• હેવી ફૅબ્રિક્સ અને ટાઇટ ફિટિંગ કપડાંને બદલે આ કમ્ફર્ટેબલ છે.

• ચોમાસાના ભેજવાળા વાતાવરણમાં સ્કિન-ઇન્ફેક્શનનું જોખમ ઘટે છે.

• આ કાપડ ૧૦૦ ટકા કૉટન અથવા કૉટન-બ્લેન્ડમાંથી બનાવવામાં આવે છે.

સિટી ન્યુઝ @ મુંબઈ

મુંબઈ, ચોમાસાની ઋતુમાં વધી રહેલા ભેજના પ્રમાણને લીધે ડેનિમ, સિલ્ક કે ભારે ટાઇટ ફિટિંગવાળાં કપડાં અનકમ્ફર્ટેબલ લાગે છે, જેને કારણે અસ્વસ્થતા અને સ્કિન-ઇન્ફેક્શનનું જોખમ વધે છે. જોકે ફૅશનમાં અત્યારે મૉન્સૂન આઉટફિટ તરીકે પોપલિન સ્કર્ટ્‍સ પૉપ્યુલર થઈ રહ્યાં છે. પોપલિન કોઈ ચોક્કસ ડિઝાઇનનું નામ નથી પણ કાપડ વણવાની એક પરંપરાગત પદ્ધતિ છે. સામાન્ય રીતે આ કાપડ ૧૦૦ ટકા કૉટન અથવા કૉટન-બ્લેન્ડમાંથી બનાવવામાં આવે છે, અને એનું સ્ટ્રક્ચર આઉટફિટને પ્રીમિયમ લુક આપે છે.

આ સ્કર્ટ્‍સ શૉર્ટ, મિડી અને મૅક્સી લંબાઈમાં ઉપલબ્ધ છે. ચોમાસાના પાણીથી બચવા માટે ની-લેન્ગ્થ અથવા મિડી-લેન્ગ્થ પોપલિન સ્કર્ટ્‍સ સૌથી વધુ પ્રાયોગિક અને ક્લાસી ગણાય છે. પોપલિન સ્કર્ટ્‍સ પોતાની વર્સેટિલિટી માટે જાણીતાં છે અને તમે માત્ર એક જ સ્કર્ટને અલગ-અલગ અપરવેઅર સાથે મૅચ કરીને મલ્ટિપલ લુક્સ ક્રીએટ કરી શકો છો. ફૉર્મલ કૉટન શર્ટ અથવા ક્લાસિક વાઇટ શર્ટને આ સ્કર્ટ સાથે ઇન કરીને પહેરવાથી પ્રોફેશનલ અને સ્માર્ટ કૉર્પોરેટ લુક મળે છે.

મિત્રો સાથે બ્રન્ચ, શૉપિંગ, કૅઝ્યુઅલ આઉટિંગ કે મૉન્સૂન-ડ્રાઇવ માટે આ સ્કર્ટ્‍સ ખૂબ જ કમ્ફર્ટેબલ રહે છે. આ કાપડ સરળતાથી સુકાઈ જતું હોવાથી અને વજનમાં હલકું હોવાથી ચોમાસાની મુસાફરી દરમ્યાન સામાનમાં રાખવા માટે બેસ્ટ ઑપ્શન છે. પોપલિન સ્કર્ટની એ-લાઇન અને ફ્લેર્ડ કટિંગ લગભગ દરેક ભારતીય બૉડી-ટાઇપ પર સરસ રીતે ફિટ બેસે છે અને વેસ્ટલાઇનને સુંદર રીતે હાઇલાઇટ કરે છે.

મૉન્સૂન સ્ટાઇલિંગ માટે આ સ્કર્ટ્સ સાથે હંમેશાં ફિટેડ અથવા સેમી-ફિટેડ ટૉપ પસંદ કરવા જોઈએ. ક્રોપ ટૉપ્સ, બૉડીસૂટ્સ અથવા રિબ્ડ ટી-શર્ટ્સ આની સાથે બેસ્ટ કૉમ્બિનેશન બનાવે છે. ચોમાસાના વાદળછાયા વાતાવરણમાં સૉફ્ટ અને પેસ્ટલ કલર્સ જેમ કે પાઉડર બ્લુ, બેજ, ક્લાસિક વાઇટ, સૉફ્ટ પિન્ક કે લેમન યલો રંગનાં સ્કર્ટ્‍સ ખૂબ જ રિફ્રેશિંગ લુક આપે છે.

આ સીઝનમાં હીલ્સ કે લેધરનાં શૂઝ પહેરવાનું ટાળવું જોઈએ. પોપલિન સ્કર્ટ સાથે વૉટરપ્રૂફ સૅન્ડલ્સ, સ્ટાઇલિશ સ્લાઇડર્સ, ગ્લૅડિયેટર્સ અથવા કૅન્વસ સ્નીકર્સ પહેરવાથી કમ્ફર્ટ અને સ્ટાઇલ બંને ઉત્તમ રીતે જળવાઈ રહે છે.