સિટી ન્યુઝ @ રાજકોટ 

ગુજરાતની એકમાત્ર રાજકોટ એઈમ્સ હોસ્પિટલ ખાતે કેન્દ્રીય આરોગ્ય અને પરિવાર કલ્યાણ મંત્રી જગત પ્રકાશ નડ્ડાના હસ્તે ૩૯ કરોડ રૂપિયાના ખર્ચે નવનિર્મિત એડવાન્સ રેડીએશન ઓન્કોલોજી વિભાગનું વર્ચ્યુઅલ માધ્યમથી લોકાર્પણ કરવામાં આવ્યું છે.

આ નવી સુવિધાના પ્રારંભ થવાથી રાજકોટ સહિત સમગ્ર સૌરાષ્ટ્ર, કચ્છ અને આસપાસના વિસ્તારોના કેન્સરના દર્દીઓને હવે આધુનિક અને ચોકસાઈપૂર્ણ સારવાર માટે મોટા શહેરોમાં ધક્કા ખાવાની જરૂર નહીં પડે.

આ વિભાગમાં હાઈ એનર્જી લિનિયર એક્સિલરેટર, વાઈડ-બોર સીટી સિમ્યુલેટર અને એચ.ડી.આર. બ્રાકીથેરાપી યુનિટ જેવા અદ્યતન મશીનો ઉપલબ્ધ કરાવવામાં આવ્યા છે, જે કેન્સરગ્રસ્ત ભાગોને ચોક્કસ લક્ષિત કરીને રેડિયેશન પૂરું પાડશે.

ખાનગી હોસ્પિટલોમાં ગર્ભાશયના મુખના અને અંદરના ભાગના કેન્સરની સારવાર પાછળ અંદાજે અઢી લાખ રૂપિયા સુધીનો ખર્ચ થતો હોય છે, જે એઈમ્સ રાજકોટ ખાતે નવી દિલ્હીના દર મુજબ માત્ર સાતસો પચાસ રૂપિયામાં ઉપલબ્ધ બનશે.

આ ઉપરાંત, આયુષ્માન ભારત (PM-JAY) યોજનાના પાત્ર લાભાર્થીઓને નિયમો મુજબ વિનામૂલ્યે લાભ મળશે, જેના કારણે સામાન્ય અને જરૂરિયાતમંદ પરિવારોને ગંભીર બીમારી સામે મોટી આર્થિક રાહત મળી રહેશે.

આરોગ્ય ક્ષેત્રે અદ્યતન ટેક્નોલોજી અને સામાન્ય જનતાની સુલભતા

કેન્સર જેવી જીવલેણ અને ગંભીર બીમારીઓ સામેની લડાઈમાં સમયસરની ચોક્કસ નિદાન પદ્ધતિ અને આધુનિક રેડિયોથેરાપી સુવિધાઓ દર્દી માટે જીવનદાયી સાબિત થતી હોય છે. સામાન્ય રીતે અત્યાધુનિક મશીનો અને સારવાર ખાનગી ક્ષેત્રમાં એટલા ખર્ચાળ હોય છે કે સામાન્ય પરિવાર માટે તેનો બોજ સહન કરવો મુશ્કેલ બની જાય છે. રાજકોટ એઈમ્સ જેવી સરકારી સંસ્થાઓમાં રાહત દરે કેન્સરની ઉત્તમ સારવાર ઉપલબ્ધ થવી એ સાચી અર્થમાં કલ્યાણકારી રાજ્ય અને જનઆરોગ્ય પ્રત્યેની સરકારની પ્રતિબદ્ધતાનું ઉત્તમ ઉદાહરણ પૂરું પાડે છે.