જામનગર અને દેવભૂમિ દ્વારકા જિલ્લાના સમુદ્ર કિનારે આવેલા વડિનાર બંદર માટે કેન્દ્ર સરકાર દ્વારા એક અત્યંત મહત્વપૂર્ણ નિર્ણય લેવામાં આવ્યો છે. વડિનાર ખાતે વિશ્વસ્તરીય શિપ રિપેર સુવિધા (World-Class Ship Repair Facility) સ્થાપવા માટે કેન્દ્રીય કેબિનેટે સત્તાવાર મંજૂરી આપી દીધી છે. જામનગરના સાંસદ પૂનમબેન માડમ દ્વારા આ પ્રોજેક્ટ માટે છેલ્લા લાંબા સમયથી કરવામાં આવી રહેલા સતત પ્રયાસોને અંતે સફળતા મળી છે.

આ મહત્વાકાંક્ષી પ્રોજેક્ટ દીનદયાળ પોર્ટ ઓથોરિટી (DPA) અને કોચીન શિપયાર્ડ લિમિટેડ (CSL) દ્વારા સંયુક્ત રીતે અમલમાં મૂકવામાં આવશે. આ અત્યાધુનિક સુવિધાના નિર્માણ માટે અંદાજે ₹1570 કરોડનું માતબર રોકાણ કરવામાં આવશે. આ પ્રોજેક્ટ પૂર્ણ થયા બાદ વડિનાર બંદર માત્ર સ્થાનિક જ નહીં, પરંતુ આંતરરાષ્ટ્રીય સ્તરે સમુદ્રી જહાજોના સમારકામ માટેના એક મુખ્ય કેન્દ્ર તરીકે ઉભરી આવશે, જે ભારતની સમુદ્રી ક્ષમતાને નવી ઊંચાઈ પર લઈ જશે.

આ સુવિધા શરૂ થવાથી હાલાર પંથકમાં રોજગારીનું મોટા પાયે સર્જન થશે. ખાસ કરીને સ્થાનિક યુવાનો માટે એન્જિનિયરિંગ અને ટેકનિકલ ક્ષેત્રે નવી તકો ઉભી થશે. આ ઉપરાંત, સ્થાનિક અર્થતંત્રમાં વૃદ્ધિ થશે અને પૂરક ઉદ્યોગોનો પણ વિકાસ થશે. જામનગર અને આસપાસના વિસ્તારોમાં વેપાર-ઉદ્યોગ માટે આ પ્રોજેક્ટ એક મજબૂત પીઠબળ પૂરું પાડશે.

સાંસદ પૂનમબેન માડમે આ ઐતિહાસિક નિર્ણય બદલ વડાપ્રધાન નરેન્દ્ર મોદી અને કેન્દ્રીય બંદર, શિપિંગ તથા જળમાર્ગ મંત્રી સર્બાનંદ સોનવાલનો હૃદયપૂર્વક આભાર માન્યો હતો. તેમણે જણાવ્યું હતું કે, આ પ્રોજેક્ટ સમગ્ર પ્રદેશના સર્વાંગી વિકાસ માટે 'ગેમચેન્જર' સાબિત થશે. વડિનાર બંદર ખાતે આ આધુનિક ઇન્ફ્રાસ્ટ્રક્ચર આવવાથી માત્ર જહાજોનું સમારકામ જ નહીં થાય, પરંતુ તે વૈશ્વિક મેરીટાઇમ મેપ પર ગુજરાતનું ગૌરવ વધારશે.

નિષ્ણાતોના મતે, આ સુવિધાના કારણે વિદેશી જહાજો પણ સમારકામ માટે ભારત તરફ આકર્ષિત થશે, જેનાથી વિદેશી હૂંડિયામણની પણ બચત થશે. આગામી સમયમાં પ્રોજેક્ટની કામગીરી ઝડપથી શરૂ થાય તે માટેની વહીવટી પ્રક્રિયા પણ તેજ કરી દેવામાં આવી છે. સંસ્કારી નગરી જામનગર અને દ્વારકાના દરિયાકાંઠાના વિકાસમાં આ પ્રોજેક્ટ એક નવું સીમાચિહ્ન સાબિત થશે.