• ચાર્જશીટ રજૂ થતાં અને રિકવરી બાકી ન હોવાથી બચાવ પક્ષની દલીલો ગ્રાહ્ય રહી

સિટી ન્યૂઝ@રાજકોટ : રાજકોટ ઈન્કમટેક્સ વિભાગના આસિસ્ટન્ટ એકાઉન્ટ ઓફિસર રવિકુમાર જાંગીડની એસીબી (ACB) પોલીસ સ્ટેશન દ્વારા લાંચના કેસમાં ધરપકડ કરવામાં આવી હતી. આ હાઈપ્રોફાઈલ કેસમાં જેલવાસ ભોગવી રહેલા આરોપી દ્વારા જામીન પર મુક્ત થવા માટે સ્પેશિયલ એસીબી કોર્ટમાં અરજી કરવામાં આવી હતી, જેની સઘન કાનૂની સુનાવણી બાદ નામદાર અદાલતે તાજેતરમાં આરોપીને શરતી જામીન પર મુક્ત કરતો મહત્વનો હુકમ ફરમાવ્યો છે.
આ લાંચ કેસની વિગતવાર હકીકત એવી છે કે, આ કેસના ફરિયાદી એક નિવૃત્ત અધિકારી છે. તેમની નોકરીના કાર્યકાળ દરમિયાન સરકાર તરફથી મળવાપાત્ર પગાર અને એરિયર્સ બિલની માતબર રકમ મંજૂર થઈ હતી. આ રકમની સરળતાથી ચુકવણી કરવાના વહીવટ પેટે આરોપી રવિકુમાર જાંગીડે ફરિયાદી પાસે શરૂઆતમાં 80000 રૂપિયાની માતબર લાંચની માંગણી કરી હતી. જોકે, બંને પક્ષો વચ્ચે લાંબી રકઝક અને વાટાઘાટોના અંતે 50000 રૂપિયાની લાંચ આપવાનું નક્કી થયું હતું. આ નક્કી થયેલી રકમ પૈકી 5000 રૂપિયા ફરિયાદી દ્વારા આરોપીને અગાઉ જ આપી દેવામાં આવ્યા હતા. ત્યારબાદ બાકી રહેતી લાંચની રકમ 45000 રૂપિયા ફરિયાદી આપવા માંગતા ન હોવાથી, તેમણે લાંચિયા અધિકારીને પાઠ ભણાવવા સીધો એસીબીનો સંપર્ક કર્યો હતો.
ફરિયાદીની સચોટ ફરિયાદના આધારે એસીબીની ટીમે ઈન્કમટેક્સ ઓફિસની બહાર જ લાંચના છટકાનું સુવ્યવસ્થિત આયોજન કર્યું હતું. આ ટ્રેપ દરમિયાન આરોપીએ ફરિયાદી સાથે હેતુલક્ષી વાતચીત કરી હતી અને પોતાના 1 સહઆરોપી મારફત પંચની હાજરીમાં લાંચની રકમ સ્વીકારતા તે રંગેહાથ પકડાઈ ગયો હતો. જાહેર સેવક તરીકેના પોતાના જવાબદાર હોદ્દાનો સરેઆમ દુરુપયોગ કરવા અને ગુનાહિત વર્તણુક આચરવા બદલ આરોપીની ધી પ્રિવેન્શન ઓફ કરપ્શન એક્ટ 1988 ની કલમ 7, 12, 13(1) અને 13(2) જેવા ગંભીર ગુનાઓ સબબ સત્તાવાર ધરપકડ કરવામાં આવી હતી. ધરપકડ બાદ આરોપીને સ્પેશિયલ એસીબી કોર્ટમાં રજૂ કરી તપાસ અધિકારી દ્વારા રિમાન્ડની માંગણી કરાતા અદાલતે 2 દિવસના રિમાન્ડ મંજૂર કર્યા હતા અને ત્યારબાદ આરોપીને જેલ હવાલે કરવામાં આવ્યો હતો.
જેલવાસ દરમિયાન જામીન મેળવવા માટે આરોપી દ્વારા પોતાના વકીલ મારફત રાજકોટની સ્પેશિયલ એસીબી કોર્ટમાં જામીન અરજી દાખલ કરવામાં આવી હતી. આ જામીન અરજીની સુનાવણી આવતા બચાવ પક્ષના વકીલ દ્વારા ધારદાર રજૂઆત કરવામાં આવી હતી કે, અરજદાર આરોપી પાસે ફરિયાદીનું કોઈ જ કામ ફરિયાદના સમયે પેન્ડિંગ ન હતું અને ફરિયાદમાં જે પગાર-એરિયર્સની વાત છે તે રકમ પણ પહેલેથી જ ફરિયાદીને ચૂકવી આપવામાં આવી હતી. આમ, કાયદાની દ્રષ્ટિએ કરપ્શન કેસ માટેના જરૂરી આવશ્યક તત્વો આ ગુનામાં ફલિત થતા નથી તેવો બચાવ લેવામાં આવ્યો હતો. વધુમાં દલીલ કરવામાં આવી હતી કે પોલીસ તપાસ પૂર્ણ થઈ ગઈ છે, આરોપી પાસેથી કોઈ રિકવરી કે ડિસ્કવરી બાકી રહેતી નથી અને ચાર્જશીટ પણ કોર્ટમાં દાખલ થઈ ગઈ છે. બચાવ પક્ષે સુપ્રીમ કોર્ટ દ્વારા પ્રસ્થાપિત જામીન માટેના 'ત્રિપલ ટેસ્ટ' ના સિદ્ધાંતોને ટાંકીને વિવિધ ઉચ્ચ અદાલતોના ચુકાદાઓ રજૂ કરી આરોપીને જામીન આપવા ભારપૂર્વક માંગ કરી હતી.
સામે પક્ષે, સરકારી વકીલ દ્વારા આ જામીન અરજીનો સખત વિરોધ કરવામાં આવ્યો હતો. સરકાર પક્ષે દલીલ કરી હતી કે આરોપી સામે પ્રથમ દર્શનીય મજબૂત કેસ છે અને 1 સરકારી અધિકારી તરીકે તેણે અત્યંત ગંભીર ગુનો આચર્યો હોવાથી સમાજમાં ખોટો દાખલો ન બેસે તે માટે જામીન નામંજૂર કરવા જોઈએ.
ઉપરોક્ત બંને પક્ષોની લાંબી કાનૂની દલીલો સાંભળ્યા બાદ, સ્પેશિયલ એસીબી કોર્ટે બચાવ પક્ષની દલીલો અને કાયદાકીય જોગવાઈઓને માન્ય રાખીને અરજદાર આરોપીને કડક શરતોને આધીન જામીન પર મુક્ત કરતો હુકમ ફરમાવ્યો છે. આ મહત્વપૂર્ણ કેસમાં અરજદાર ઈન્કમટેક્સ અધિકારી વતી ગુજરાત હાઇકોર્ટના જાણીતા ધારાશાસ્ત્રી અપૂર્વ એન. મહેતા તથા જયદીપ એમ. કુકડિયા કાનૂની લડત માટે રોકાયેલા હતા.