• ચૂંટાયેલી પાંખની મુદત પૂર્ણ થતા અધિકારી શાસન શરૂ - કલેક્ટર કેતન ઠક્કર જિલ્લા પંચાયતના વહીવટદાર.
• પદભાર સંભાળતા જ ઉચ્ચ અધિકારીઓ સાથે બેઠકનો ધમધમાટ - પડતર પ્રશ્નો ઉકેલવા આદેશ.
• લોકશાહીની મુદત પૂરી, વહીવટી તંત્રના પાવર વધ્યા - વિકાસલક્ષી કાર્યોને ગતિ આપવા રોડમેપ તૈયાર.

જામનગર: જામનગર મહાનગરપાલિકા અને જિલ્લા પંચાયતના ચૂંટાયેલા પ્રતિનિધિઓની પાંચ વર્ષની મુદત પૂર્ણ થતાં જ વહીવટીતંત્રમાં મોટો ફેરફાર જોવા મળ્યો છે. રાજ્ય સરકાર દ્વારા વહીવટદારોની નિમણૂક કરવામાં આવતા જામનગરમાં હવે અધિકારી શાસનનો પ્રારંભ થયો છે. મહાનગરપાલિકાના વહીવટદાર તરીકે નિયુક્ત થયેલા આરતી કંવરે આજે જામનગર પહોંચીને પોતાનો કાર્યભાર વિધિવત રીતે સંભાળી લીધો છે.

આરતી કંવરે મનપા કચેરી ખાતે પદભાર સંભાળતાની સાથે જ એક્શન મોડમાં જોવા મળ્યા હતા. તેમણે મ્યુનિસિપલ કમિશનર અને અન્ય વિભાગીય વડાઓ સાથે વિસ્તૃત બેઠક યોજી હતી. આ બેઠકમાં શહેરના રસ્તા, પાણી, ગટર જેવી પાયાની સુવિધાઓ તેમજ ચાલુ વર્ષના બજેટના પડતર વિકાસકામો અંગે સમીક્ષા કરવામાં આવી હતી. તેમણે અધિકારીઓને સ્પષ્ટ સૂચના આપી છે કે ચૂંટાયેલી પાંખની ગેરહાજરીમાં પ્રજાને કોઈ હાલાકી ન પડવી જોઈએ અને તમામ ફાઈલોનો સમયસર નિકાલ થવો જોઈએ.

બીજી તરફ, જામનગર જિલ્લા પંચાયતની મુદત પણ પૂર્ણ થઈ હોવાથી જિલ્લા કલેક્ટર કેતન ઠક્કરની વહીવટદાર તરીકે વરણી કરવામાં આવી છે. કલેક્ટર ઠક્કર હવે જિલ્લાના ગ્રામીણ વિસ્તારોના વિકાસ અને વહીવટની સીધી દેખરેખ રાખશે. આજે બંને વહીવટદારો - આરતી કંવર અને કેતન ઠક્કર - એ મનપા કમિશનર સાથે સંયુક્ત બેઠક યોજીને શહેર અને જિલ્લા વચ્ચેના વહીવટી સંકલનને મજબૂત કરવા પર ભાર મૂક્યો હતો.

અનુભવી અધિકારીઓના હાથમાં વહીવટ સોંપાતા જામનગરના વિકાસકામોમાં નવી ગતિશીલતા અને પારદર્શિતા આવશે તેવી અપેક્ષા રાખવામાં આવી રહી છે. હવેથી મનપા અને જિલ્લા પંચાયતના તમામ નીતિવિષયક નિર્ણયો ચૂંટાયેલા પદાધિકારીઓને બદલે આ વહીવટદારો દ્વારા લેવામાં આવશે.