સિટી ન્યુઝ @ પેરીસ

પશ્ચિમ યુરોપ હાલમાં કાળઝાળ ગરમી અને 'હીટ ડોમ'ની ભયાનક અસર હેઠળ શેકાઈ રહ્યું છે. ફ્રાન્સ, બ્રિટન, સ્પેન અને ઈટાલી જેવા દેશોમાં તાપમાનનો પારો 40 ડિગ્રી સેલ્સિયસને પાર કરી ગયો છે અને આગામી દિવસોમાં તે 44 ડિગ્રી સુધી પહોંચવાની ચેતવણી હવામાન નિષ્ણાતોએ આપી છે. અસાધારણ ગરમીને પગલે અનેક દેશોમાં સામાન્ય જનજીવન ખોરવાઈ ગયું છે, જ્યારે ફ્રાન્સમાં ગરમીથી બચવા પાણીમાં ઉતરેલા 40 લોકોના ડૂબી જવાથી મોત થયા છે, જેમાં મોટાભાગના યુવાનો છે.

ફ્રાન્સમાં સ્થિતિ એટલી ગંભીર છે કે અડધા દેશમાં રેડ એલર્ટ જાહેર કરવામાં આવ્યું છે અને 1,350 સ્કૂલો બંધ કરી દેવામાં આવી છે. ગરમીને કારણે નદીનું પાણી એટલું ગરમ થઈ ગયું છે કે સુરક્ષાના કારણોસર પરમાણુ રિએક્ટર પણ બંધ કરવાની ફરજ પડી છે. ફ્રાન્સના રાષ્ટ્રીય થર્મલ ઈન્ડિકેટરમાં 29.8 ડિગ્રી સે.નું વિક્રમી તાપમાન નોંધાયું છે, જે ઓગસ્ટ 2003 અને જુલાઈ 2019ના રેકોર્ડ કરતા પણ વધુ છે. યુરોપીયન યુનિયનની ક્લાઈમેટ સર્વિસના મતે, યુરોપ વિશ્વનો સૌથી ઝડપથી ગરમ થતો ખંડ બની ગયો છે, જ્યાં તાપમાન વૈશ્વિક સરેરાશ કરતા બમણી ઝડપે વધી રહ્યું છે.

બ્રિટનમાં જુલાઈ 2022 પછી બીજીવાર રેડ હેલ્થ વોર્નિંગ જાહેર કરવામાં આવી છે. હેલ્થ સિક્યોરિટી એજન્સીએ ચેતવણી આપી છે કે ગરમી એટલી ગંભીર છે કે સ્વસ્થ લોકોના જીવન માટે પણ ખતરો ઊભો થઈ શકે તેમ છે. આ આત્યંતિક ગરમીની અસર પરિવહન, ઊર્જા પુરવઠા અને વ્યવસાયો પર પણ જોવા મળી રહી છે. વિશ્વ આરોગ્ય સંસ્થાના અહેવાલ મુજબ, છેલ્લા ચાર વર્ષમાં યુરોપમાં ગરમી સંબંધિત કારણોથી બે લાખ લોકોના મોત થયા છે, જે ક્લાઈમેટ ચેન્જની ભયાનકતાને સ્પષ્ટ કરે છે.

ક્લાઈમેટ ચેન્જની ભયાનકતા અને સાવચેતી વૈશ્વિક તાપમાનમાં થઈ રહેલો વધારો હવે માત્ર આંકડાકીય ચિંતા નથી, પરંતુ માનવ અસ્તિત્વ માટે મોટો ખતરો બની ગયો છે. યુરોપમાં જોવા મળતી આ સ્થિતિ સાબિત કરે છે કે ક્લાઈમેટ ચેન્જની અસરો હવે ભવિષ્યની નહીં, પણ વર્તમાનની વાસ્તવિકતા છે. આવી સ્થિતિમાં વહીવટી તંત્ર દ્વારા આપવામાં આવતી ચેતવણીઓને ગંભીરતાથી લેવી, પૂરતું પાણી પીવું અને તાપમાનના સૌથી વધુ સમય દરમિયાન ઘરની બહાર નીકળવાનું ટાળવું એ જીવન બચાવવા માટેનો શ્રેષ્ઠ ઉપાય છે. પર્યાવરણનું જતન એ હવે વિકલ્પ નહીં, પણ અનિવાર્યતા છે.