• ગલેશ્વર ઝાંપા પાસે વહેલી સવારે દ્રષ્ટિ પ્રોવિઝન સ્ટોર ખાખ – 4 લાખનું નુકસાન, ષડયંત્રની આશંકા
• મધરાતે 4 વાગ્યે આગના ગોટેગોટા ઉડ્યા – ફાયર બ્રિગેડે માંડ કાબૂ મેળવ્યો, પોલીસ તપાસ શરૂ.
• સફાઈ કામદારોના ઝાડુના જથ્થા સહિત લાખોનો માલ સામાન બળીને રાખ – MGVCL એ વીજ પુરવઠો કાપ્યો

વડોદરાના ફતેપુરા વિસ્તારમાં મંગલેશ્વર ઝાંપા નજીક આવેલ એક પ્રોવિઝન સ્ટોરમાં આજે 9 એપ્રિલની વહેલી સવારે લાગેલી ભીષણ આગે અનેક સવાલો ઉભા કર્યા છે. 'દ્રષ્ટિ પ્રોવિઝન સ્ટોર' નામની આ દુકાનમાં આશરે સાડા ચાર વાગ્યાના અરસામાં અચાનક આગ ભભૂકી ઉઠી હતી. જોતજોતામાં આગે વિકરાળ સ્વરૂપ ધારણ કરી લેતા આસપાસના રહીશોમાં ફફડાટ ફેલાયો હતો. આ ઘટનામાં દુકાનદારને લાખોનું નુકસાન થયું છે, પરંતુ દુકાન માલિકે આ આગ 'લગાડવામાં આવી હોવાની' આશંકા વ્યક્ત કરતા મામલો ગરમાયો છે.

સંગમ ચાર રસ્તા પાસે રહેતા અનિલ સોલંકી છેલ્લા 20 વર્ષથી મંગલેશ્વર ઝાંપા પાસે આ પ્રોવિઝન સ્ટોર ચલાવે છે. વહેલી સવારે એક સ્થાનિક યુવકે તેમને ફોન કરીને દુકાનમાં આગ લાગી હોવાની જાણકારી આપી હતી. તેઓ જ્યારે પહોંચ્યા ત્યારે ફાયર બ્રિગેડની ટીમ પાણીનો મારો ચલાવી રહી હતી. આગ વધુ ફેલાય નહીં તે માટે MGVCL ની ટીમે તાત્કાલિક વિસ્તારનો વીજ પુરવઠો બંધ કરી દીધો હતો. આગ પર કાબૂ તો મેળવી લેવાયો, પરંતુ દુકાનમાં રહેલો તમામ સામાન બળીને રાખ થઈ ગયો હતો.

દુકાન માલિક અનિલભાઈએ મીડિયા સમક્ષ આક્ષેપ કરતા જણાવ્યું હતું કે, "આ આગ લાગી નથી, પણ કોઈએ લગાડી છે. અગાઉ પણ મારી દુકાનમાં બે વખત તાળા તૂટ્યા છે અને ચોરી થઈ છે. અમને અહીંથી હટાવવા માટે આ કાવતરું હોઈ શકે છે." દુકાનમાં પ્રોવિઝનલ સામાનની સાથે સાથે કોર્પોરેશનના સફાઈ કામદારો માટે રાખેલા મોટા પ્રમાણમાં ઝાડુનો જથ્થો પણ હતો, જે આગમાં હોમાઈ ગયો છે. માલિકના મતે આશરે સાડા ત્રણથી ચાર લાખ રૂપિયાનું નુકસાન થયું છે.

ઘટનાની જાણ થતા જ પોલીસ કાફલો પણ સ્થળ પર પહોંચ્યો હતો. આ વિસ્તાર સંવેદનશીલ હોવાથી અને માલિક દ્વારા ગંભીર આક્ષેપો કરાયા હોવાથી પોલીસે એફએસએલ (FSL) ની મદદ લેવાની તજવીજ હાથ ધરી છે. શું આ આગ શોર્ટ સર્કિટથી લાગી છે કે પછી કોઈ અસામાજિક તત્વોએ જાણીજોઈને આગ લગાવી છે, તે હવે તપાસનો વિષય છે. પોલીસે આસપાસના સીસીટીવી ફૂટેજ પણ તપાસવાની કામગીરી શરૂ કરી છે.

શહેરમાં છેલ્લા કેટલાક સમયથી મિલકતના વિવાદોમાં આગ લગાડવાની ઘટનાઓ ચર્ચામાં છે, ત્યારે ફતેપુરાની આ ઘટનાએ વેપારીઓમાં ચિંતા જન્માવી છે. અનિલભાઈએ માંગ કરી છે કે આ મામલે તટસ્થ તપાસ કરવામાં આવે અને જો કોઈએ જાણીજોઈને નુકસાન કર્યું હોય તો તેમની સામે કડક કાર્યવાહી કરવામાં આવે.