• BLO ને બેવડી જવાબદારી: બૂથની અંદર અને બહાર એકસાથે ફરજ કઈ રીતે બજાવશે? – તંત્ર સામે ઉઠ્યા સવાલ
• 5,500 બૂથ પર સ્ટાફની ફાળવણીમાં ગંભીર બેદરકારી – નિવૃત્ત શિક્ષકોને પણ મેદાનમાં ઉતારવા છતાં અંધાધૂંધી
• મુખ્ય શિક્ષકોના પદની ગરિમા જળવાઈ નહીં – શિક્ષક સંઘોએ ચૂંટણી તંત્ર સમક્ષ નોંધાવ્યો ઉગ્ર વિરોધ

આગામી મ્યુનિસિપલ કોર્પોરેશન, તાલુકા પંચાયતો અને નગરપાલિકાઓની ચૂંટણીઓ માટે અમદાવાદ જિલ્લા ચૂંટણી તંત્ર અત્યારે ભારે તૈયારીઓમાં વ્યસ્ત છે. પરંતુ આ તૈયારીઓ વચ્ચે સ્ટાફની અછતને પહોંચી વળવા માટે લેવાયેલા કેટલાક નિર્ણયોએ મોટો વિવાદ છેડ્યો છે. ચૂંટણી પ્રક્રિયા પાર પાડવા માટે તંત્રને ૩૦,૦૦૦ થી વધુ કર્મચારીઓની તાતી જરૂરિયાત છે, જેના કારણે નિવૃત્ત શિક્ષકો અને બીએલઓ (BLO) ને પણ ફરજ પર લેવામાં આવ્યા છે. જોકે, આ સ્ટાફની વહેંચણીમાં થયેલી ગંભીર ભૂલોને કારણે શિક્ષણ જગતમાં રોષનો ભભૂકો બોલ્યો છે.

સૌથી વધુ ચોંકાવનારો કિસ્સો જિલ્લાના અનેક સીનિયર એચટાટ મુખ્ય શિક્ષકો અને શાળાના આચાર્યો સાથે બન્યો છે. વર્ષો સુધી શિક્ષણ આલમમાં આદરણીય પદ પર રહીને વહીવટી અનુભવ ધરાવતા આ આચાર્યોને ચૂંટણી ડ્યુટીમાં 'પટ્ટાવાળા' તરીકેની કામગીરીના ઓર્ડર પકડાવી દેવામાં આવ્યા છે. આ ઓર્ડર મળતા જ શિક્ષકોમાં ભારે નારાજગી ફેલાઈ છે. આચાર્યોનું કહેવું છે કે, ચૂંટણી કામગીરી રાષ્ટ્રહિતનું કાર્ય છે અને અમે તે કરવા તૈયાર છીએ, પરંતુ સીનિયર ક્લાસ-૨ કક્ષાના અધિકારીને વર્ગ-૪ ની કામગીરી સોંપવી એ તેમના પદ અને અનુભવનું સીધું અપમાન છે.

બીજી તરફ, જે શિક્ષકો બીએલઓ (BLO) તરીકે ફરજ બજાવી રહ્યા છે, તેમની મુસીબત પણ બેવડી થઈ છે. BLO તરીકે તેમની મુખ્ય જવાબદારી મતદાન મથકની બહાર બેસીને મતદાર યાદી ચેક કરવાની અને મતદારોને માર્ગદર્શન આપવાની હોય છે. પરંતુ નવા ઓર્ડર મુજબ તેમને બૂથની અંદર 'આસિસ્ટન્ટ પ્રિસાઇડિંગ ઓફિસર' તરીકેની જવાબદારી પણ સોંપાઈ છે. હવે પ્રશ્ન એ ઉઠ્યો છે કે એક જ કર્મચારી એકસાથે બૂથની અંદર અને બહાર એમ બંને જગ્યાએ કેવી રીતે હાજર રહી શકે? આ વિસંગતતાને કારણે ચૂંટણીના દિવસે મોટી અંધાધૂંધી સર્જાવાની શક્યતા છે.

ચૂંટણી તંત્રની આ લાચારી પાછળનું મુખ્ય કારણ બૂથની વિશાળ સંખ્યા છે. અમદાવાદ કોર્પોરેશન અને જિલ્લામાં મળીને કુલ ૫,૫૦૦ જેટલા વોટિંગ બૂથ નક્કી કરાયા છે. નિયમ મુજબ દરેક બૂથ પર પ્રિસાઇડિંગ ઓફિસર સહિત ઓછામાં ઓછા પાંચ કર્મચારીઓ હોવા જરૂરી છે. આટલી મોટી સંખ્યામાં માનવબળ ઉપલબ્ધ ન હોવાથી તંત્રએ નિવૃત્ત શિક્ષકો અને બીએલઓને બેવડી જવાબદારીઓ સોંપી દીધી છે.

શિક્ષક સંઘોએ આ બાબતે ચૂંટણી પંચ અને કલેક્ટર સમક્ષ ઉગ્ર રજૂઆતો કરી છે. સંઘની માંગ છે કે આચાર્યોને તેમની ગરિમા મુજબની કામગીરી સોંપવામાં આવે અને ઓર્ડરમાં રહેલી ભૂલો તાત્કાલિક સુધારવામાં આવે. જો ચૂંટણી તંત્ર આ મામલે યોગ્ય સુધારો નહીં કરે, તો આગામી દિવસોમાં શિક્ષકો વિરોધ પ્રદર્શન કરી શકે છે, જેની સીધી અસર ચૂંટણી પ્રક્રિયા પર પડી શકે છે. હવે જોવાનું એ રહેશે કે તંત્ર સ્ટાફની ખેંચતાણ અને શિક્ષકોના સ્વાભિમાન વચ્ચે કેવી રીતે સંતુલન જાળવે છે.