સિટી ન્યુઝ @ ભાવનગર

ભાવનગરના ઘોઘારોડ વિસ્તારમાં આવેલી કૈલાશ સોસાયટીમાં ઠપકો આપ્યાની સામાન્ય બાબતે એક જ પરિવાર પર જીવલેણ હુમલો થયાની ઘટના સામે આવી છે. ગત 9 જૂનની રાત્રે આશરે 10:30 વાગ્યે જૂની અદાવત રાખીને 5 શખ્સોએ માતા, પુત્ર અને પુત્રી પર લોખંડના પાઇપ તથા લાકડાના ધોકા વડે હિંસક હુમલો કર્યો હતો. આ ગંભીર ઘટનામાં ઇજાગ્રસ્ત થયેલા ત્રણેય સભ્યોને તાત્કાલિક સારવાર માટે સર ટી. હોસ્પિટલ ખસેડવામાં આવ્યા છે. હુમલાખોરોએ ઘરમાં ઘૂસીને આતંક મચાવતા સમગ્ર વિસ્તારમાં ચકચાર મચી ગઈ છે.

બનાવની વિગતો અનુસાર, કૈલાશ સોસાયટીના પ્લોટ નંબર 56 માં રહેતા 21 વર્ષીય હરેશ દિહોરાની બહેન ઘરે એકલી હતી ત્યારે પ્રવીણ દિહોરા ત્યાં આવ્યો હતો અને બોલાચાલી કરી હતી. આ બાબતે હરેશના માતા નંદુબેન પ્રવીણના ઘરે ઠપકો આપવા ગયા હતા. આ ઠપકાની દાઝ મનમાં રાખીને રાત્રે પ્રવીણ દિહોરા, રાજુ દિહોરા અને મહેન્દ્ર દિહોરા લોખંડના પાઇપ સાથે હરેશના ઘરે ધસી આવ્યા હતા અને ગાળો આપીને માર મારવાનું શરૂ કર્યું હતું.

આ હુમલા દરમિયાન માતા અને બહેન છોડાવવા વચ્ચે પડતાં અમિત ઢાપા અને અભય ઢાપા નામના અન્ય બે શખ્સોએ લાકડાના ધોકા વડે હુમલો કરી નંદુબેન અને સુમિતાબેનને મૂંઢ ઇજાઓ પહોંચાડી હતી. હુમલો કર્યા બાદ પાંચેય શખ્સો જાનથી મારી નાખવાની ધમકી આપીને ત્યાંથી નાસી છૂટ્યા હતા. આ ઘટના અંગે હરેશની ફરિયાદના આધારે ભરતનગર પોલીસે 5 આરોપીઓ સામે BNS અને જીપી એક્ટ મુજબ કડક ગુનો નોંધીને તમામ હુમલાખોરોને ઝડપી પાડવા આગળની કાનૂની કાર્યવાહી હાથ ધરી છે.

ઠપકો આપવો ભારે પડ્યો પાડોશમાં રહેતા શખ્સને બહેન સાથે ગેરવર્તન બાબતે ઠપકો આપવા જવાનું માતાને ભારે પડ્યું હતું. સામાન્ય બોલાચાલીએ ઉગ્ર સ્વરૂપ ધારણ કરતા હુમલાખોરોએ કાયદાનો કોઈ પણ ડર રાખ્યા વિના રાત્રિના સમયે ઘરમાં ઘૂસીને મહિલાઓ પર પણ સશસ્ત્ર હુમલો કર્યો હતો. આ ઘટના દર્શાવે છે કે શહેરમાં અસામાજિક તત્વોનો આતંક અને કાયદા પ્રત્યેનો બેખોફ વલણ કેટલું વધી ગયું છે. સામાજિક શાંતિ ડહોળનારા તત્વો સામે દાખલારૂપ કાર્યવાહી થાય તે જરૂરી છે.