Loading Please Wait !!!
એમએસ ધોનીએ આઈપીએલમાંથી ખેલાડી તરીકે નિવૃત્તિ જાહેર કરી!

  • આગામી આઈપીએલથી ચેન્નઈ સુપર કિંગ્સના મેન્ટર બનશે ધોની!
  • અઢાર વર્ષની ઐતિહાસિક સફર બાદ ધોનીનો વિદાયનો નિર્ણય!
  • પત્ની સાક્ષીની ભાવુક પ્રતિક્રિયા અને ફેન્સનો આભાર માન્યો!

સિટી ન્યુઝ @ નવી દિલ્હી 

ભારતીય ક્રિકેટના સૌથી સફળ અને લોકપ્રિય કૅપ્ટન મહેન્દ્ર સિંહ ધોનીએ ૧૭ નવેમ્બર, ૨૦૨૬ના રોજ આઈપીએલમાંથી ખેલાડી તરીકે પોતાની નિવૃત્તિની ഔપચારિક જાહેરાત કરીને કરોડો ચાહકોને ભાવુક કરી દીધા છે.

ખેલાડી તરીકેની આ ૧૮ વર્ષની લાંબી અને ઐતિહાસિક સફર દરમિયાન ધોનીએ મેદાન પર એવા અનેક કીર્તિમાન સ્થાપિત કર્યા છે, જેને ભવિષ્યમાં કોઈપણ ખેલાડી માટે તોડવા લગભગ અશક્ય સમાન છે.

આઈપીએલમાંથી ધોનીની આ વિદાય બાદ તેમના પત્ની સાક્ષીની ભાવુક પ્રતિક્રિયા પણ સામે આવી છે, જ્યારે ખુદ માહીએ પણ સોશિયલ મીડિયા અને વિવિધ માધ્યમો દ્વારા પોતાના સમર્પિત ફેન્સનો હૃદયપૂર્વક આભાર માન્યો છે.

આગામી આઈપીએલ ૨૦૨૭થી મહેન્દ્ર સિંહ ધોની મેદાન પર બેટ પકડવાને બદલે ચેન્નઈ સુપર કિંગ્સ (CSK) ના ડગઆઉટમાં 'મેન્ટર' (માર્ગદર્શક) ની એક નવી અને જવાબદારીભરી ભૂમિકામાં જોવા મળશે.

ધોનીની આગેવાની અને તેમની આગવી રણનીતિએ ચેન્નઈની ટીમને હંમેશાં શીર્ષ પર રાખી છે, અને હવે મેન્ટર તરીકે તેઓ યુવા ખેલાડીઓને તૈયાર કરીને ફ્રેન્ચાઇઝીને વધુ મજબૂત બનાવવામાં યોગદાન આપશે.

ક્રિકેટ જગતમાં એમએસ ધોનીનું અનન્ય યોગદાન

કૅપ્ટન કૂલ તરીકે જાણીતા એમએસ ધોનીએ ભારતીય ક્રિકેટ અને આઈપીએલને જે ઊંચાઈઓ પર પહોંચાડ્યું છે, તે ઈતિહાસના પાનાઓમાં હંમેશાં સ્વર્ણિમ અક્ષરે લખાશે. ખેલાડી તરીકે વિદાય લીધા બાદ પણ તેમનું માર્ગદર્શન ક્રિકેટ પ્રેમીઓ માટે પ્રેરણારૂપ રહેશે.

ધોનીના આઈપીએલ કરિયરના 12 અવિસ્મરણીય રેકોર્ડ્સ:
1. સૌથી વધુ મેચો અને ફાઇનલ કપ્તાની :-

મહેન્દ્ર સિંહ ધોનીએ આઈપીએલના ઇતિહાસમાં કોઈપણ અન્ય ખેલાડી કરતા સૌથી વધુ 235 મેચોમાં કપ્તાની સંભાળી છે, જે આ યાદીમાં બીજા સ્થાને રહેલા રોહિત શર્મા (158 મેચ) કરતા આશરે 77 મેચ વધારે છે. તેમની અદભુત રણનીતિ અને શાંત નેતૃત્વના બળે ચેન્નાઈ સુપર કિંગ્સની ટીમ 10 વખત આઈપીએલની ફાઇનલ સુધી પહોંચી છે અને તેમાંથી 5 વખત ટ્રોફી પોતાના નામે કરવામાં સફળ રહી છે. આટલી મોટી સંખ્યામાં ફાઇનલ મેચો રમવી અને જીતાડવી એ કોઈપણ કપ્તાન માટે એક અદ્ભુત સિદ્ધિ સમાન છે.

