સિટી ન્યુઝ @ વાશિંગ્ટન

વાશિંગ્ટન, અમેરિકન સેન્ટ્રલ કમાન્ડે સોશિયલ મીડિયા પ્લેટફોર્મ પર જણાવ્યું છે કે તેઓએ મધ્યપૂર્વમાં 20 થી વધુ યુદ્ધજહાજ ગોઠવ્યા છે. આ પગલું વોશિંગ્ટન દ્વારા ઈરાન પર ઘેરાબંધી વધુ આકરી બનાવવાના ભાગરૂપે ઉઠાવવામાં આવ્યું છે. આ ગોઠવણી હોર્મુઝની આસપાસ વધતા તણાવને ધ્યાનમાં રાખીને કરવામાં આવી છે, જ્યારે ઈરાનની સ્પષ્ટ માંગ છે કે હોર્મુઝ ખોલવી હોય તો અમારી માંગો સ્વીકારો.

સેન્ટકોમ મુજબ અમેરિકન નૌકાદળના વિધ્વંસક યુએસએસ રોસ પર સવાર ખલાસીઓ પણ આ વિસ્તારમાં ગોઠવાયેલા દળોનો હિસ્સો છે. કમાન્ડે જણાવ્યું હતું કે આ યુદ્ધજહાજ લશ્કરી મિશનોનું સમર્થન કરી રહ્યા છે, જેમાં ઈરાન સામે અમેરિકાની ઘેરાબંધી વધુ ચુસ્ત રીતે કરવાનો સમાવેશ થાય છે.

અમેરિકન લશ્કરી કમાન્ડે માહિતી આપી હતી કે 9 ઓગસ્ટ સુધી સેન્ટકોમે 55 વેપારી જહાજોને બીજા માર્ગ તરફ વાળી દીધા છે, 2 જહાજને રોક્યા છે અને બાકીના જહાજો પાસેથી નિયમપાલન સુનિશ્ચિત કરાવ્યું છે. આ ગોઠવણી તેવા સમયે થઈ છે જ્યારે ઈરાન અને ઓમાન વચ્ચે હોર્મુઝમાંથી પસાર થતી નવી શિપિંગ લેન અંગેની સમજૂતી અંતિમ તબક્કામાં પહોંચી ગઈ છે.

ઈરાનના વિદેશપ્રધાન અબ્બાસ અરાઘચીએ જણાવ્યું છે કે હોર્મુઝને સંપૂર્ણપણે ખોલવું તે અમેરિકા દ્વારા ઈરાનની માંગો પૂરી કરવા પર નિર્ભર રહેશે. આ માંગોમાં ઈરાનને થયેલા નુકસાનનું વળતર, પ્રતિબંધો અને લશ્કરી ધમકીઓ ખતમ કરવાનો સમાવેશ થાય છે.  તેની સામે અમેરિકન અધિકારીએ જણાવ્યું છે કે અમેરિકાની કોઈપણ કાર્યવાહી ઈરાન પોતે આપેલું વચન પાળે તેની સાથે જોડાયેલી હશે. ઉલ્લેખનીય છે કે હાલ અમેરિકા અને ઈરાન વચ્ચે સીધી વાતચીત થઈ રહી નથી પરંતુ મધ્યસ્થીઓની મદદથી ચર્ચા ચાલી રહી છે.

મધ્યપૂર્વ તણાવ અને દરિયાઈ સુરક્ષા

મધ્યપૂર્વમાં વધતો જતો તણાવ અને દરિયાઈ માર્ગો પરની સુરક્ષા નીતિઓ વૈશ્વિક વેપાર અને આંતરરાષ્ટ્રીય સંબંધો પર ઊંડી અસરો ઊભી કરી રહી છે.