• મધ્ય પૂર્વમાં યુદ્ધના ભણકારા: અમેરિકાએ વ્યૂહાત્મક સૈન્ય મથકોને બનાવ્યા નિશાન
•  ટ્રમ્પના આદેશ બાદ ઈરાનની એર ડિફેન્સ સિસ્ટમ અને રડાર કેન્દ્રો તબાહ
• અપાચે હેલિકોપ્ટરના બદલામાં અમેરિકાએ ઈરાનના ૩ સૈન્ય ઠેકાણાઓ ફૂંકી માર્યા

સિટી ન્યુઝ @ વોશિંગ્ટન

મધ્ય પૂર્વમાં લાંબા સમયથી સેવાઈ રહેલી સૈન્ય સંઘર્ષની આશંકાઓ અંતે હકીકતમાં ફેરવાઈ ગઈ છે. સ્ટ્રેટ ઓફ હોર્મુઝ પાસે અમેરિકાના અત્યાધુનિક AH-64 અપાચે એટેક હેલિકોપ્ટરને તોડી પાડવામાં આવ્યા બાદ પ્રમુખ ડોનાલ્ડ ટ્રમ્પે ઈરાન વિરુદ્ધ સીધી લશ્કરી કાર્યવાહીના આદેશ આપી દીધા છે. મંગળવારે સાંજે 5 વાગ્યે શરૂ થયેલા આ જવાબી હુમલામાં અમેરિકન સેનાએ ઈરાનના અનેક વ્યૂહાત્મક સૈન્ય મથકો, રડાર કેન્દ્રો અને એર ડિફેન્સ સિસ્ટમને નિશાન બનાવીને તબાહ કરી દીધા છે. આ ઘટનાને પગલે પશ્ચિમ એશિયામાં યુદ્ધની આગ ભીષણ રીતે ભડકી ઉઠી છે.

અપાચે હેલિકોપ્ટર તોડી પાડવાની ઘટનાને યુદ્ધનું તાત્કાલિક કારણ માનવામાં આવી રહ્યું છે. અમેરિકાએ દાવો કર્યો છે કે હોર્મુઝ સ્ટ્રેટમાં પેટ્રોલિંગ કરી રહેલા તેમના હેલિકોપ્ટર પર ઈરાન અથવા તેની સમર્થિત તાકાતોએ હુમલો કર્યો હતો. ટ્રમ્પે સ્પષ્ટ કર્યું છે કે અમેરિકન સૈનિકો અને સૈન્ય ઉપકરણો પરના હુમલા કોઈપણ કિંમતે સહન કરવામાં આવશે નહીં. અમેરિકાના સેન્ટ્રલ કમાન્ડ (CENTCOM) દ્વારા હાથ ધરવામાં આવેલા આ ઓપરેશનમાં અબ્બાસ સહિતના ૩ મહત્વના સૈન્ય ઠેકાણાઓ પર મિસાઈલ અને હવાઈ હુમલા થતા ઈરાનના વિસ્તારો ધડાકાઓથી ગુંજી ઉઠ્યા હતા.

આ સંઘર્ષની અસર હવે વૈશ્વિક સ્તરે જોવા મળી રહી છે. ઈરાનની રાજધાની તેહરાન સહિતના મુખ્ય શહેરોમાં હાઈ એલર્ટ જાહેર કરી સુરક્ષા વ્યવસ્થા સઘન બનાવવામાં આવી છે. સ્ટ્રેટ ઓફ હોર્મુઝ વિશ્વના સૌથી મહત્વપૂર્ણ તેલ માર્ગો પૈકીનો એક હોવાથી, ત્યાં જંગના મંડાણ થતા ક્રૂડ ઓઈલ અને ગેસની સપ્લાય ચેઈન ખોરવાઈ જવાની આશંકા સેવાઈ રહી છે. ઈરાને પણ અમેરિકાને જડબાતોડ જવાબ આપવાની કસમ ખાધી છે અને મિસાઈલો દાગીને પલટવાર શરૂ કર્યો છે, જેના કારણે આંતરરાષ્ટ્રીય બજારો અને સુરક્ષા પર મોટી અસર પડવાની દહેશત છે.

 વૈશ્વિક બજાર અને યુદ્ધનું સંકટ

અમેરિકા અને ઈરાન વચ્ચેની આ સીધી સૈન્ય અથડામણ વિશ્વ માટે ચિંતાનું મોટું કારણ બની છે. સ્ટ્રેટ ઓફ હોર્મુઝ જંગનું મેદાન બનતા ક્રૂડ ઓઈલના ભાવમાં મોટો ઉછાળો આવી શકે છે. આ સંઘર્ષથી માત્ર પશ્ચિમ એશિયા જ નહીં પરંતુ સમગ્ર વિશ્વની સપ્લાય ચેઈન અને આર્થિક વ્યવસ્થાઓ ખોરવાઈ શકે છે. બંને દેશોની આક્રમકતા શાંતિના પ્રયાસોને ક્ષીણ કરી રહી છે, જે આંતરરાષ્ટ્રીય સ્તરે ગંભીર પરિણામો લાવી શકે છે.