સિટી ન્યુઝ @ વોશિંગ્ટન

ઇઝરાયલ અને હિઝબુલ્લાહ વચ્ચે લાંબા સમયથી ચાલી રહેલા ભીષણ જંગને શાંત કરવા અમેરિકાની મધ્યસ્થી આખરે સફળ સાબિત થઈ છે. શુક્રવારે વોશિંગ્ટન ખાતે ઇઝરાયલ અને લેબેનોને એક ઐતિહાસિક શાંતિ કરારની રૂપરેખા પર હસ્તાક્ષર કર્યા છે. આ સમજૂતીને બંને દેશો વચ્ચે કાયમી શાંતિ સ્થાપવા તરફનું અત્યંત મહત્વપૂર્ણ અને પ્રથમ પગલું માનવામાં આવી રહ્યું છે. લાંબા સંઘર્ષ અને હજારો લોકોના જીવ ગયા બાદ આ કરારથી વૈશ્વિક સ્તરે શાંતિની નવી આશા જાગી છે.

અમેરિકાની હાજરીમાં યોજાયેલા આ ખાસ કાર્યક્રમમાં અમેરિકા સ્થિત લેબેનોનના રાજદૂત નાડા હમાદેહ મોવાદ અને ઇઝરાયલના રાજદૂત યેચિયલ લાઇટર દ્વારા આ ત્રિપક્ષીય દસ્તાવેજ પર સહીઓ કરવામાં આવી હતી. આ પ્રસંગે અમેરિકન વિદેશ મંત્રી માર્કો રુબિયોએ જણાવ્યું હતું કે આ પ્રવાસ મુશ્કેલ છે પરંતુ અનિવાર્ય છે. લેબેનોનના રાજદૂતે આ કરારને દેશની સાર્વભૌમત્વ અને નાગરિકોની સુરક્ષા માટેનું પ્રથમ સકારાત્મક કદમ ગણાવ્યું હતું. બંને દેશોના રાજદૂતોએ એકબીજાની મજબૂત વાટાઘાટોની પ્રશંસા પણ કરી હતી.

આ શાંતિ કરારની જાહેરાત થતાં જ ઇઝરાયલના વડાપ્રધાન બેન્જામિન નેતન્યાહૂએ એક કડક નિવેદન આપ્યું હતું. નેતન્યાહૂએ સ્પષ્ટ ચેતવણી આપી છે કે જ્યાં સુધી આતંકવાદી સંગઠન હિઝબુલ્લાહનું સંપૂર્ણ નિઃશસ્ત્રીકરણ નહીં થાય, ત્યાં સુધી ઇઝરાયલી સેના દક્ષિણ લેબેનોનમાં પોતાની હાજરી જાળવી રાખશે. જોકે, તેમણે લેબેનોનની સત્તાવાર આર્મીને લિતાની નદીની દક્ષિણ અને ઉત્તરમાં આવેલા 2 પ્રાયોગિક વિસ્તારોમાં નિયંત્રણ લેવાની મંજૂરી આપવાની વાત કરી છે. ફ્રેમવર્ક ડીલની સંપૂર્ણ શરતો હજુ સત્તાવાર રીતે જાહેર કરવામાં આવી નથી.

હિઝબુલ્લાહનું નિઃશસ્ત્રીકરણ એ જ શાંતિનો એકમાત્ર વિકલ્પ

મધ્યપૂર્વમાં કાયમી શાંતિની સ્થાપના ત્યારે જ શક્ય છે જ્યારે આતંકવાદી સંગઠનો હથિયાર હેઠા મૂકે. નેતન્યાહૂની શરત સ્પષ્ટ કરે છે કે કાગળ પર થયેલી સમજૂતી જમીની સ્તર પર ત્યારે જ સફળ થશે જ્યારે હિઝબુલ્લાહનું સંપૂર્ણ નિઃશસ્ત્રીકરણ થશે. જ્યાં સુધી સરહદ પર સશસ્ત્ર જૂથોનો ખતરો રહેશે, ત્યાં સુધી ઇઝરાયલ પોતાની સુરક્ષા સાથે કોઈ પણ પ્રકારની બાંધછોડ કરવા તૈયાર નથી તે નિશ્ચિત છે.