા બંધ કરવાની ફરજ પડી હતી.

સૈન્ય મથકની સુરક્ષા પર સવાલ: આગે વેર્યો સર્નાસો!

કેનેડાના અતિ સુરક્ષિત ગણાતા વેનરાઈટ સૈન્ય બેઝ પર લાગેલી ભીષણ આગે માત્ર જાનમાલનું જ નુકસાન નથી કર્યું, પરંતુ સૈન્ય મથકોની આંતરિક સુરક્ષા વ્યવસ્થા સામે પણ ગંભીર સવાલો ખડા કર્યા છે. જ્યારે મુખ્ય તાલીમ કેન્દ્રોમાં જ આવી કુદરતી કે માનવસર્જિત આપત્તિઓ બેકાબૂ બની જાય અને હોસ્પિટલોમાં ઈમરજન્સી જાહેર કરવી પડે, ત્યારે તંત્રની કટોકટી વ્યવસ્થાપન ક્ષમતાની પોલ ખુલી જતી હોય છે.