સિટી ન્યુઝ @ અયોધ્યા

ભારતીય ક્રિકેટ ટીમના પૂર્વ દિગ્ગજ ઓપનિંગ બેટ્સમેન વીરેન્દ્ર સેહવાગે અયોધ્યા ધામની મુલાકાત લઈને ભવ્ય રામ મંદિર તેમજ સુપ્રસિદ્ધ શ્રી હનુમાનગઢી મંદિરમાં વિશેષ પૂજા-અર્ચના કરી દર્શનનો લાભ લીધો હતો. 47 વર્ષીય પૂર્વ ક્રિકેટરે સૌથી પહેલાં રામ જન્મભૂમિ પરિસરમાં પહોંચીને વિધિવત રીતે રામલલ્લાના ચરણોમાં શીશ ઝુકાવી આશીર્વાદ મેળવ્યા હતા.

ત્યારબાદ તેઓ અયોધ્યાના ઐતિહાસિક હનુમાનગઢી મંદિરે પહોંચ્યા હતા, જ્યાં તેમણે સંકટમોચન હનુમાનજી મહારાજની વિશેષ આરતી અને દર્શન કર્યા હતા. આ પાવન આધ્યાત્મિક યાત્રા પૂર્ણ કર્યા બાદ સેહવાગે પોતાની મુલાકાતની સુંદર તસવીરો અને વીડિયો સોશિયલ મીડિયા પર શેર કર્યા હતા. તેમણે ભાવુક પોસ્ટમાં લખ્યું હતું કે, "એક હી નારા, એક હી નામ, જય શ્રી રામ, જય શ્રી રામ. અયોધ્યામાં હનુમાનજીના દર્શન કરવાની મારી લાંબા સમયની પ્રતીક્ષાનો આખરે સુખદ અંત આવ્યો છે. કેટલીક મુસાફરી માઇલોના અંતરથી નહીં, પરંતુ તમારી અંદર જે આધ્યાત્મિક જાગૃતિ આવે છે તેનાથી માપવામાં આવે છે."

સેહવાગના આગમન પર મંદિર ટ્રસ્ટના પદાધિકારીઓ અને સ્થાનિક ભક્તો દ્વારા તેમનું ઉષ્માભર્યું સ્વાગત કરવામાં આવ્યું હતું. રામ મંદિરના પ્રાણ-પ્રતિષ્ઠા મહોત્સવ બાદ અયોધ્યા દેશનું મુખ્ય આધ્યાત્મિક કેન્દ્ર બની ગયું છે, જ્યાં વિવિધ ક્ષેત્રોના દિગ્ગજો સતત દર્શનાર્થે આવી રહ્યા છે. હાલમાં સફળ કમેન્ટેટર તરીકે સક્રિય સેહવાગની આ શ્રદ્ધાભરી મુલાકાતને સોશિયલ મીડિયા પર તેમના પ્રશંસકો દ્વારા ખૂબ જ બિરદાવવામાં આવી રહી છે.

વીરેન્દ્ર સેહવાગે અયોધ્યામાં પૂજા-અર્ચના કરી

ભારતના પૂર્વ વિસ્ફોટક બેટ્સમેન વીરેન્દ્ર સેહવાગે અયોધ્યામાં રામલલ્લા અને હનુમાનગઢીમાં બજરંગબલીના દર્શન કરી આશીર્વાદ મેળવ્યા હતા. તેમણે સોશિયલ મીડિયા પર તસવીરો શેર કરતાં જણાવ્યું કે હનુમાનજીના દર્શનની તેમની આતુરતાનો અંત આવ્યો છે. મંદિર પરિસરમાં સ્થાનિક ભક્તોએ તેમનું ભવ્ય સ્વાગત કર્યું હતું.