સિટી ન્યુઝ @ પટના 

ઘરની બહારના આંગણ કે અગાસીને ગાર્ડનમાં ફેરવી નાખનારા ઘણા ગાર્ડનપ્રેમીઓ જોવા મળતા હોય છે, પરંતુ બિહારના પટનામાં રહેતા નરેશ અગ્રવાલે પોતાના ઘરના બાથરૂમમાં પણ એવું અદભુત પ્લાન્ટેશન કર્યું છે કે એની તસવીરો સોશિયલ મીડિયા પર ભારે ચર્ચાનો વિષય બની ગઈ છે. નરેશે બાથરૂમમાં જ્યાં-જ્યાં ખાલી જગ્યા દેખાઈ ત્યાં સુંદર પ્લાન્ટ્સ વાવી દીધા છે, જેનાથી વોશરૂમનો આખો દેખાવ જ બદલાઈ ગયો છે.

બાથરૂમની સજાવટ માટે તેમણે સામાન્ય રીતે ડ્રોઇંગ રૂમમાં જોવા મળતા સ્નેક પ્લાન્ટ, સોંગ ઓફ ઇન્ડિયા, સ્પાઇર અને સિગોનિયમ જેવા આકર્ષક છોડ વાવ્યા છે. વાસ્તવમાં વાત એમ છે કે નરેશભાઈના ઘરની છત પહેલેથી જ સેંકડો છોડથી ભરાઈ ચૂકી હતી, છતાં તેમને હરિયાળી થોડી ઓછી લાગતી હતી એટલે તેમણે ઘરમાં કૂડાં મૂક્યા અને જ્યારે ઘરમાં પણ જગ્યા ખૂટી ગઈ ત્યારે તેમણે બાથરૂમને પણ બાકી રાખ્યું ન હતું.

તેમણે બાથરૂમ અને ટોઇલેટ કોમન હોય એવા વોશરૂમ એરિયામાં માટી અને સિરામિકનાં સુંદર કૂંડાં ગોઠવ્યાં છે, પરંતુ આ ગાર્ડનનો સૌથી યુનિક પોઈન્ટ ફ્લશ ટેન્ક સાથે જોડાયેલો છે. ફ્લશ ટેન્કના કાણામાંથી નીકળે એ રીતે તેમણે પાણીમાં ઊગે એવા બે છોડ વાવ્યા છે, જેથી દરેક વખતે ફ્લશ કરવામાં આવે ત્યારે તે છોડનું પાણી આપમેળે રિપ્‍લેસ થઈ જાય છે.

બાથરૂમમાં આ પ્રકારે છોડ રાખવાથી ત્યાંની હવા કુદરતી રીતે શુદ્ધ રહે છે અને તાજગી અનુભવાય છે. પ્લાન્ટેશનનો તેમને એવો જબરદસ્ત ચસકો લાગ્યો છે કે તેઓ જ્યારે પણ મોર્નિંગ વોક માટે બહાર જાય છે, ત્યારે રસ્તામાં પણ યોગ્ય જગ્યા જોઈને નવો છોડ વાવી દે છે અને પર્યાવરણ પ્રત્યેની પોતાની જવાબદારી નિભાવે છે.

નરેશ અગ્રવાલનો આ અનોખો પ્રયોગ પ્રકૃતિપ્રેમીઓ માટે એક ઉત્તમ ઉદાહરણ પૂરું પાડે છે કે જો શોખ સાચો હોય તો મર્યાદિત જગ્યામાં પણ પ્રકૃતિને કેવી રીતે જીવંત રાખી શકાય છે.

પર્યાવરણ પ્રેમ અને ગ્રીન લાઈફસ્ટાઇલ

ઘરના ખૂણે-ખૂણે હરિયાળી ફેલાવવી અને પ્રકૃતિ સાથે જોડાવું એ માનસિક શાંતિની સાથે શારીરિક સ્વાસ્થ્ય માટે પણ અત્યંત ગુણકારી સાબિત થાય છે.