સિટી ન્યુઝ @ મુંબઈ :  ટેલિવિઝન જગતના 17મા અઠવાડિયાનો TRP રિપોર્ટ જાહેર થઈ ગયો છે અને આ વખતે પરિણામોએ બધાને ચોંકાવી દીધા છે. અત્યાર સુધી જે શો અજેય માનવામાં આવતા હતા, તે 'અનુપમા' અને 'ક્યોંકિ સાસ ભી કભી બહૂ થી 2' જેવા લોકપ્રિય શોને પછાડીને નવા શો 'વસુધા'એ પ્રથમ સ્થાન હાંસલ કર્યું છે. લાંબા સમયથી ટોપ પર રહેતી સીરિયલોથી હવે દર્શકો કંટાળ્યા હોય તેવું આ આંકડાઓ પરથી સ્પષ્ટ જણાય છે. 'વસુધા' શો 1.8 રેટિંગ સાથે આ અઠવાડિયે ભારતનો સૌથી વધુ જોવાયેલો શો બન્યો છે.

બીજા અને ત્રીજા સ્થાનની વાત કરીએ તો, એકતા કપૂરનો પોપ્યુલર શો 'ક્યોંકિ સાસ ભી કભી બહૂ થી 2' 1.7 રેટિંગ સાથે બીજા ક્રમે રહ્યો છે. જ્યારે ત્રીજા સ્થાને ઝી ટીવીનો જાણીતો શો 'ગંગા માઈ કી બેટિયાં' 1.6 રેટિંગ સાથે પોતાની મજબૂત પકડ જાળવી રહ્યો છે. આ વખતે લિસ્ટમાં સૌથી મોટો આંચકો 'અનુપમા' ફેન્સને લાગ્યો છે, કારણ કે સતત નંબર 1 કે 2 પર રહેતો આ શો સીધો પાંચમા ક્રમે આવી ગયો છે. અનુપમાને આ અઠવાડિયે માત્ર 1.5 રેટિંગ જ મળ્યું છે.

ટોપ 5ની યાદીમાં અન્ય એક મોટો સુધારો 'તુમ સે તુમ તક' શોમાં જોવા મળ્યો છે. 16મા અઠવાડિયામાં ટોપ 5માંથી બહાર નીકળી ગયેલો આ શો ફરી બેઠો થયો છે અને ચોથા ક્રમે સ્થાન મેળવ્યું છે. બીજી તરફ, વર્ષોથી ચાલતો શો 'યે રિશ્તા ક્યા કહેલાતા હૈ' આ વખતે ટોપ 5માંથી બહાર થઈ ગયો છે અને 1.5 રેટિંગ સાથે છઠ્ઠા નંબર પર ફેંકાયો છે. દર્શકોની નવી પસંદગી અને વાર્તામાં બદલાતા પ્રવાહોને કારણે જૂના શો માટે હવે ટોપ પર ટકી રહેવું મુશ્કેલ બની રહ્યું છે.

નિચલા ક્રમે જોઈએ તો, સ્ટાર પ્લસનો 'ઉડને કી આશા' સાતમા નંબરે અને 'ક્યોંકિ રિશ્તો કે ભી રૂપ બદલતે હૈ' આઠમા નંબરે છે. આ સ્પિન-ઓફ શોમાં અંગદ અને વૃંદાની કેમેસ્ટ્રી યુવાનોમાં લોકપ્રિય બની રહી છે. નવમા ક્રમે એકતા કપૂરનો સુપરનેચરલ શો 'નાગિન 7' છે, જેને 1.4 રેટિંગ મળ્યું છે. રિયાલિટી શોના શોખીનો માટે પણ સારા સમાચાર છે, કારણ કે કૂકિંગ અને કોમેડીથી ભરપૂર 'લાફ્ટર શેફ 3' એ 1.4 રેટિંગ સાથે ટોપ 10માં એન્ટ્રી કરી છે.

એકંદરે, 17મું અઠવાડિયું ટીવી પ્રોડ્યુસર્સ માટે ઘણી ઉથલપાથલ લઈને આવ્યું છે. લિસ્ટમાં 'વસુધા' જેવા નવા શોની એન્ટ્રી એ વાતનો પુરાવો છે કે દર્શકો હવે નવીનતા અને તાજગી ધરાવતી સ્ક્રિપ્ટને વધુ પસંદ કરી રહ્યા છે. જે રીતે રેટિંગમાં ગાબડાં પડ્યા છે, તે જોતા 'અનુપમા' અને 'ક્યોંકિ સાસ...' જેવા મેગા શોના મેકર્સે પોતાની વાર્તામાં મોટા ફેરફાર કરવા પડે તેવી સ્થિતિ સર્જાઈ છે. આગામી અઠવાડિયે આ જંગ વધુ રોમાંચક બનશે તે નક્કી છે.