સિટી ન્યુઝ @ મોરબી

મોરબી, મોરબી જિલ્લાના હળવદ તાલુકાના જૂના દેવળીયા ગામે ગ્રામજનોએ ભાજપના નેતાઓ અને ઉમેદવારોની ગામમાં પ્રવેશબંધી કરી દીધી છે. ખેડૂતોએ ઉત્સાહપૂર્વક ઢોલ-નગારા સાથે ગામના પ્રવેશદ્વાર પર આ અંગેનું વિરોધ દર્શાવતું બેનર લગાવ્યું હતું. આ અનોખો વિરોધ મોરબીના જેતપર ગામે છેલ્લા ત્રણ મહિનાથી ચાલી રહેલા ખેડૂત આંદોલનના ભાગરૂપે સામે આવ્યો છે, જ્યાં ખેડૂતો ખાનગી વીજ કંપનીના વીજપોલ અને કોરિડોર સામે પૂરતા વળતરની માંગ કરી રહ્યા છે.

સરકાર દ્વારા નવી વળતર નીતિ જાહેર કરવામાં આવી હોવા છતાં ખેડૂતોએ તેનો સ્પષ્ટ અસ્વીકાર કર્યો છે. ખેડૂતોનું કહેવું છે કે જ્યાં સુધી તેમની માંગણી મુજબ યોગ્ય અને પૂરતું વળતર નહીં મળે, ત્યાં સુધી તેમનું આંદોલન અવિરત ચાલુ રહેશે. જેતપર આંદોલન સમિતિના સભ્યોએ જણાવ્યું છે કે ખેડૂતોએ પોતાની વ્યાજબી માંગણીઓ સરકાર સુધી પહોંચાડી છે, પરંતુ સંતોષકારક નિર્ણય ન આવવાથી ખેડૂતોમાં ભારે રોષ ફેલાયો છે.

આ રોષના ભાગરૂપે હવે ધીમે ધીમે મોરબી જિલ્લાના આશરે ૫૦ જેટલા ગામોમાં ભાજપના વિરોધમાં આવા બેનરો લાગી ચૂક્યા છે. ખેડૂતોએ કડક શબ્દોમાં ચેતવણી આપી છે કે જો આગામી ૨૦૨૭ની વિધાનસભા ચૂંટણી પહેલા ખેડૂતોના આ પ્રશ્નનો કાયમી ઉકેલ લાવવામાં નહીં આવે, તો ભાજપના ઉમેદવારો અને પક્ષના આગેવાનોએ ગામમાં મત માંગવા માટે આવવું નહીં.

અગાઉ જે ભાજપને ઉત્સાહપૂર્વક આવકારતા હતા તે જ ખેડૂતો હવે પૂરતા વળતરની માંગણી સાથે આંદોલનના માર્ગે વળ્યા છે, જેના કારણે સ્થાનિક રાજકારણમાં પણ ગરમાવો આવી ગયો છે.

ખેડૂત આંદોલન અને ગ્રામીણ રોષ

ગ્રામીણ વિસ્તારોમાં વિકાસના પ્રોજેક્ટ્સ અને વીજ કોરિડોર સામે યોગ્ય વળતરની માંગને લઈને ઉઠતો અસંતોષ એ પ્રશાસન અને રાજકીય પક્ષો માટે એક મોટો પડકાર બની રહે છે.