પોલીસના ચુસ્ત બંદોબસ્ત વચ્ચે દબાણોનો સફાયો; મુખ્ય આરોપી રિઝવાન અને સમીરના 2 દિવસના રિમાન્ડ મંજૂર

300 પોલીસ જવાનોની હાજરીમાં ડિમોલિશન; કોર્ટ પરિસર છાવણીમાં ફેરવાયું, હવે પૂછપરછમાં થશે મોટા ઘટસ્ફોટ

યુવકના મોતના રોષ વચ્ચે અસામાજિક તત્ત્વોમાં ફફડાટ; કોર્ટે 10 દિવસના બદલે 2 દિવસના રિમાન્ડ મંજૂર કર્યા

ધંધુકા પંથકમાં યુવકની હત્યા બાદ ફાટી નીકળેલા રોષ અને તણાવપૂર્ણ સ્થિતિને ડામવા માટે આજે વહીવટી તંત્ર દ્વારા અભૂતપૂર્વ કાર્યવાહી કરવામાં આવી છે. આજે ૨૧મી એપ્રિલના રોજ વહેલી સવારથી જ ખાટકી વાડ વિસ્તારમાં પોલીસના ચુસ્ત બંદોબસ્ત વચ્ચે આરોપીઓ અને અસામાજિક તત્ત્વોના ગેરકાયદે દબાણો પર બુલડોઝર ફેરવી દેવામાં આવ્યું છે.

દબાણોનો સફાયો અને સઘન બંદોબસ્ત ગત ૧૮મી એપ્રિલના રોજ ધર્મેશ ગમારા નામના યુવકની હત્યા બાદ સમગ્ર પંથકમાં ભારે તણાવ હતો. સ્થિતિ વણસે નહીં તે માટે તંત્રએ આજે ખાટકી વાડમાં ઓપરેશન હાથ ધરી ૪ થી વધુ ગેરકાયદે મકાનો તોડી પાડ્યા હતા. આ કામગીરી દરમિયાન ૩૦૦ પોલીસ જવાનો, નગરપાલિકા અને માર્ગ-મકાન વિભાગના ૫૦થી વધુ કર્મચારીઓ તહેનાત રહ્યા હતા. તંત્રએ હવે હાઇવે પરના ગેરકાયદે દબાણો અને લારી-ગલ્લાઓ સામે પણ ઝુંબેશ ચલાવવાના સંકેત આપ્યા છે.

આરોપીઓના ૨ દિવસના રિમાન્ડ બીજી તરફ, મુખ્ય આરોપી રિઝવાન અને સમીરને કડક સુરક્ષા વચ્ચે કોર્ટમાં રજૂ કરવામાં આવ્યા હતા. પોલીસે આરોપીઓના ૧૦ દિવસના રિમાન્ડની માંગણી કરી હતી, પરંતુ બંને પક્ષોની દલીલો સાંભળ્યા બાદ કોર્ટે આરોપીઓના ૨ દિવસના રિમાન્ડ મંજૂર કર્યા છે. આગામી ૪૮ કલાક દરમિયાન પોલીસ આ હત્યા પાછળના મુખ્ય ષડયંત્ર અને અન્ય સંડોવાયેલા શખ્સો અંગે સઘન પૂછપરછ કરશે. હત્યાના આ મામલે સમગ્ર ગુજરાતની નજર પોલીસ તપાસ પર મંડાયેલી છે.