• ૪ વર્ષથી પ્રેમી સાથે રહેતી પરિણીતાએ પિયરમાં ઝેરી દવા પી જીવન ટૂંકાવ્યું, ઘોઘારોડ પોલીસ મથકે ગુનો દાખલ
• છેલ્લા એક વર્ષથી પ્રેમી દારૂ પીને ઢોર માર મારતો હોવાનો માતાની ફરિયાદમાં ચોંકાવનારો આક્ષેપ
• ભાવનગરના સુભાષનગરની વર્ષા સોસાયટી વિસ્તારમાં બનેલી ઘટનાથી અરેરાટી વ્યાપી

સિટી ન્યુઝ @ ભાવનગર

 ભાવનગર શહેરના સુભાષનગર વિસ્તારમાં પ્રેમી સાથે લિવ-ઈન રિલેશનશિપમાં રહેતી એક પરિણીતાને તેના પ્રેમી દ્વારા અવારનવાર કરાતી શારીરિક-માનસિક કૂટણી અને ત્રાસનો અત્યંત કરૂણ અંત આવ્યો છે. નરાધમ પ્રેમીએ "હું તને હવે મારી સાથે રાખવાનો નથી" તેમ કહીને કડવા વેણ બોલી સતત મરી જવા માટે ઉશ્કેરણી કરતાં આખરે કંટાળીને પરિણીતાએ પિયરમાં જઈને ઝેરી દવા પી જીવન ટૂંકાવી લીધું છે. સારવાર દરમિયાન પરિણીતાનું મોત નીપજતાં, આ ગંભીર મામલે મૃતકની ૪૯ વર્ષીય માતાએ હિંમત દાખવીને ઘોઘારોડ પોલીસ મથકમાં પ્રેમી વિરૂદ્ધ આત્મહત્યાની દુષ્પ્રેરણાનો સત્તાવાર ગુનો નોંધાવ્યો છે.

બનાવની વિગત એવી છે કે, ભાવનગરના સુભાષનગર વિસ્તારની સ્વાસ્થ સોસાયટીમાં રહેતા લાભુબેન ચંદુભાઈ ચૌહાણ (ઉં.વ. ૪૯) એ ઘોઘારોડ પોલીસ મથકમાં ફરિયાદ નોંધાવી છે. ફરિયાદ અનુસાર, તેમની મોટી દીકરી હિનાબેનના લગ્ન વર્ષ ૨૦૦૯માં શહેરના ખેડૂતવાસમાં રહેતા સંજયભાઈ ગુજરીયા સાથે થયા હતા. આ લગ્નજીવનથી તેમને ૧૭ વર્ષની દીકરી અને ૧૪ વર્ષનો દીકરો પણ છે. જોકે, આશરે ૪ વર્ષ પહેલાં પતિ સાથે મનમેળ ન રહેતાં અને હિનાને વિશાલ ભનુભાઈ કંટારીયા (રહે. રામવાડી, ખેડૂતવાસ) સાથે પ્રેમ સંબંધ બંધાતાં, તે પોતાના બે માસૂમ સંતાન અને પતિને છોડીને સુભાષનગરમાં પ્રેમી વિશાલ સાથે રહેવા જતી રહી હતી.

માતા લાભુબેને અવારનવાર હિનાને સમજાવીને તેના સાસરે મોકલી હતી, પરંતુ તે દર વખતે ઝઘડો કરીને વિશાલ પાસે જ પરત દોડી જતી હતી. શરૂઆતમાં બધું બરાબર ચાલ્યા બાદ છેલ્લા એકાદ વર્ષથી પ્રેમી વિશાલ કંટારીયા અસલી રંગમાં આવ્યો હતો. તે અવારનવાર દારૂ પીને હિના સાથે વગર કારણે ગંભીર મારકૂટ કરતો હતો અને વારંવાર મહેણાં મારીને કહેતો કે, "તું ગમે તેમ કરીને મરી જા, હું તને હવે મારી સાથે નહીં રાખું." પ્રેમીના આ રોજ-રોજના ત્રાસ અને ધિક્કારથી હિના માનસિક રીતે તદ્દન ભાંગી પડી હતી.

આ ત્રાસથી કંટાળીને ગત ૨૦ એપ્રિલના રોજ સવારે હિનાબેને પોતાના પિયરના ઘર પાસે આવીને ઝેરી દવા ગટગટાવી લીધી હતી. તેમને ગંભીર હાલતમાં ભાવનગરની સર ટી. હોસ્પિટલ ખાતે ખસેડવામાં આવ્યા હતા, જ્યાં ૨૨ એપ્રિલના રોજ સારવાર દરમિયાન તેમનું મૃત્યુ નીપજ્યું હતું. દીકરીના મોતના આઘાતમાંથી બહાર આવ્યા બાદ માતાએ ૧૦ જૂનના રોજ ફરિયાદ નોંધાવતા પોલીસે આરોપી વિશાલ સામે ભારતીય ન્યાય સંહિતા (BNS) ની કલમ ૧૦૮ અને ૧૧૫(૨) મુજબ ગુનો દાખલ કરી કાયદેસરની કાર્યવાહી હાથ ધરી છે.

પ્રેમ સંબંધોનું વરવું ચિત્ર અને કાનૂની સંજગ સંસારના સુખ અને માસૂમ સંતાનોની મમતા છોડીને પ્રેમીના ભરોસે ગયેલી સ્ત્રીને આખરે મોતનો રસ્તો પસંદ કરવો પડ્યો, જે સમાજ માટે લાલબત્તી સમાન કિસ્સો છે. ઘોઘારોડ પોલીસે નવી કલમો હેઠળ ગુનો નોંધીને ફરાર થઈ ગયેલા બૂટલેગર અને અત્યાચારી પ્રેમી વિશાલને પકડવા તપાસના ચક્રો ગતિમાન કર્યા છે જેથી મૃતક મહિલાને ન્યાય મળી શકે.