કિંગ્સ્ટનમાં કેપ્ટન શાઈ હોપની અણનમ 65 રનની ઇનિંગ્સથી કેરેબિયન ટીમે મેચ 7 વિકેટે જીતી

કમિન્ડુ મેન્ડિસની અડધી સદી એળે ગઈ, હોલ્ડર અને જોસેફની ઘાતક બોલિંગથી લંકા બેકફૂટ પર

148 રનના લક્ષ્યાંકનો પીછો કરતા ઓપનર બ્રાન્ડન કિંગ અને શાઈ હોપે અપાવી ધમાકેદાર શરૂઆત

સિટી ન્યુઝ @ જમૈકા

જમૈકાના કિંગ્સ્ટન મેદાન ખાતે રમાયેલી રોમાંચક પ્રથમ T20 મેચમાં યજમાન વેસ્ટ ઇન્ડીઝે શાનદાર પ્રદર્શન કરતા શ્રીલંકાને 7 વિકેટથી કારમો પરાજય આપ્યો છે. મેચમાં શ્રીલંકાના કેપ્ટન કુસલ મેન્ડિસે ટોસ જીતીને પ્રથમ બેટિંગ કરવાનો નિર્ણય લીધો હતો, પરંતુ વેસ્ટ ઇન્ડીઝના બોલરો સામે તેમનો આ નિર્ણય ખોટો સાબિત થયો હતો. પ્રથમ બેટિંગ કરવા ઉતરેલી શ્રીલંકાની ટીમ નિર્ધારિત 20 ઓવરમાં 9 વિકેટ ગુમાવીને માત્ર 147 રનનો સામાન્ય સ્કોર જ બનાવી શકી હતી, જેના જવાબમાં કેરેબિયન ટીમે આક્રમક રમત રમી જીત મેળવી લીધી હતી.

શ્રીલંકા તરફથી કમિન્ડુ મેન્ડિસે સૌથી વધુ 39 બોલમાં 51 રન બનાવ્યા હતા, જેમાં 4 ચોગ્ગા અને 2 છગ્ગા સામેલ હતા. કેપ્ટન કુસલ મેન્ડિસે 23 બોલમાં 36 રનનું યોગદાન આપ્યું હતું. પથુમ નિસાન્કા અને કુસલ મેન્ડિસે પ્રથમ વિકેટ માટે 43 રન ઉમેરી સારી શરૂઆત કરાવી હતી, પરંતુ લસિથ ક્રુસ્પુલે શૂન્ય રને આઉટ થતા ટીમ મુશ્કેલીમાં મુકાઈ હતી. ત્યારબાદ કમિન્ડુ મેન્ડિસ અને દાસુન શનાકા વચ્ચે 59 રનની મહત્વપૂર્ણ ભાગીદારી થઈ હતી, જેમાં શનાકાએ 22 રન બનાવ્યા હતા. વેસ્ટ ઇન્ડીઝ વતી જેસન હોલ્ડર અને શમર જોસેફે ઘાતક બોલિંગ કરીને 3-3 વિકેટો ઝડપી લંકાની કમર તોડી નાખી હતી.

વેસ્ટ ઇન્ડીઝ સામે જીતવા માટે 148 રનનો લક્ષ્યાંક હતો. ઓપનર બ્રાન્ડન કિંગ અને કેપ્ટન શાઈ હોપે માત્ર 6.2 ઓવરમાં 67 રનની ધમાકેદાર ઓપનિંગ ભાગીદારી કરીને ટીમને મજબૂત સ્થિતિમાં લાવી દીધી હતી. બ્રાન્ડન કિંગ 22 બોલમાં 37 રન બનાવી આઉટ થયો હતો. જોકે, કેપ્ટન શાઈ હોપે એક છેડો સાચવી રાખીને 53 બોલમાં અણનમ 65 રનની શાનદાર ઇનિંગ્સ રમી હતી. તેમની આ શાનદાર કેપ્ટનશીપ ઇનિંગ્સના દમ પર વેસ્ટ ઇન્ડીઝે 19.2 ઓવરમાં માત્ર 3 વિકેટ ગુમાવીને 4 બોલ બાકી રહેતા જ લક્ષ્ય હાસલ કરી સિરીઝમાં 1-0ની લીડ મેળવી લીધી છે.