રવિવારે રજા હોવા છતાં રેલીઓમાં પાંખી હાજરી; ઉમેદવારોએ પ્રચારનો સમય બદલી વહેલી સવાર અને મોડી સાંજનો કર્યો

 ડોર-ટુ-ડોર સંપર્ક અને ગ્રુપ મીટિંગ પર ભાર; કામોનો હિસાબ માંગતી જનતા સામે નેતાઓ લાચાર

 ગરમીના પ્રકોપ વચ્ચે પ્રચારના શિડ્યુલ ખોરવાયા; સોસાયટીઓમાં ઢોલ-નગારા વાગ્યા પણ પ્રતિસાદ શૂન્ય

ગુજરાતમાં સ્થાનિક સ્વરાજ્યની ચૂંટણીને હવે ગણતરીના દિવસો બાકી રહ્યા છે, પરંતુ આ વખતે ચૂંટણીનો પારંપરિક માહોલ ક્યાંય જોવા મળી રહ્યો નથી. રવિવારનો દિવસ હોવા છતાં પ્રચારમાં જે ઉત્સાહ હોવો જોઈએ તેનો અભાવ જોવા મળ્યો હતો. એક તરફ આકાશમાંથી વરસી રહેલી આગ જેવી ગરમી અને બીજી તરફ મતદારોમાં જોવા મળતી ભારે નીરસતાએ રાજકીય પક્ષો અને ઉમેદવારોની ઉંઘ હરામ કરી દીધી છે.

ગરમીના કારણે શિડ્યુલમાં ફેરફાર રાજ્યમાં પડી રહેલા ભીષણ હીટવેવને કારણે ઉમેદવારોએ પોતાના પ્રચારના સમયમાં મોટો ફેરફાર કરવો પડ્યો છે. બપોરના સમયે રસ્તાઓ સુમસામ હોવાથી હવે પ્રચાર માત્ર વહેલી સવારે અને મોડી રાત સુધી સીમિત રહ્યો છે. પક્ષો દ્વારા હવે મોટી રેલીઓને બદલે સોસાયટી-ફ્લેટમાં નાની ગ્રુપ મીટિંગો અને ડોર-ટુ-ડોર સંપર્ક કરવા પર વધુ ભાર મૂકવામાં આવી રહ્યો છે.

જાગૃત મતદારો અને પાંખી હાજરી રવિવારે રજાનો દિવસ હોવાથી અનેક જગ્યાએ ઢોલ-નગારા સાથે રેલીઓ કાઢવામાં આવી હતી, પરંતુ તેમાં લોકોની સંખ્યા અત્યંત પાંખી જોવા મળી હતી. સૌથી વધુ ચિંતાની વાત એ છે કે મતદારો હવે ઉમેદવારોને પાયાના કામો વિશે આકરા સવાલો પૂછી રહ્યા છે. ક્યાંક નેતાઓનો હુરિયો બોલાવવામાં આવી રહ્યો છે તો ક્યાંક લેખિતમાં વચનો માંગવામાં આવી રહ્યા છે. ચૂંટણી કાર્યાલયો પણ ખાલીખમ જોવા મળી રહ્યા છે, જે સૂચવે છે કે સામાન્ય જનતાને આ વખતે ચૂંટણીમાં ખાસ રસ રહ્યો નથી.

ઓછા મતદાનની ભીતિ રાજકીય વિશ્લેષકો માની રહ્યા છે કે જો મતદારોની આ જ નીરસતા જારી રહી, તો મ્યુનિસિપલ કોર્પોરેશન અને પંચાયતોની ચૂંટણીમાં મતદાનની ટકાવારીમાં મોટો ઘટાડો થઈ શકે છે. ઓછું મતદાન હંમેશા રાજકીય પક્ષો માટે અણધાર્યા પરિણામો લાવતું હોય છે, જેના કારણે અત્યારે મોટા ગજાના નેતાઓના પેટમાં પણ ફાળ પડી છે.