• ધરણા પ્રદર્શન: વડોદરા શહેર કોંગ્રેસે મહાત્મા ગાંધી નગરગૃહ ખાતે 'લોકશાહી બચાવો' કાર્યક્રમ યોજ્યો.

• ગંભીર આક્ષેપ: વિમલ શાહે ભાજપ પર પોલીસતંત્ર અને ગુંડાગીરી દ્વારા ફોર્મ ખેંચાવ્યાનો આરોપ મૂક્યો.

• ષડયંત્ર: ઋત્વિજ જોષીએ ભાજપ પર કોંગ્રેસના ઉમેદવારોને ધમકાવી બિનહરીફ થવાનો કારસો ઘડ્યાનો આક્ષેપ કર્યો.

   

ગુજરાતમાં સ્થાનિક સ્વરાજ્યની ચૂંટણીઓ ટાણે રાજકીય માહોલ ઉગ્ર બન્યો છે. વડોદરામાં લોકશાહીના મૂલ્યોની હત્યા થઈ રહી હોવાના આક્ષેપ સાથે શહેર કોંગ્રેસ દ્વારા મહાત્મા ગાંધી નગરગૃહ ખાતે 'લોકશાહી બચાવો' ધરણાં કાર્યક્રમ યોજવામાં આવ્યો હતો. આ કાર્યક્રમમાં મધ્ય ગુજરાતના પ્રભારી રામકિશન ઓઝા અને વડોદરાના પ્રભારી વિમલ શાહ સહિતના અગ્રણી નેતાઓએ હાજરી આપી ભાજપ સરકાર પર આકરા પ્રહારો કર્યા હતા. કોંગ્રેસના કાર્યકરોએ 'હિટલરશાહી નહીં ચલેગી' અને 'લોકશાહી બચાવો' ના નારાથી વાતાવરણ ગજવી દીધું હતું.

ધરણા દરમિયાન વડોદરાના પ્રભારી વિમલ શાહે જણાવ્યું હતું કે, ભારતીય જનતા પાર્ટી સમગ્ર ગુજરાતમાં પોતાની હાર ભાળી ગઈ છે. હારના ડરથી ભાજપ હવે પોલીસ અને સરકારી તંત્રનો આશરો લઈ રહી છે. તેમણે આક્ષેપ કર્યો હતો કે ગુંડાગીરીનો ઉપયોગ કરીને કોંગ્રેસના ઉમેદવારોના ફોર્મ જબરદસ્તીથી પરત ખેંચાવવામાં આવી રહ્યા છે. ગાંધી અને સરદારના ગુજરાતમાં સત્તાના જોરે લોકશાહીનું ગળું ઘોંટવાની આ ઘટના અત્યંત શરમજનક છે અને જનતા આ અન્યાયને જોઈ રહી છે.

વડોદરા શહેર કોંગ્રેસ પ્રમુખ ઋત્વિજ જોષીએ આક્રોશ વ્યક્ત કરતા કહ્યું હતું કે, ભાજપ સામ-દામ-દંડ-ભેદની નીતિ અપનાવી રહી છે. કોંગ્રેસના ઉમેદવારોને ક્યાંક લાલચ તો ક્યાંક ધાકધમકી આપીને બિનહરીફ જીતવાનો કારસો ઘડવામાં આવ્યો છે. તેમણે વધુમાં ઉમેર્યું કે દેશ અત્યારે ફરી એકવાર ગુલામી તરફ જઈ રહ્યો હોય તેમ લાગે છે, કારણ કે બંધારણીય સંસ્થાઓનો ખુલ્લેઆમ દુરુપયોગ થઈ રહ્યો છે. આ પરિસ્થિતિમાં બીજી આઝાદીની લડત લડવી અનિવાર્ય બની ગઈ છે.

વોર્ડ નંબર 2 માં ઉમેદવારી ફોર્મ પરત ખેંચવાની પ્રક્રિયા બાબતે ઋત્વિજ જોષીએ પુરાવા રજૂ કરતા સવાલ ઉઠાવ્યો હતો. તેમણે જણાવ્યું કે જ્યારે ફોર્મ ખેંચાયું ત્યારે રિટર્નિંગ ઓફિસરની કેબિનમાં ભાજપના નેતાઓ અને કોર્પોરેટરોની હાજરી શું સૂચવે છે? આ આખી પ્રક્રિયાના વિડિયો ફૂટેજ પણ મીડિયા સમક્ષ રજૂ કરવામાં આવ્યા છે. કોંગ્રેસના મતે, વડોદરાની જનતા પરિવર્તન ઈચ્છે છે અને ભાજપ વિરોધી માહોલને ડામવા માટે સત્તાધારી પક્ષ ગેરકાનૂની માર્ગો અપનાવી રહ્યો છે.

કોંગ્રેસના નેતાઓએ સ્પષ્ટ કર્યું છે કે આ લડત માત્ર ધરણા પૂરતી સીમિત રહેશે નહીં. ભાજપના ષડયંત્રો સામે કાયદાકીય લડત પણ લડવામાં આવશે. આગામી દિવસોમાં જનતાની વચ્ચે જઈને ભાજપની આ 'હિટલરશાહી' ને ખુલ્લી પાડવામાં આવશે. વડોદરાની જનતાએ આ વખતે પરિવર્તનનું મન બનાવી લીધું છે અને સત્તાનો દુરુપયોગ કરનારાઓને ચૂંટણીમાં જડબાતોડ જવાબ મળશે તેવો વિશ્વાસ કોંગ્રેસના અગ્રણીઓએ વ્યક્ત કર્યો હતો.