સિટી ન્યુઝ @ ભાવનગર

હિમાચલ પ્રદેશના મનાલીમાં પ્રવાસે ગયેલા ભાવનગરના એક ગુજરાતી પરિવાર માટે પ્રવાસનો આનંદ કાયમી માતમમાં ફેરવાઈ ગયો છે. મનાલીથી બેલા જઈ રહેલા ભાવનગરના સિંધી પરિવારની કાર અચાનક બેકાબૂ થઈને ઊંડી ખીણમાં ખાબકતા હૃદયદ્રાવક અકસ્માત સર્જાયો હતો. આ ભયાનક દુર્ઘટનામાં એક જ પરિવારના 5 સભ્યોના કમકમાટીભર્યા મોત નીપજ્યા છે, જ્યારે અન્ય 4 સભ્યોને ગંભીર હાલતમાં બચાવી લેવામાં આવ્યા છે.

પ્રાપ્ત વિગતો અનુસાર, આ અકસ્માત વહેલી સવારે સર્જાયો હતો. ભાવનગરનો આ પરિવાર મનાલીથી બેલા તરફ આગળ વધી રહ્યો હતો ત્યારે પહાડી રસ્તા પર ડ્રાઈવરે કાર પરનો કાબૂ ગુમાવી દીધો હતો. કારમાં કુલ 9 લોકો સવાર હતા, જે તમામ કાર સાથે સેંકડો ફૂટ ઊંડી ખીણમાં ખાબક્યા હતા. ઘટનાની જાણ થતા જ સ્થાનિક પ્રશાસન અને બચાવ ટુકડીઓ ઘટનાસ્થળે પહોંચી ગઈ હતી અને યુદ્ધના ધોરણે રેસ્ક્યુ ઓપરેશન હાથ ધર્યું હતું.

આ ગમખ્વાર અકસ્માતમાં મૃત્યુ પામેલા લોકોમાં લલિત ફતનાની, સોનિયાબેન, પ્રિયંક ભોપાણી, કાજલ ભોપાણી અને દિવ્યાંશુ ભોપાણીનો સમાવેશ થાય છે. જ્યારે અન્ય ચાર સભ્યો મયંક, ફોરમ, જિયાંશ અને પ્રિયાંશીને સ્થાનિકો અને બચાવ ટુકડીની મહેનતથી સુરક્ષિત રીતે બહાર કાઢી લેવામાં આવ્યા હતા. બચેલા તમામ લોકોને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા છે, જ્યાં તેમની હાલત હાલ સ્થિર હોવાનું જાણવા મળ્યું છે.

મૃતકો ભાવનગરના રહેવાસી હોવાની પુષ્ટિ થતા જ ભાવનગર શહેર અને ખાસ કરીને સિંધી સમાજમાં ઘેરા શોકની લાગણી વ્યાપી ગઈ છે. જે પરિવાર ખુશી-ખુશી વેકેશન માણવા માટે પહાડોમાં ગયો હતો, તેમના મોતના સમાચારથી સ્વજનો સ્તબ્ધ થઈ ગયા છે. અકસ્માતના સમાચાર મળતા જ ભાવનગરથી પણ પરિવારના અન્ય સભ્યો હિમાચલ જવા રવાના થયા છે.

પોલીસના પ્રાથમિક અનુમાન મુજબ, વહેલી સવારના ધુમ્મસ અથવા ડ્રાઈવરની જોકું આવી જવાને કારણે આ અકસ્માત સર્જાયો હોઈ શકે છે. પહાડી રસ્તાઓ પર વળાંક લેતી વખતે કાર બેકાબૂ બની હતી અને સીધી ખીણમાં જઈ પડી હતી. હાલમાં સ્થાનિક પોલીસ અકસ્માતના ચોક્કસ કારણો જાણવા માટે એફએસએલની મદદથી વધુ તપાસ કરી રહી છે. આ ઘટનાએ ફરી એકવાર પહાડી વિસ્તારોમાં પ્રવાસ કરતા પ્રવાસીઓની સુરક્ષા સામે સવાલો ઉભા કર્યા છે.