સિટી ન્યૂઝ @ સુરેન્દ્રનગર: સુરેન્દ્રનગર શહેરના ટાઉન વિસ્તારમાં આવેલા અંબિકા પાર્કમાં થોડા દિવસો પૂર્વે થયેલી 31.30 લાખ રૂપિયાની મોટી ઘરફોડ ચોરીનો ભેદ ઉકેલવામાં લોકલ ક્રાઈમ બ્રાન્ચ (LCB) અને સીટી એ ડિવિઝન પોલીસને મોટી સફળતા મળી છે. મકાન માલિક બહારગામ ગયા હોવાનો લાભ ઉઠાવી તસ્કરોએ તાળા તોડી કીમતી ઝવેરાત અને રોકડની ચોરી કરી હતી. પોલીસે આ મામલે બે રીઢા તસ્કરોની ધરપકડ કરી તમામ મુદ્દામાલ રિકવર કર્યો છે.

મળતી વિગતો અનુસાર, અંબિકા પાર્કના એક નિવાસસ્થાને જ્યારે પરિવાર બહારગામ હતો ત્યારે તસ્કરોએ મકાનને ટાર્ગેટ બનાવ્યું હતું. તસ્કરોએ સોના-ચાંદીના દાગીના અને રોકડ મળી કુલ 27 પ્રકારની વસ્તુઓની ચોરી કરી હતી, જેની કુલ કિંમત અંદાજે 31.30 લાખ રૂપિયા થાય છે. આ ઘટનાને પગલે જિલ્લા પોલીસવડાએ એલસીબી અને સીટી પોલીસની અલગ-અલગ ટીમો બનાવી તપાસના આદેશ આપ્યા હતા.

પોલીસે હ્યુમન ઇન્ટેલિજન્સ અને સીસીટીવી ફૂટેજના આધારે શંકાસ્પદ રવિ હકાભાઇ પાટડીયા (રહે. મફતિયા પરા) અને સતિષ ઉર્ફે ભોલો બટુકભાઈ વ્યાસ (રહે. ફિરદો સોસાયટી) ની અટકાયત કરી હતી. સઘન પૂછપરછ દરમિયાન બંનેએ દેવું થઈ ગયું હોવાથી ચોરી કરી હોવાની કબૂલાત આપી હતી. આરોપીઓ પાસેથી ચોરી કરેલા તમામ દાગીના અને રોકડ રકમ જપ્ત કરવામાં આવી છે, જે ભોગ બનનાર પરિવારને પરત સોંપવાની તજવીજ હાથ ધરાઈ છે.

આરોપીઓનો ગુનાહિત ઈતિહાસ તપાસતા ચોંકાવનારી વિગતો સામે આવી છે. મુખ્ય આરોપી રવિ પાટડીયા વિરુદ્ધ ચોટીલા, મોરબી, લીંબડી, ગોંડલ અને જોરાવનગર પોલીસ સ્ટેશનમાં કુલ 8 ગુના નોંધાયેલા છે. જ્યારે સતિષ વ્યાસ સામે પણ સીટી એ ડિવિઝન પોલીસમાં 3 જેટલા ગુના દાખલ થયેલા છે. આમ, આ રીઢા ગુનેગારોએ ફરી એકવાર સુરેન્દ્રનગરમાં મોટો હાથ મારવાનો પ્રયાસ કર્યો હતો, જે પોલીસે નિષ્ફળ બનાવ્યો છે.

આ ઘટના બાદ પોલીસ વિભાગે નાગરિકોને ખાસ અપીલ કરી છે કે જ્યારે પણ પરિવાર સાથે બહારગામ જવાનું હોય અને રહેણાંક મકાન વધુ દિવસો માટે બંધ રહેવાનું હોય, ત્યારે નજીકના પોલીસ સ્ટેશનમાં અચૂક જાણ કરવી. પોલીસને અગાઉથી જાણ કરવાથી તે વિસ્તારમાં પેટ્રોલિંગ વધારી શકાય છે અને આવી ચોરીની ઘટનાઓને અટકાવી શકાય છે. હાલમાં પોલીસે બંને આરોપીઓની ધરપકડ કરી વધુ તપાસ હાથ ધરી છે.