2. આઈપીએલ જીતનાર સૌથી વરિષ્ઠ કપ્તાન :-
વર્ષ 2023માં રમાયેલી આઈપીએલ સિઝનની ફાઇનલ મેચમાં જ્યારે ધોનીએ ચેન્નાઈ સુપર કિંગ્સને પાંચમી વખત ચેમ્પિયન બનાવી ત્યારે તેમની ઉંમર 41 વર્ષ અને 326 દિવસની હતી, જેની સાથે તેઓ આ ટૂર્નામેન્ટની ઇતિહાસમાં ટ્રોફી જીતનારા સૌથી વરિષ્ઠ કપ્તાન બન્યાં હતાં. આટલું જ નહીં, ત્યારબાદના વર્ષોમાં પણ તેમણે મુશ્કેલ પરિસ્થિતિઓમાં ફિટનેસ સાબિત કરીને 43 વર્ષની વયે પણ મેચ વિનિંગ ઇનિંગ્સ રમી છે અને સાબિત કરી દીધું કે ઉંમર માત્ર એક આંકડો છે.

3. વિકેટકીપર તરીકે સૌથી વધુ રન :-
વિકેટકીપિંગની સાથેસાથે બેટિંગમાં પણ ધોનીએ ઇતિહાસ રચ્યો છે. તેમણે વિકેટકીપર તરીકે બેટિંગ કરતાં કુલ 272 આઈપીએલ મેચોમાં શાનદાર પ્રદર્શન કરીને કુલ 5,321 રન બનાવ્યાં છે. આ આંકડો ટૂર્નામેન્ટના ઇતિહાસમાં કોઈપણ અન્ય વિકેટકીપર દ્વારા બનાવાયેલાં કુલ રનમાં સર્વોચ્ચ છે, જેમાં તેઓ અન્ય દિગ્ગજ વિકેટકીપર્સ જેમ કે દિનેશ કાર્તિક કરતા પણ ઘણા આગળ છે જે તેમની લાંબી કારકિર્દીની સાક્ષી પૂરે છે.

4. 20મી ઓવરના નિર્વિવાદ બાદશાહ :-
આઈપીએલની છેલ્લી અને સૌથી રોમાંચક એટલે કે 20મી ઓવરમાં બેટિંગ કરવા માટે ધોનીનું નામ સૌથી ઉપર આવે છે. તેમણે આ ડેથ ઓવરમાં અત્યાર સુધી 347 બોલનો સામનો કરીને 243.2ના અવિશ્વસનીય સ્ટ્રાઈક રેટ સાથે કુલ 844 રન બનાવ્યાં છે અને આ એક જ ઓવરમાં કુલ 72 ગગનચુંબી છગ્ગા ફટકારીને બોલરોના દિલમાં ડર પેદા કર્યો છે, જે રેકોર્ડની આસપાસ પણ કોઈ પહોંચી શકે તેમ નથી.

5. છેલ્લી બે ઓવરોમાં સૌથી વધુ રન :-
ઇનિંગ્સની સૌથી નિર્ણાયક એવી 19મી અને 20મી ઓવરને જો મિલાવી દેવામાં આવે, તો ધોનીએ આ અંતિમ ઓવરોમાં કુલ 739 બોલ રમીને સૌથી વધુ 1,598 રન બનાવ્યા છે. આ દરમિયાન તેમના બેટમાંથી 117 શાનદાર છગ્ગા આવ્યા છે, જે દર્શાવે છે કે ઇનિંગ્સના અંતિમ ચરણમાં જ્યારે રન રેટ વધારવાની સખત જરૂર હોય ત્યારે ધોની પોતાની ટીમ માટે સૌથી મોટા મેચ વિનર સાબિત થયા છે.

6. અજેય ફિનિશર અને 100 નોટ-આઉટ :-
ધોનીને વિશ્વના સર્વશ્રેષ્ઠ ફિનિશર કેમ માનવામાં આવે છે તેનું જીવંત ઉદાહરણ તેમના આંકડા છે. તેમણે આઈપીએલ ઇતિહાસમાં 31 સફળ રન ચેઝમાં અજેય રહીને પોતાની ટીમને જીત અપાવી છે. આ ઉપરાંત, મે 2025માં તેઓ આઈપીએલ ઇતિહાસમાં 100 નોટ-આઉટ ઇનિંગ્સ રમનારા ટૂર્નામેન્ટના પ્રથમ બેટર બન્યાં હતા, જે તેમની પીચ પર ટકી રહેવાની અદ્ભુત ક્ષમતા દર્શાવે છે.

