સિટી ન્યુઝ @ હૈદરાબાદ

અમેરિકામાં ઉચ્ચ અભ્યાસ માટે જતા ભારતીય વિદ્યાર્થીઓ માટે એક અત્યંત ચિંતાજનક કિસ્સો સામે આવ્યો છે, જેમાં હૈદરાબાદના એક વિદ્યાર્થીને ઍમ્સ્ટરડેમ ઍરપૉર્ટ પર જાણવા મળ્યું હતું કે તેના F-1 વિઝા એક વર્ષ પહેલાં જ રદ થઈ ચૂક્યા છે. વિદ્યાર્થી ન્યૂયોર્ક જવા નીકળ્યો હતો, પરંતુ ટ્રાન્ઝિટ દરમિયાન તેને પ્રવેશની મંજૂરી ન મળતા છેવટે ભારત પરત ફરવું પડ્યું હતું. આ ઘટનાએ એ સાબિત કર્યું છે કે માત્ર પાસપોર્ટ પર વિઝાનું સ્ટિકર હોવું પૂરતું નથી, પરંતુ તેનું સ્ટેટસ સતત અપડેટ રહેવું અત્યંત આવશ્યક છે.

છેલ્લા કેટલાક સમયમાં હજારો વિદ્યાર્થીઓના SEVIS રેકોર્ડ ટર્મિનેટ થયા હોવાના અહેવાલો છે. અમેરિકન દૂતાવાસના જણાવ્યા અનુસાર, અભ્યાસ અધવચ્ચે છોડી દેવો, નિયમિત વર્ગમાં ગેરહાજર રહેવું અથવા યુનિવર્સિટીની પૂર્વ મંજૂરી વગર કોર્સ બદલવો એ વિઝા રદ થવાના મુખ્ય કારણો છે. ઘણીવાર યુનિવર્સિટીઓ દ્વારા સ્ટેટસમાં ફેરફાર કરાય છે, પરંતુ વિદ્યાર્થીઓને તેની સમયસર જાણ થતી નથી, જેનું પરિણામ તેમને એરપોર્ટ પર ભોગવવું પડે છે.

ઇમિગ્રેશન નિષ્ણાતો વિદ્યાર્થીઓને સલાહ આપે છે કે તેઓ મુસાફરીના આયોજન પહેલાં પોતાનો SEVIS રેકોર્ડ સક્રિય છે કે નહીં તેની અચૂક તપાસ કરે. આ ઉપરાંત, યુનિવર્સિટીના Designated School Official (DSO) સાથે સતત સંપર્કમાં રહેવું અને I-20 સહિતના તમામ દસ્તાવેજો અપડેટ રાખવા ખૂબ જરૂરી છે. વિદ્યાર્થીઓએ પોતાની મુસાફરીની યોજના બનાવતા પહેલા જ પોતાના વિઝા અને SEVIS સ્ટેટસની સમયાંતરે ચકાસણી કરી લેવી જોઈએ જેથી કરીને છેલ્લી ઘડીએ કોઈ પણ મુશ્કેલી કે આર્થિક નુકસાનથી બચી શકાય.

વિઝા સુરક્ષા માટે માર્ગદર્શિકા

વિદેશમાં ભણવા જવું એ એક મોટું આયોજન છે, પરંતુ કાયદાકીય પાસાંઓની અવગણના તમારા કરિયરને જોખમમાં મૂકી શકે છે. વિદ્યાર્થીઓએ ખાસ નોંધવું જોઈએ કે વિઝા મળ્યા પછી પણ તેમની જવાબદારી પૂરી થતી નથી. નિયમિત ક્લાસમાં હાજરી, યુનિવર્સિટીના તમામ નિયમોનું પાલન અને એડમિનિસ્ટ્રેટિવ કામગીરીમાં સજાગતા એ જ તમારી વિઝા સ્ટેટસને સુરક્ષિત રાખવાનો એકમાત્ર રસ્તો છે. કોઈપણ ફેરફારના કિસ્સામાં સત્તાવાર સૂચનાની રાહ જોવાને બદલે વિદ્યાર્થીઓએ જાતે જ નિયમિતપણે પોર્ટલ પર પોતાનું સ્ટેટસ તપાસતા રહેવું જોઈએ.