• મહામંડલેશ્વર હરિહરાનંદ ભારતીના સાનિધ્યમાં સમાધિ પૂજન અને ભવ્ય સંત ભંડારો યોજાયો.
• વિશ્વંભર ભારતી બાપુની નિર્વાણ તિથિએ ઉમટ્યું ભક્તજનનું ઘોડાપૂર - રાત્રે નામી કલાકારો રેલાવશે સૂર.
• ફાગણ વદ ચૌદશના પવિત્ર દિવસે ગુરુમહિમાનું ગાન - સાધુ-સંતો માટે મહાપ્રસાદનું સુંદર આયોજન.

જૂનાગઢ: ગિરનારની પવિત્ર તપોભૂમિ આજે ગુરુમહિમાના ગાનથી ગુંજી ઉઠી છે. વર્ષ 2021 માં બ્રહ્મલીન થયેલા અને લાખો ભક્તોના હૃદયમાં સ્થાન ધરાવતા મહામંડલેશ્વર વિશ્વંભર ભારતી બાપુની આજે પાંચમી પુણ્યતિથિ ભક્તિભાવ પૂર્વક ઉજવવામાં આવી રહી છે. જૂનાગઢ સ્થિત ભારતી આશ્રમ ખાતે વર્તમાન મહંત હરિહરાનંદ ભારતી બાપુના માર્ગદર્શન હેઠળ વહેલી સવારથી જ વિવિધ ધાર્મિક કાર્યક્રમોનો પ્રારંભ થયો છે.

કાર્યક્રમની શરૂઆત વહેલી સવારે ગુરુદેવની સમાધિ પર શાસ્ત્રોક્ત વિધિ મુજબ પૂજન અને અભિષેક સાથે કરવામાં આવી હતી. ત્યારબાદ આશ્રમમાં ભવ્ય ગુરુ આરતી યોજાઈ હતી, જેમાં મોટી સંખ્યામાં શ્રદ્ધાળુઓ અને સાધુ-સંતોએ જોડાઈને ધન્યતા અનુભવી હતી. બપોરના સમયે ગિરનારના રમતા સાધુઓ અને વિવિધ અખાડાના સંતો માટે વિશાળ 'સંત ભંડારા'નું આયોજન કરવામાં આવ્યું છે, જ્યાં હજારો ભાવિકો મહાપ્રસાદ ગ્રહણ કરશે.

સેવા અને શિક્ષણના પ્રણેતા બ્રહ્મલીન ભારતી બાપુએ આજીવન 'ભજન, ભોજન અને શિક્ષણ'ના મંત્રને સાર્થક કર્યો હતો. જૂનાગઢ અને સરખેજ આશ્રમમાં તેમણે શરૂ કરેલા અવિરત અન્નક્ષેત્રો આજે પણ હજારો જરૂરિયાતમંદોની જઠરાગ્નિ તૃપ્ત કરી રહ્યા છે. બાપુ માનતા હતા કે શિક્ષણ વગર સમાજનું ઉત્થાન અશક્ય છે, આથી જ તેમણે અનેક શૈક્ષણિક પ્રવૃત્તિઓને વેગ આપ્યો હતો.

રાત્રે જામશે સંતવાણીની હેલી આજના પવિત્ર દિવસના ઉપલક્ષમાં રાત્રે વિશાળ સંતવાણી કાર્યક્રમનું આયોજન કરવામાં આવ્યું છે. જેમાં ગુજરાતના નામી કલાકારો ગુરુ મહિમા અને ભક્તિ પદો રજૂ કરશે. મહામંડલેશ્વર હરિહરાનંદ ભારતી બાપુએ જણાવ્યું હતું કે, "ગુરુ એ જ્ઞાનનો પ્રકાશ છે જે અજ્ઞાનતાના અંધકારને દૂર કરે છે. ભારતી બાપુના આશીર્વાદ અને તેમના દર્શાવેલા સેવાના માર્ગ પર ચાલવા માટે આ આયોજન કરવામાં આવ્યું છે."

સમગ્ર ગિરનાર તળેટી વિસ્તારમાં આજે આધ્યાત્મિક ઉર્જાનો સંચાર જોવા મળી રહ્યો છે. ભક્તો પોતાના આરાધ્ય ગુરુદેવની પાંચમી પુણ્યતિથિએ તેમના ચરણોમાં શીશ ઝુકાવી ધન્ય બની રહ્યા છે.