7. વિનિંગ શોટ ફટકારનાર અગ્રણી બેટર :-
જ્યારે પણ ચેઝ કરતી વખતે મેચ જીતવાની છેલ્લી ક્ષણો આવે છે ત્યારે ધોનીએ હંમેશા મોરચો સંભાળ્યો છે. આઈપીએલના રન ચેઝમાં સૌથી વધુ 18 વખત વિનિંગ રન ધોનીના બેટથી આવ્યા છે, અને ખાસ વાત એ છે કે તેમાંથી 15 વખત વિનિંગ હિટ સીધી 20મી ઓવરમાં જ આવી છે. આ મામલામાં રાહુલ તેવટિયા જેવા ખેલાડીઓ પણ તેમનાથી ઘણા પાછળ છે.

8. ખેલાડી તરીકે સૌથી વધુ આઈપીએલ જીત :-
એક ખેલાડી તરીકે મેદાન પર ઉતરીને સૌથી વધુ મેચો જીતવાનો રેકોર્ડ પણ ધોનીના નામ પર બોલે છે. તેમણે પોતાના લાંબા કરિયરમાં કુલ 156 આઈપીએલ મેચોમાં જીત મેળવી છે. આ ઉપરાંત, ટૂર્નામેન્ટમાં સૌથી વધુ 11 ફાઇનલ મેચો રમવી અને 28 પ્લેઓફ મુકાબલા રમવાનો અનોખો રેકોર્ડ પણ તેમણે પોતાના નામે કર્યો છે, જે કોઈપણ ફ્રેન્ચાઇઝી માટે અમૂલ્ય છે.

9. સદી વિના સૌથી વધુ રન :-
આઈપીએલ ક્રિકેટના ઇતિહાસમાં 5,439 જેટલા વિશાળ રન બનાવવા છતાં ધોનીના નામે આ ટૂર્નામેન્ટમાં એક પણ સદી નોંધાયેલી નથી. તેઓ આઈપીએલ ઇતિહાસમાં સદી ફટકાર્યા વિના સૌથી વધુ રન બનાવનાર નંબર વન બેટર છે, જેનો સર્વોચ્ચ વ્યક્તિગત સ્કોર અણનમ 84 રન છે જે તેમણે રોયલ ચેલેન્જર્સ બેંગલુરુ સામે ફાસ્ટેસ્ટ રન બનાવતી વખતે નોંધાવ્યો હતો.

10. ચેન્નાઈ સુપર કિંગ્સના મુખ્ય રન-સ્કોરર :-
ધોની અને ચેન્નાઈ સુપર કિંગ્સનો સંબંધ માત્ર એક ટીમ અને ખેલાડી પૂરતો મર્યાદિત નથી, પરંતુ તે એક ભાવના છે. સીએસકે ફ્રેન્ચાઇઝી માટે ધોનીએ 4,865 રન બનાવ્યાં છે અને ટીમ માટે સૌથી વધુ 248 મેચો રમનારા તેઓ એકમાત્ર ખેલાડી છે. સુરેશ રૈના જેવા દિગ્ગજોને પાછળ છોડીને તેમણે ચેન્નાઈની આખી ઓળખ પોતાના નામે કરી લીધી છે.

11. વિકેટકીપર તરીકે સૌથી વધુ શિકાર અને સ્ટમ્પિંગ :-
બેટિંગ અને કપ્તાનીની સાથેસાથે વિકેટની પાછળ ધોનીની આંખોથી બચીને નીકળવું કોઈપણ બેટર માટે અસંભવ રહ્યું છે. તેમણે વિકેટ પાછળ કુલ 201 શિકાર કર્યા છે, જેમાં અત્યાર સુધીના ઇતિહાસમાં સૌથી વધુ 47 સ્ટમ્પિંગ અને 158 કેચ સામેલ છે. તેમની આંખના પલકારામાં થતી વીજળીનાં ચમકારા જેવી ફાસ્ટ સ્ટમ્પિંગ દુનિયાભરનાં ક્રિકેટ જગતમાં હંમેશા ચર્ચાનો વિષય રહી છે.

12. પહેલી અને છેલ્લી મેચમાં કપ્તાની કરનાર વિશિષ્ટ ખેલાડી :-
વિશ્ર્વ ક્રિકેટમાં એવા ખૂબ જ ઓછા ખેલાડીઓ જોવા મળે છે જેમણે પોતાની ડેબ્યૂ મેચથી લઈને કરિયરની આખરી મેચ સુધી સમાન સ્તર જાળવ્યું હોય. ધોની એવા ચાર ખાસ ખેલાડીઓમાં સામેલ છે જેમણે પોતાની પ્રથમ અને પોતાની આઈપીએલ કરિયરની છેલ્લી મેચ બંનેમાં ટીમની કપ્તાની સંભાળી હતી. વર્ષ 2008થી શરૂ થયેલું આ સુવર્ણ સફર 18 સીઝન સુધી અવિરત ચાલીને હવે એક નવા અધ્યાય તરફ આગળ વધ્યું છે.

