સિટી ન્યુઝ @ કિવ

વર્ષોથી ચાલી રહેલું રશિયા-યુક્રેન યુદ્ધ હવે વધુ ભીષણ અને વિનાશક સપાટીએ પહોંચી ગયું છે. મંગળવારે વહેલી સવારે રશિયાએ યુક્રેનના મુખ્ય અને અતિ સંવેદનશીલ શહેરો કિવ, નિપ્રો અને ખાર્કિવ પર મિસાઈલ અને આત્મઘાતી ડ્રોન દ્વારા મોટા પાયે હવાઈ હુમલા કર્યા હતા. આ ભયાનક એરસ્ટ્રાઈકમાં અત્યાર સુધીમાં 9 માસૂમ લોકોના સત્તાવાર મોત થયા છે અને 60 થી વધુ નાગરિકો લોહીલુહાણ હાલતમાં ઘાયલ થયા હોવાના અહેવાલ છે. દક્ષિણ-પૂર્વના નિપ્રો શહેરમાં થયેલા રશિયન હુમલામાં 5 લોકોના મોત થયા છે અને 25 લોકો ઘાયલ થયા છે, જ્યાં રહેણાંક મકાનો અને બાળકોના પ્લે-ગ્રાઉન્ડને મિસાઈલોએ ભારે નુકસાન પહોંચાડ્યું છે.

યુક્રેનના પાટનગર કિવમાં જ સત્તાવાર રીતે 4 લોકોના મોત થયા છે અને 51 લોકો ગંભીર રીતે ઈજાગ્રસ્ત થયા છે. રશિયાના આક્રમક મિસાઈલ હુમલાને કારણે કિવ શહેરમાં આવેલી એક 24 માળની આલીશાન બિલ્ડિંગનો કેટલોક મોટો ભાગ પત્તાના મહેલની જેમ ધરાશાયી થઈ ગયો છે, જેમાં અસંખ્ય લોકો કાટમાળ નીચે દબાયા હોવાની આશંકાથી રેસ્કયૂ ઓપરેશન શરૂ કરાયું છે. કિવના ઓબોલોન જિલ્લામાં પણ હવામાંથી મિસાઈલનો કાટમાળ રહેણાંક વિસ્તારોમાં પડવાથી અનેક લક્ઝરી ગાડીઓ સળગીને ખાખ થઈ ગઈ હતી. બીજી તરફ ખાર્કિવ શહેરમાં થયેલા ડ્રોન હુમલામાં નાના બાળકો સહિત 10 લોકો ગંભીર ઘાયલ થયા છે.

યુક્રેનના પ્રમુખ ઝેલેન્સકીએ અગાઉ જ રશિયા તરફથી મોટા હુમલાની સત્તાવાર ચેતવણી આપી હતી. રશિયાએ ગયા અઠવાડિયે જ યુક્રેનની સૈન્ય અને મહત્વની પાવર ગ્રીડ જગ્યાઓને નિશાન બનાવવાની ખુલ્લી ધમકી આપી હતી. આ ભયાનક હવાઈ હુમલાઓથી બચવા માટે કિવમાં હજારો લોકોએ સુરક્ષા માટે અંડરગ્રાઉન્ડ સબવે સ્ટેશનોમાં આશરો લીધો છે. બીજી તરફ, રશિયાના ક્રાસ્નોદાર વિસ્તારમાં આવેલી ઇલસ્કી ઓઇલ રિફાઇનરી પર પણ યુક્રેન દ્વારા મોટો ડ્રોન હુમલો કરાયો છે. અમેરિકામાં ડોનાલ્ડ ટ્રમ્પનું વહીવટીતંત્ર હાલમાં મધ્ય-પૂર્વના સંઘર્ષો પર વધુ ધ્યાન કેન્દ્રિત કરી રહ્યું હોવાથી યુક્રેન યુદ્ધના અંતની આશાઓ હાલ તો ક્ષીણ દેખાઈ રહી છે.

બંને દેશો એકબીજાની ઓઇલ ફેસિલિટીઝ અને પાવર સપ્લાય પર કરી રહ્યા છે હુમલા

આ ભયાનક વૈશ્વિક યુદ્ધ હવે 4 વર્ષથી વધુ સમયથી અવિરત ચાલી રહ્યું છે, જેનાથી બંને દેશોના અર્થતંત્ર ભાંગી પડ્યા છે. રશિયાના સૈન્ય પ્રવક્તાએ જણાવ્યું છે કે જ્યાં સુધી યુક્રેન આત્મસમર્પણ નહીં કરે ત્યાં સુધી કિવ પર આવા આકરા હુમલા ચાલુ રહેશે. સંયુક્ત રાષ્ટ્ર (UN) દ્વારા રહેણાંક વિસ્તારો અને નિર્દોષ નાગરિકો પર થઈ રહેલા આ આકાશી હુમલાની આકરા શબ્દોમાં નિંદા કરવામાં આવી છે.