સિટી ન્યુઝ @ મોરબી

મોરબી જિલ્લા અને ઉપરવાસમાં શનિવારે થયેલા અતિ ભારે વરસાદના કારણે મોરબીની જીવાદોરી સમાન મહાકાય મચ્છુ-૨ ડેમના ૧૬ પાટિયા ખોલવાની ફરજ પડી હતી. ડેમમાંથી ૮૦ હજાર ક્યુસેકથી વધુ પાણી છોડાતા મોરબી મધ્યેથી પસાર થતી મચ્છુ નદીના પાણી માળિયાના નદીકાંઠાના શહેરી અને ગ્રામ્ય વિસ્તારોમાં ફરી વળ્યાં હતા. આ સ્થિતિના કારણે વર્ષ ૨૦૧૭માં સર્જાયેલા પૂરની યાદો તાજી થઈ ગઈ હતી અને નીચાણવાળા તથા નદીકાંઠાના ખેતરો સંપૂર્ણપણે જળબંબાકાર થઈ ગયા હતા.

પૂરના પાણી ખેતરોમાં ફરી વળતાં ખેડૂતોનો ઉભો પાક પાણીમાં ગરક થઈ ગયો છે, જેના કારણે અન્નદાતાઓ ભારે આર્થિક સંકટમાં મુકાય ગયા છે. ખેતરોમાં ફૂટ ફૂટ જેટલા પાણી ભરાતા કપાસ, મગફળી અને તલ જેવા રોકડિયા પાકો મુરઝાઈ જવાની અણી પર આવી ગયા છે. ખેડૂત વિરડા જેસીગભાઈએ વેદના વ્યક્ત કરતા જણાવ્યું હતું કે મોંઘા બિયારણ, ખાતર અને મજૂરી પાછળ હજારો રૂપિયા ખર્ચ્યા પછી તૈયાર કરેલી મહેનત પર પાણી ફરી વળ્યું છે અને હવે ફરી ખર્ચ કરવાની કોઈ આર્થિક ક્ષમતા બચી નથી.

અન્ય ખેડૂત જેઠાભાઈ કાનાભાઈ અને ફતેપર ગામના દિલાવર ઓસમાણભાઈએ જણાવ્યું હતું કે ખેતરોના પાળા તોડીને ઘૂસેલા પૂરના પ્રવાહથી પાક સંપૂર્ણ નષ્ટ થઈ ગયો છે. પાણી ઓસર્યા બાદ પણ હાથમાં કઈ નહીં આવે તેવી સ્થિતિ હોવાથી ખેડૂતોને આ આફતમાંથી ઉગારવા માટે કૃષિ વિભાગ તેમજ જિલ્લા પ્રશાસન તાત્કાલિક ધોરણે સર્વે કરીને વિશેષ રાહત પેકેજ અને સહાય પૂરી પાડે તેવી ઉગ્ર માંગ કરવામાં આવી છે.

આ કુદરતી આફતે સમગ્ર પંથકના ખેડૂતોની કમર તોડી નાખી છે અને સૌની નજર હવે સરકારી સહાય પર છે.

કૃષિ અને આપત્તિ વ્યવસ્થાપન

અતિવૃષ્ટિ અને ડેમમાંથી છોડાતા પાણીને કારણે ઊભી થતી પૂરની પરિસ્થિતિમાં ખેડૂતોને સમયસર આર્થિક સહાય અને માર્ગદર્શન પૂરૂં પાડવું એ પ્રશાસનની પ્રાથમિકતા રહે છે.