રિટાયરમેન્ટ બાદ ધોનીની  ભાવુક પોસ્ટ :-
નિવૃત્તિની જાહેરાત બાદ ધોનીએ ઈન્સ્ટાગ્રામ પર પોતાની પ્રથમ પ્રતિક્રિયા આપતાં જૂની યાદો તાજી કરી હતી. વર્ષો પહેલાં તેમણે એક ઈન્ટરવ્યૂમાં "મૈં પલ દો પલ કા શાયર હૂં” ગીતની પંક્તિઓ કહી હતી, પરંતુ નિવૃત્તિ બાદ તેમણે આ ગીતનું બીજું વર્ઝન "મૈં હર એક પલ કા શાયર હૂં, હર પલ મેરી કહાની હૈ" શેર કરીને લખ્યું કે, "ફેન્સે પોતાનો પ્રેમ આપીને મને ખોટો સાબિત કરી દીધો.” આ પોસ્ટમાં તેમણે સચિન તેંડુલકર, સૌરવ ગાંગુલી, વિરાટ કોહલીથી લઈને સુરેશ રૈના, ઋતુરાજ ગાયકવાડ અને પીળી જર્સીથી ભરેલાં સ્ટેડિયમની યાદગાર તસવીરો શેર કરી, જેને ગણતરીના કલાકોમાં 8 મિલિયનથી વધુ લાઈક્સ મળી ગયા છે.

સાક્ષીએ માહી માટે લખ્યો ભાવુક સંદેશ
સાક્ષીએ ઈન્સ્ટાગ્રામ પર ધોનીની એક તસવીર શેર કરી છે, જેમાં તેઓ પહાડોની વચ્ચે એક સુંદર નજારા સામે ઊભા રહેલા જોવા મળે છે. આ તસવીર સાથે તેમણે લખ્યું છે કે, "કેટલાક પ્રકરણોનો અંત આવવો જરૂરી હોય છે, જેથી એક નવી સુંદર શરૂઆત થઈ શકે. તે તમામ લોકોનો દિલથી આભાર, જેમણે વર્ષો સુધી માહીને પ્રેમ આપ્યો, તેમનું સમર્થન કર્યું અને તેમના પર વિશ્વાસ મૂક્યો. પછી ભલે અમે તમને વ્યક્તિગત રીતે ઓળખતા હોઈએ કે ન હોઈએ, અમે તમારા આ પ્રેમના હંમેશા આભારી રહીશું. નવી શરૂઆત, નવા રોમાંચ અને અનેક સુંદર યાદોના નામે. માહી, મને તમારા પર હંમેશા ગર્વ રહેશે.”

ફ્યુચર-ઓપ્શન ટ્રેડિંગમાં ન ફસાવાની એમએસ ધોનીની યુવાનોને સલાહ
90 ટકા ટ્રેડર્સને નુકસાન થતું હોવાનું જણાવી મહેનતની કમાણી જોખમમાં ન મૂકવા ચેતવણી

નવી દિલ્હી તા, 18 ; ભારતીય ક્રિકેટનાં પૂર્વ કપ્તાન મહેન્દ્ર સિંહ ધોનીની શેરબજાર અંગેની એક જૂની સલાહ ફરી ચર્ચામાં આવી છે, જેમાં તેમણે યુવા અને નવા રોકાણકારોને ફ્યુચર અને ઓપ્શન (F&O) ટ્રેડિંગથી દૂર રહેવાની સ્પષ્ટ ચેતવણી આપી હતી. ધોનીએ કહ્યું હતું કે F&O બજારમાં લોકો ખૂબ ઝડપથી પોતાનો અભિપ્રાય બદલે છે અને એકવાર તેમાં ફસાયા પછી બહાર નીકળવું મુશ્કેલ બની જાય છે, તેથી રોમાંચ માટે મહેનતની કમાણી દાવ પર ન લગાવવી જોઈએ.

ધોનીએ ટ્રેડિંગ એપ્સ પર દેખાતી ચેતવણીનો ઉલ્લેખ કરતા જણાવ્યું હતું કે આ સેગમેન્ટમાં લગભગ 90 ટકા ટ્રેડર્સને નુકસાન થાય છે અને માત્ર 10 ટકા લોકો જ કમાણી કરે છે, જેના કારણે તેમણે પોતે પણ F&Oટ્રેડિંગથી અંતર જાળવ્યું છે. આ ઉપરાંત, પોતાની રોકાણની રણનીતિ શેર કરતા તેમણે ઉમેર્યું હતું કે તેઓ ક્યારેય એવા શેર ખરીદવાનું પસંદ કરતા નથી જે પોતાના ’ઓલ ટાઈમ હાઈ’ એટલે કે સૌથી ઊંચા ભાવે ચાલી રહ્યાં હોય.