સિટી ન્યુઝ @ લંડન

લંડન / ગઢડા, ઈંગ્લેન્ડની ધરતી પર પ્રથમવાર ભારતીય આધ્યાત્મિક પરંપરા અને સાંસ્કૃતિક વારસાને વૈશ્વિક સ્તરે રજૂ કરતો એક ઐતિહાસિક કાર્યક્રમ યોજાવા જઈ રહ્યો છે. આગામી ૭થી ૧૪ ઓગસ્ટ દરમિયાન લંડનમાં ભવ્ય સંત સંસદનું આયોજન કરવામાં આવ્યું છે, જેમાં ભારતના વિવિધ રાજ્યોમાંથી જાણીતા સંતો, મહંતો, મહામંડલેશ્વરો તેમજ વિવિધ ધાર્મિક પરંપરાઓના પ્રતિનિધિઓ એક જ મંચ પર ઉપસ્થિત રહેશે. આ કાર્યક્રમને માત્ર ધાર્મિક સંમેલન તરીકે નહીં પરંતુ વિશ્વમાં શાંતિ, સૌહાર્દ, સહઅસ્તિત્વ અને માનવ એકતાનો સંદેશ આપતા આંતરરાષ્ટ્રીય આધ્યાત્મિક મંચ તરીકે જોવામાં આવી રહ્યો છે.

આ ભવ્ય સંત સંસદમાં ગુજરાત માટે ગૌરવની ક્ષણ સર્જાવાની છે, કેમ કે ગઢડા સ્થિત શ્રી ગોપીનાથજી મંદિરના પૂર્વ ચેરમેન અને જાણીતા સંત એસપી સ્વામી આ કાર્યક્રમમાં વિશેષ ઉપસ્થિતિ નોંધાવશે. તેમના સિવાય દેશના અનેક અગ્રણી સંતો અને ધાર્મિક આગેવાનો પણ લંડનમાં યોજાનારા આ ઐતિહાસિક સંમેલનમાં ભાગ લેશે. આ સંસદનું આયોજન 'ધ નેશનલ શક્તિ કેન્દ્ર' ની ૨૫મી વર્ષગાંઠ (રજત જયંતિ) નિમિત્તે કરવામાં આવ્યું છે, જેનો મુખ્ય ઉદ્દેશ ભારતીય સંસ્કૃતિ અને આધ્યાત્મિક મૂલ્યોને વૈશ્વિક સમાજ સમક્ષ પ્રસ્તુત કરવાનો છે.

આઠ દિવસ સુધી ચાલનારા આ કાર્યક્રમમાં હિન્દુ, બૌદ્ધ, શિખ અને જૈન ધર્મના પ્રતિનિધિઓ હાજરી આપીને વિશ્વ શાંતિ, ભાઈચારો અને આધ્યાત્મિક સહઅસ્તિત્વ અંગે પોતાના વિચારો રજૂ કરશે. આધુનિક વિશ્વ સામે ઊભા થતા સામાજિક અને નૈતિક પડકારો વચ્ચે આધ્યાત્મિક મૂલ્યોનું મહત્વ ઉજાગર કરવા માટે આ આંતરધર્મીય સંવાદ અત્યંત મહત્વપૂર્ણ માનવામાં આવે છે.

ગઢડા સ્વામિનારાયણ સંપ્રદાયનું ઐતિહાસિક કેન્દ્ર હોવાથી ત્યાંના સંતનું આ વૈશ્વિક મંચ પર પ્રતિનિધિત્વ કરવું સ્થાનિક શ્રદ્ધાળુઓ માટે પણ અત્યંત ગર્વની બાબત છે. આ ઐતિહાસિક આયોજન વિશ્વ શાંતિ અને ભારતીય સંસ્કૃતિના પ્રસાર માટે સીમાચિહ્ન સાબિત થશે.

આધ્યાત્મિક સંસ્કૃતિ

વિશ્વભરમાં ભારતીય સનાતન સંસ્કૃતિ અને આધ્યાત્મિક વિચારોનો પ્રસાર કરવા માટે આવા આંતરરાષ્ટ્રીય મંચો મહત્વપૂર્ણ સેતુનું કામ કરે છે.